Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible utu ulongesha tshinyi menemene?

NSHAPITA WA DIKUMI NE MUANDA MUKULU

Batismo ne malanda ebe ne Nzambi

Batismo ne malanda ebe ne Nzambi

Mmunyi mutubu batambuisha muntu bua kuluaye muena Kristo?

Mmalu kayi audi ne bua kukumbaja bua kutambula?

Mmushindu kayi utu muntu udilambula kudi Nzambi?

Muntu utu utambula nangananga bua tshinyi?

‘KE MÂYI aa! Tshidi tshikandika bua wewe kuntambuisha ntshinyi?’ Muena Etiopia kampanda ke wakela lukonko elu mu bidimu lukama bia kumpala. Muena Kristo uvua ne dîna dia Filipo wakamujadikila ne: Yezu ke uvua Masiya uvuabu balaye. Bu muvua malu avuaye mulonge mu Mukanda wa Nzambi aa mamulenge ku muoyo bikole, muena Etiopia eu wakajinga kutambula.—Bienzedi 8:26-36, MMM.

Munene wa mu Etiopia

2 Pikala Ntemu wa Yehowa kampanda mulonge nebe bimpe nshapita mikuabu ya mu mukanda eu, udi mua kudiebeja pebe ne: ‘Ntshinyi tshidi tshimpangisha meme bua kutambula?’ Ukadi mulonge bua muoyo wa tshiendelele mu Mparadizu udi Bible utulaya. (Luka 23:43; Buakabuluibua 21:3, 4) Udi kabidi mulonge bua tshitu tshifikila muntu padiye ufua ne bua dibika dia bafue. (Muambi 9:5; Yone 5:28, 29) Pamuapa ukadi mutuadije kubuela mu bisangilu bia Bantemu ba Yehowa ne udi mudimuene nkayebe mudibu bikale mu tshitendelelu tshilelela. (Yone 13:35) Bualu bua mushinga kabidi, ukadi pamuapa mutuadije kukolesha malanda ebe ne Yehowa Nzambi.

3 Mmunyi muudi mua kuleja ne: udi musue kuenzela Nzambi mudimu? Yezu wakambila bayidi bende ne: ‘Ndayi, nuvuije ba bisamba bionso bayidi, nubabatize.’ (Matayo 28:19) Yezu nkayende wakashiya tshilejilu pakatambulaye mu mâyi. Kabavua bamumiamine mâyi patupu anyi bamuele mâyi mu mutu nansha. (Matayo 3:16) Muaku ‘kutambula’ anyi ‘kubatiza’ udi ufumina ku muaku wa tshiena-Greke udi umvuija “kuina.” Nunku, kutambuisha kua bena Kristo kudi kumvuija kuina muntu mujima mu mâyi.

4 Batismo wa mu mâyi ntshintu tshia mushinga tshidibu balombe muntu yonso bua kuikalaye mu malanda mimpe ne Yehowa Nzambi. Paudi utambula, udi uleja patoke ne: udi musue kuenzela Nzambi mudimu ne udi usanka bua kuenza disua diende. (Musambu 40:7, 8) Kadi bua wewe kutambula, udi ne bua kukumbaja amue malu.

DIMANYA NE DITABUJA

5 Ukadi mubangishe kukumbaja bualu bua kumpala. Mushindu kayi? Mpaudi wenda upeta dimanya dia Yehowa Nzambi ne dia Yezu Kristo, pamuapa padibu bakulongesha Bible pa tshibidilu. (Yone 17:3) Kadi kudi malu a bungi a kulonga. Bena Kristo badi ne bua ‘kuujibua tente ne dimanya dijalame dia disua dia Nzambi.’ (Kolosai 1:9) Kubuela mu bisangilu bia Bantemu ba Yehowa kudi ne mushinga wa bungi bualu nekukuambuluishe bua kumanya malu makuabu. (Ebelu 10:24, 25) Bushuwa, kuikala ne tshibidilu tshia kubuela mu bisangilu ebi nekukuambuluishe bua kuvudija dimanya diebe dia Nzambi.

Kupeta dimanya dijalame dia Dîyi dia Nzambi mbualu bunene budi bufikisha ku ditambula

Bantu balonga Bible

6 Tshidibi, kabiena bikengela anu kumanya malu onso adi mu Bible bua kutambula to. Tshilejilu, muena Etiopia uvua ne ndambu wa dimanya, kadi bivua bikengela kumuambuluisha bua kumvua malu makuabu a mu Mukanda wa Nzambi. (Bienzedi 8:30, 31) Wewe pebe utshidi ne bia bungi bia kulonga. Bua kuamba bulelela, kuena mua kujikija kulonga malu a Nzambi to. (Muambi 3:11) Kadi kumpala kua wewe kutambula, udi ne bua kumanya ne kuitaba malongesha manene a mu Bible. (Ebelu 5:12) Tshilejilu, udi ne bua kumanya tshitu tshifikila bantu patubu bafua ne mushinga wa dîna dia Nzambi ne Bukalenge buende.

7 Kadi dimanya nkayadi ki ndikumbane to, bualu ‘bikalaku kakuyi ditabuja, muntu kêna mua kusankisha Nzambi.’ (Ebelu 11:6) Bible udi wamba ne: pavua bamue bantu ba mu tshimenga tshia Kolinto wa kale bumvue diyisha dia bena Kristo, ‘bakitabuja, bakabatijibua.’ (Bienzedi 18:8) Bia muomumue, dilonga dia Bible didi ne bua kuuja muoyo webe ne ditabuja dia ne: Bible n’Dîyi dia Nzambi difundisha ne nyuma wende. Dilonga dia Bible didi ne bua kukuambuluisha bua kuitabuja malu adi Nzambi mulaye ne kabidi ne: mulambu wa Yezu udi mua kukupandisha.—Yoshua 23:14; Bienzedi 4:12; 2 Timote 3:16, 17.

KUMANYISHA BAKUABU BULELELA

8 Padi ditabuja dienda didiunda mu muoyo webe, nebikukolele bua kudilamina nkayebe malu audi mulonge. (Yelemiya 20:9) Nedikusake anu bua kuambila bakuabu malu a Nzambi ne bidiye mulongolole bua kuenza.—2 Kolinto 4:13.

Ditabuja didi ne bua kukusaka bua kumanyisha bakuabu malu audi witaba

Nsongalume uyisha

9 Udi mua kutuadija kuambila balela, balunda, bena mutumba ne bena mudimu nebe malongesha a mu Bible ne bukalanga buonso. Mu kupita kua matuku, udi mua kujinga kuyisha pamue ne Bantemu ba Yehowa. Dîba adi, udi mua kuleja Ntemu udi ukulongesha Bible dijinga diebe edi. Biobi bimueneke ne: udi mukumbane bua kuyisha, nebenze bua wewe ne mulongeshi webe nupetangane ne bakulu babidi ba mu tshisumbu.

10 Diyukidilangana edi nedikuambuluishe bua kuibidilangana ne bakulu bakuabu bena Kristo badi balama mikoko ya Nzambi. (Bienzedi 20:28; 1 Petelo 5:2, 3) Bikala bakulu aba bamone ne: udi mumvue malongesha manene a mu Bible ne udi uitaba, udi ne nsombelu udi umvuangana ne mikenji ya Nzambi ne udi musue kuikala Ntemu wa Yehowa bulelela, nebakumanyishe ne: udi mukumbane bua kuenza mudimu wa kuyisha ne kuikala mumanyishi wa lumu luimpe udi kayi muanji kutambula.

11 Bakulu aba badi mua kumona kabidi ne: bidi bikengela wanji kulekela bimue bilele ne malu makuabu kumpala kua wewe kupatuka mu mudimu wa kuyisha. Bidi mua kukulomba bua kulekela malu makuabu auvua wenza mu musokoko. Nunku, kumpala kua wewe kulomba bua kulua mumanyishi udi kayi muanji kutambula, udi ne bua kulekela malu mabi manene onso auvua wenza bu mudi: tshiendenda, dikuatshika dia maluvu ne dinua mfuanka anyi diamba.—1 Kolinto 6:9, 10; Galatia 5:19-21.

DINYINGALALA NE DIKUDIMUNA MUTSHIMA

12 Kumpala kua kutambula, udi ne bua kukumbaja malu makuabu. Mupostolo Petelo wakamba ne: ‘Nyingalalayi, ne andamukayi, bua banujimijile mibi yenu.’ (Bienzedi 3:19, NW) Kunyingalala kudi kumvuija kumvua bibi menemene bua bualu kampanda buuvua muenze. Dinyingalala ndikumbanyine bimpe muntu uvua ne bienzedi bibi, kadi didi kabidi ne mushinga bua muntu uvua muikale ne bienzedi bimueneka bu bimpe. Bua tshinyi? Bualu bantu bonso batu benza bilema ne badi dijinga ne: Nzambi abafuile luse. (Lomo 3:23; 5:12) Kumpala kua kulonga Bible, kuvua mumanye disua dia Nzambi to. Nunku mmunyi muuvua mua kuikala ne nsombelu mumvuangane bimpe ne disua diende? Ke bualu kayi dinyingalala bua mibi yebe didi ne mushinga.

13Dikudimuna mutshima anyi ‘diandamuka’ didi ne bua kulonda dinyingalala. Kunyingalala patupu ki nkukumbane to. Udi ne bua kulekela nsombelu webe wa kale ne kudisuika ne muoyo umue bua kuenza malu mimpe. Nunku kumpala kua kutambula, udi ne bua kunyingalala bua malu ebe mabi ne kukudimuna mutshima webe.

KUDILAMBULA

14 Udi ne bua kuenza bualu bukuabu bunene kumpala kua wewe kutambula. Udi ne bua kudilambula kudi Yehowa Nzambi.

15 Paudi udilambula kudi Yehowa Nzambi mu disambila dienza ne muoyo mujima, udi umulaya bua kumulamata anu yeye nkayende bua kashidi. (Dutelonome 6:15) Kadi bua tshinyi muntu udi mua kujinga bua kulua mupika wa Nzambi? Tuangatabi tshilejilu: Nsongalume kampanda udi ubangila nsongakaji. Padiye wenda umulonga ne umona bikadilu biende bilenga, udi umvua dinanga diende bua nsongakaji eu didiunda bikole. Ndekelu wa bionso, neamulombe bua kumusela. Bushuwa, nansha mudi kusela nsongakaji eu kumulomba bua kuambula majitu makuabu, dinanga nedimusake anu bua kumusela.

16 Bia muomumue, paudi umanya Yehowa ne ufika ku dimunanga, udi umvua bua kumuenzela mudimu ne muoyo webe mujima, kuyi udielela mikalu bua kumutendelela to. Muntu yonso udi musue kulonda Yezu Kristo Muana wa Nzambi udi ne bua ‘kudipidia.’ (Mâko 8:34) Tudi tudipidia patudi katuyi tulekela majinga ne bipatshila bietu bitupangisha bua kutumikila Nzambi ne muoyo mujima. Nunku kumpala kua wewe kutambula, kuenza disua dia Nzambi kudi ne bua kuikala tshipatshila tshiebe tshitambe bunene.—1 Petelo 4:2.

KUTSHINYI BUA KUDILAMBULA TO!

17 Bantu bakuabu batu belakana bua kudilambula kudi Yehowa bualu badi batshina. Badi mua kutshina bua Nzambi kabalumbuluishi mutuye wenza bua bena Kristo badilambule. Bu mudibu batshina bua kubenga kukumbaja mutshipu wabu ne babenga kunyingalaja Yehowa, badi bela meji ne: ki mbimpe kudilambula kudiye to.

18 Kadi paudi ulonga bua kunanga Yehowa, neujinge bua kudilambula kudiye ne newenze muebe muonso bua kukumbaja mutshipu webe. (Muambi 5:4) Wewe mumane kudilambula neujinge bushuwa kuikala ne ‘bienzedi bidi biakanangane ne Yehowa ku dimusankisha dionso.’ (Kolosai 1:10) Bu muudi munange Nzambi, kuakumona ne: mbikole bua kuenza disua diende to. Kakuyi mpata, newitabe mêyi a mupostolo Yone aa: ‘Edi ndinanga dia Nzambi, bua tuetu tutumikile mikenji yende; ne mikenji yende kayena itunemena bujitu.’—1 Yone 5:3.

19 Kabiena bilomba kuikala mupuangane bua kudilambula kudi Nzambi to. Yehowa mmumanye mikalu yebe, ne kêna mua kukulomba bua kuenza malu adi makupite makanda to. (Musambu 103:14) Mmusue bua ukumbaje mutshipu webe ne neakukuatshishe, neakuambuluishe. (Yeshaya 41:10) Wikale mushindike ne: wewe mueyemene Yehowa ne muoyo webe mujima, ‘neakululamijile njila yebe.’—Nsumuinu 3:5, 6.

ULEJE DIDILAMBULA DIEBE PA KUTAMBULA

20 Kuelela meji pa malu atudi tufuma ku dimona aa kudi mua kukuambuluisha bua kudilambula kudi Yehowa mu disambila pa nkayebe. Muntu yonso udi munange Nzambi bulelela udi kabidi ne bua ‘kujikula ne mukana bua kupeta lupandu.’ (Lomo 10:10) Mmunyi muudi mua kuenza nunku?

Ukadi mudilambule kudi Nzambi mu disambila anyi?

Nsongalume usambila

21 Umanyishe mutangidi-muludiki wa tshisumbu tshienu ne: udi musue kutambula. Nealongolole bua bamue bakulu bakonkonone nebe nkonko idi itangila malongesha manene a mu Bible. Bikala bakulu aba bamone ne: udi mukumbane, nebakuambile ne: udi mua kutambula padi mushindu umueneka.* Kumpala kua kutambuisha bantu, batu babenzela muyuki udi uleja tshidi batismo umvuija. Pashishe, ngamba-malu utu ulomba bantu badi basue kutambula bua kuandamuna nkonko ibidi mipepele bu mushindu wa ‘kujikula ne mukana’ ditabuja diabu.

22 Batismo ke udi uleja patoke ne: ukadi mudilambule kudi Nzambi ne udi mpindieu Ntemu wa Yehowa. Batu bina muntu udi utambula yeye yonso mu mâyi bua kuleja patoke ne: mmudilambule kudi Yehowa.

DIUMVUIJA DIA BATISMO WEBE

23 Yezu wakamba ne: bayidi bende bavua ne bua kutambula ‘mu dîna dia Tatu ne mu dia Muana ne mu dia nyuma muimpe.’ (Matayo 28:19) Bidi biumvuija ne: muntu udi utambula udi witaba bumfumu bua Yehowa Nzambi ne bua Yezu Kristo. (Musambu 83:18; Matayo 28:18) Udi kabidi witaba mudimu wa nyuma muimpe anyi bukole buenzeji bua Nzambi.—Galatia 5:22, 23; 2 Petelo 1:21.

Batismo udi umvuija kulekela nsombelu webe wa kale ne kutuadija mupiamupia bua kuenza anu disua dia Nzambi

Batambuisha nsongalume

24 Kadi, batismo ki ndibuela mu mâyi patupu to. Mbualu bua mushinga mukole menemene. Kuya muinshi mua mâyi kudi kumvuija ne: udi ulekela nsombelu webe wa kale. Padibu bakujula mu mâyi bidi bileja ne: udi utuadija nsombelu mupiamupia bua kuenza anu disua dia Nzambi. Kupu muoyo ne: udi mudilambule anu kudi Yehowa Nzambi nkayende; kuena mudilambule kudi mudimu anyi bualu kampanda to, kuena mudilambule kudi bantu bakuabu anyi bulongolodi kansanga to. Didilambula ne batismo webe bidi ntuadijilu wa bulunda bukole ne Nzambi, mbuena kuamba ne: didia nende malanda mashême.—Musambu 25:14.

25 Batismo katu upesha muntu lupandu to. Mupostolo Paulo wakafunda ne: ‘Nudienzeje bua kushikija lupandu luenu ne ditshina ne dizakala.’ (Filipoi 2:12) Batismo udi anu ntuadijilu patupu. Mpindieu, lukonko lua mushinga ludi ne: Mmunyi muudi mua kushala mu dinanga dia Nzambi? Nshapita wetu wa ndekelu neandamune lukonko elu.

TSHITU BIBLE ULONGESHA

  • Batismo wa bena Kristo udi ulomba kuina muntu mujima mu mâyi, ki nkumumiamina mâyi patupu to.—Matayo 3:16.
  • Bua kutambula bidi bikengela: kupeta dimanya, kuleja ditabuja, kunyingalala bua mibi, kukudimuna mutshima ne kudilambula kudi Nzambi.—Yone 17:3; Bienzedi 3:19; 18:8.
  • Bua kudilambula kudi Yehowa, udi ne bua kudipidia anu bu muvua bantu badipidie bua kulonda Yezu.—Mâko 8:34.
  • Batismo udi umvuija kulekela nsombelu webe wa kale ne kutuadija mupiamupia bua kuenza anu disua dia Nzambi.—1 Petelo 4:2.

*  Pa tshibidilu, batu batambuisha bantu mu mpuilu ne mu mpungilu itu Bantemu ba Yehowa benza tshidimu tshionso.


Nkonko ya dilonga

1. Bua tshinyi muena Etiopia kampanda wakalomba bua kutambula?

2. Bua tshinyi udi ne bua kuela meji bikole bua kutambula?

3. (a) Ndîyi kayi divua Yezu mutumine bayidi bende? (b) Mmunyi mudibu ne bua kutambuisha bantu?

4. Batismo wa mu mâyi utu uleja tshinyi?

5. (a) Mbualu kayi bua kumpala buudi ne bua kuenza bua kutambula? (b) Bisangilu bia tshisumbu bidi ne mushinga kayi?

6. Udi ne bua kuikala ne dimanya dia mushindu kayi bua wewe kutambula?

7. Dilonga dia Bible didi ne bua kukuenzela tshinyi?

8. Ntshinyi tshiakusaka bua kuambila bakuabu malu audi mulonge?

9, 10. (a) Udi mua kutuadija kuambila banganyi malongesha a mu Bible? (b) Udi ne bua kuenza tshinyi wewe musue kuyisha pamue ne Bantemu ba Yehowa?

11. Bantu bakuabu badi mua kuanji kulekela malu kayi kumpala kua kuyisha?

12. Bua tshinyi dinyingalala didi ne mushinga?

13. Dikudimuna mutshima ntshinyi?

14. Mbualu kayi bunene buudi ne bua kuenza kumpala kua kutambula?

15, 16. Kudilambula kudi Nzambi kudi kumvuija tshinyi? Ntshinyi tshidi tshisaka muntu bua kudilambula?

17. Bua tshinyi bantu bakuabu batu batshina bua kudilambula kudi Nzambi?

18. Ntshinyi tshidi mua kukusaka bua kudilambula kudi Yehowa?

19. Bua tshinyi kuena mua kutshina bua kudilambula kudi Nzambi?

20. Bua tshinyi didilambula kudi Yehowa kadiena ne bua kushala anu bualu buebe nkayebe?

21, 22. Mmunyi muudi mua ‘kujikula’ ditabuja diebe patoke?

23. Kutambula ‘mu dîna dia Tatu ne mu dia Muana ne mu dia nyuma muimpe’ kudi kumvuija tshinyi?

24, 25. (a) Batismo utu umvuija tshinyi? (b) Ndukonko kayi lutuandamuna?