Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible utu ulongesha tshinyi menemene?

TSHISAKIDILA

“Babulona Munene” nnganyi?

“Babulona Munene” nnganyi?

MUKANDA wa Buakabuluibua udi ne imue miaku ya mu tshimfuanyi. (Buakabuluibua 1:1) Tshilejilu, udi wakula bua muntu mukaji udi ne dîna dia “Babulona Munene” difunda pa mpala pende. Bible udi wamba ne: mmusombe pa ‘bisumbu bia bantu ne bisamba.’ (Buakabuluibua 17:1, 5, 15) Bu mudi muntu mukaji wetu eu kayi mua kuenza malu aa, Babulona Munene mmukaji wa mu tshimfuanyi. Kadi ndumba eu udi umvuija tshinyi?

Mu Buakabuluibua 17:18 badi kabidi babikila muntu mukaji eu ne: ‘musoko munene udi ukokesha ku mutu kua bakalenge ba pa buloba.’ Muaku “musoko” udi uleja tshisumbu tshia bantu tshilongolola bimpe. Bu mudi “musoko munene” ukokesha ‘bakalenge ba pa buloba,’ Babulona Munene udi ne tshia kuikala tshisumbu kampanda tshidi pa buloba bujima. Nunku badi mua kutshibikila ne: bukokeshi bua pa buloba bujima. Kadi mbukokeshi bua mushindu kayi? Mbukokeshi bua malu a nzambi. Amue malu adi mu mukanda wa Buakabuluibua ke adi atujadikila bualu ebu.

Bukokeshi budi mua kuikala bua malu a tshididi, a bungenda anyi a nzambi. Babulona Munene ki mbukokeshi bua malu a tshididi to, bualu Bible udi wamba ne: ‘bakalenge ba pa buloba’ anyi bena malu a tshididi badi ‘benda nende masandi.’ Bundumba ebu ke malanda adiye mudie ne bamfumu ba pa buloba ne ke bua tshinyi badi bamubikila ne: ndumba munene.—Buakabuluibua 17:1, 2; Yakobo 4:4.

Babulona Munene ki mbukokeshi bua malu a bungenda to, bualu ‘bangenda-mushinga’ nebadile pamushipabu. Bible udi uleja mudi bakalenge ne bangenda batangidila Babulona Munene ‘pa bule.’ (Buakabuluibua 18:3, 9, 10, 15-17) Ke bualu kayi tudi mua kuamba ne: Babulona Munene ki ntshisumbu tshia malu a tshididi anyi a bungenda to, kadi ntshia malu a nzambi.

Bu mudi Bible wamba ne: Babulona Munene udi upambuisha bantu ne “malu a majimbu,” bidi bileja mudiye tshisumbu tshia malu a nzambi. (Buakabuluibua 18:23, MMV) Bu mudi malu a majimbu onso mikale a bademon, Bible udi ubikila Babulona Munene ne: “muaba wa bademon.” (Buakabuluibua 18:2; Dutelonome 18:10-12) Badi baleja kabidi mudiye uluisha tshitendelelu tshilelela bualu udi ukengesha “baprofete” ne ‘bansantu.’ (Buakabuluibua 18:24) Bua kuleja mudi Babulona Munene mukine tshitendelelu tshilelela, udi ukengesha bikole ‘bamanyishi ba Yezu’ ne ubashipa. (Buakabuluibua 17:6) Nunku, mamu udibu babikila ne: Babulona Munene udi nsangilu wa bitendelelu bionso bia dishima bia pa buloba bujima bidi biluisha Yehowa Nzambi.

← Tangila nshapita