Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Semena pabuipi ne Yehowa

Mêyi a mbangilu

Mêyi a mbangilu

Mubadi musuibue,

Utuku udiumvua pabuipi ne Nzambi anyi? Bantu ba bungi batu bamona bu ne: kabiena mua kuenzeka to. Bamue batu batshina bela meji ne: Nzambi udi kule be; bakuabu kabena batekemena ne: badi mua kukumbana bua kusemena pabuipi ne Nzambi nansha. Kadi Bible udi utulomba ne: “Semenayi pabuipi ne Nzambi ne yeye neasemene pabuipi nenu.” (Yakobo 4:8) Nzambi udi kabidi ujadikila batendeledi bende ne: ‘Meme, Yehowa Nzambi webe, nenkukuate ku tshianza tshiebe tshia balume, nkuambila ne: Kutshinyi, nenkukuatshishe.’Yeshaya 41:13.

Mmunyi mutudi mua kufika ku didia malanda masheme ne Nzambi? Bulunda buonso bututu tudia ne muntu butu bubangila ku dimanya tshidiye, ku dimunemeka ne ku dianyisha ngikadilu idiye nayi. Nunku ngikadilu ya Nzambi ne bienzedi biende anu mudibi bileja mu Bible mmalu a mushinga atudi mua kulonga. Tuetu tuelangana meji a mudi Yehowa uleja ngikadilu yende, tukeba kumanya muvua Yezu Kristo muyileje bimpe menemene ne bumvue mutudi petu mua kuyipeta, nebituambuluishe bua kusemena pabuipi ne Nzambi menemene. Netumone ne: Yehowa udi ne bukenji ne mmukumbane bua kuikala Mukalenge Mutambe Bunene wa diulu ne buloba. Udi kabidi Tatu utudi nende bonso dijinga. Udi ne bukole ne buakane ne meji ne dinanga, katu ulekela bana bende badi bamulamate to.

Mukanda eu ukuambuluishaku bua kusemena pabuipi menemene ne Yehowa Nzambi, kudia nende bulunda budi kabuyi mua kufua bua ushale ne muoyo tshiendelele umutumbisha.

Bapatudi