Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible utu ulongesha tshinyi menemene?

TSHISAKIDILA

Bua tshinyi bena Kristo balelela kabatu batendelela ne nkuruse?

Bua tshinyi bena Kristo balelela kabatu batendelela ne nkuruse?

BANTU ba bungi batu batendelela ne banemeka nkuruse. Mukanda kampanda udi ubikila nkuruse ne: “Tshimanyinu tshinene tshia tshitendelelu tshia bena Kristo.” (The Encyclopædia Britannica) Kadi bena Kristo balelela kabatu batendelela ne nkuruse to. Bua tshinyi?

Diandamuna dinene didi ne: Yezu kavua mufuile pa nkuruse to. Muaku wa mu tshiena-Greke utubu bakudimuna misangu ya bungi ne: “nkuruse” udi stau·ros′. Muaku eu utu umvuija nangananga “Mutshi mululame anyi dikunji.” Bible mukuabu udi umvuija ne: “[Stau·ros′] katu muanji kumvuija bitupa bibidi bia mitshi bitshiamakaja mu mushindu kampanda to…Kakuena tshintu mu tshiena-Greke tshia mu [Dipungila Dipiadipia] tshidi nansha mua kumvuija bitupa bibidi bia mitshi to.”—The Companion Bible.

Mu mvese mikuabu, bafundi ba Bible mbenze mudimu ne muaku xy′lon bua kuleja muaba uvua Yezu mufuile. (Bienzedi 5:30; 10:39; 13:29; Galatia 3:13; 1 Petelo 2:24) Muaku eu udi umvuija “dibaya” anyi “mulangala, mukamba peshi mutshi.”

Mukanda wa Hermann Fulda udi umvuija bua tshinyi bavua batamba kushipa bantu pa dikunji dia patupu, wamba ne: “Mitshi kayivua miaba yonso ivuabu basungula bua kushipela bantu to. Ke bualu kayi bavua bajiika mutshi wetu wa tshianana eu mu buloba. Ku mutshi eku ke kuvuabu basuikila anyi bapopela benji ba malu mabi bianza biela mulu ne misangu ya bungi basuikila anyi bapopela makasa abu kabidi.”—Das Kreuz und die Kreuzigung.

Kadi tshijadiki tshitambe bunene tshidi mu Bible. Mupostolo Paulo wakamba ne: ‘Kristo wakatupikula ku mulawu wa mikenji, wakadivuija bu mulawu bua bualu buetu; bu muakafundabu ne: Muntu yonso udi mukudika ku mutshi udi ne mulawu.’ (Galatia 3:13) Mu mvese eu, Paulo udi wambulula mêyi a mu Dutelonome 21:22, 23, adi akula patoke bua mutshi, ki mbua nkuruse to. Bu muvua kushipa muntu ku mutshi kumuvuija muena ‘mulawu,’ ki mbimpe bua bena Kristo balengeje nzubu yabu ne bimfuanyi bia Kristo mupopela ku mutshi to.

Kakuena tshidi tshileja ne: munkatshi mua bidimu 300 kunyima kua lufu lua Kristo aba bavua badiamba bena Kristo bavua batendelela ne nkuruse to. Kadi mu bidimu bia 300, Mukalenge Constantin (uvua mumpangano) wakalua kuitaba Buena-Kristo bua dishima ne kuenzejaye bua nkuruse ikale tshimanyinu tshiabu. Nansha bu Constantin muikale ne lungenyi kayi, nkuruse kavua ne diumvuangana nansha dikese ne Yezu Kristo to. Mu kuamba bulelela, nkuruse mmufumine mu malongesha a bampangano. Mukanda kampanda wa bena Katolike udi uleja ne: “Bavua batendelela ne nkuruse kudi bantu ba kumpala kua Kristo ne bantu bavua kabayi bena Kristo.” (New Catholic Encyclopedia) Mikanda mikuabu idi isuikakaja nkuruse ne ditendelela dia bintu ne mikiya ya bampangano ya bitupa bia lulelu.

Kadi bua tshinyi mbangate tshimanyinu tshia bampangano etshi? Mbimueneke ne: mbua kupepejila bampangano bua kuitababu Buena-Kristo bua ku dîna. Nansha nanku, Bible mmukandike dilamata tshimanyinu kayi tshionso tshia bampangano. (2 Kolinto 6:14-18) Mukanda wa Nzambi udi kabidi ukandika ditendelela dionso dia mpingu. (Ekesode 20:4, 5; 1 Kolinto 10:14) Ke bualu kayi bena Kristo balelela kabatu batendelela ne nkuruse to.*


*  Tudi mua kupeta malu a bungi adi atangila nkuruse mu mukanda wa Comment raisonner à partir des écritures mu dibeji dia 77-81, mupatula kudi Bantemu ba Yehowa.

← Tangila nshapita