Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Lumu Luimpe Lua Kudi Nzambi!

 DILONGESHA DIA 2

Nzambi nnganyi?

Nzambi nnganyi?

1. Tudi ne bua kutendelela Nzambi bua tshinyi?

Nzambi mulelela ke Nzambi utu mufuke bintu bionso. Kena ne tshibangidilu, kena ne ndekelu. (Musambu 90:2) Lumu luimpe ludi mu Bible ludi lufumina kudiye. (1 Timote 1:11) Bu mudi Nzambi ke udi mutupeshe muoyo, tudi ne bua kumutendelela anu yeye.Bala Buakabuluibua 4:11.

2. Nzambi utu mushindu kayi?

Muntu nansha umue katu muanji kumona Nzambi to, bualu udi Nyuma; mmumue ne: mmuntu udi mutupite tuetu bantu kule ne kule. (Yone 1:18; 4:24) Nansha nanku, tudi tumuenena ngikadilu ya Nzambi ku bintu bidiye mufuke. Tshilejilu, patudi tutangila mishindu mishilashilangane ya bimuma ne bilongo bidiye mufuke, tudi tumona ne: udi ne dinanga ne meji. Bunene bua diulu ne buloba budi buleja bukole budi nabu Nzambi.Bala Lomo 1:20.

Tuetu tubala Bible, tudi kabidi mua kumanya ngikadilu mikuabu ya Nzambi. Tshilejilu, Bible udi utuambila malu atu Nzambi musue ne atuye kayi musue, mutuye wenzela bantu malu ne mutuye umvua bua malu atu bantu benza.Bala Musambu wa 103:7-10.

3. Nzambi utuku ne dîna anyi?

Yezu wakamba ne: ‘Tatu wetu udi mu diulu, Dîna diebe ditumbe.’ (Matayi 6:9MMM) Nansha mudi Nzambi ne mianzu ya bungi, udi ne dîna anu dimue. Batu badibikila bilondeshile muakulu ne muakulu. Mu Tshiluba, batu babikila ne: “Yehowa.” Kadi bamue bantu batu babikila ne: “Yawe.”Bala Yeshaya 42:8.

Mu Bible ya bungi mbumbushe dîna dia Nzambi, bapingaje mêna a tshianana anyi mianzu, bu mudi: Maweja, Mvidi Mukulu, Mukalenge, Maweja-Nangila anyi Mfumu. Kadi pavuabu bafunde Bible, dîna dia Nzambi divuamu misangu  mitue ku 7000. Yezu wakamanyisha bantu dîna dia Nzambi pavuaye ubalongesha.Bala Yone 17:26.

4. Yehowa utuku utuelela meji anyi?

Anu bu tatu udi ne dinanga eu, ntatu yetu itu isama Nzambi ku muoyo

Bu mudi makenga enda avulangana, bidiku bileja ne: Nzambi kena utangila malu etu anyi? Bamue bantu badi bela meji ne: Nzambi udi utukengesha bua kututeta, kadi ki mmuomu to.Bala Yakobo 1:13.

Nzambi mmutue yonso wa kutudi mushinga bualu mmutupeshe tshipedi tshia kudisunguila malu. Katuenaku mua kusanka bua mutudi ne budikadidi bua kusungula bua kuenzela Nzambi mudimu anyi? (Yoshua 24:15) Kadi bantu ba bungi badi basungula bua kuenzela bakuabu malu mabi, ke bualu kayi makenga mmavulangane. Patu Yehowa umona malu mabi a nunku, bitu bimunyingalaja bikole.Bala Genese 6:5, 6.

Yehowa utu netu ku muoyo. Mmusue bua tuikale amu ne disanka. Ukadi pa kujikija makenga ne kubutula bantu badi baakebesha. Kadi Yehowa mmumanye tshidiye muanji kulekeela makenga. Dilonga dia 8 nediumvuije bua tshinyi mmulekele makenga.Bala 2 Petelo 2:9; 3:7, 13.

5. Mmushindu kayi utudi mua kusemena pabuipi ne Nzambi?

Yehowa udi utulomba bua tuetu kumusambila bua kumona mua kusemena pabuipi nende. Udi utangila malu a muntu ne muntu. (Musambu 65:2; 145:18) Utu musue kutubuikidila mibi yetu. Udi umona mutudi tudienzeja bua kumusankisha, nansha mututu imue misangu tumunyingalaja. Nunku, nansha mutudi bena mibi, tudi mua kulua balunda banene ba Nzambi.Bala Musambu wa 103:12-14; Yakobo 4:8.

Bu mudi Yehowa ke udi mutupeshe muoyo, yeye ke utudi ne bua kunanga bikole kupita muntu kayi yonso. (Mâko 12:30) Paudi ulonga malu a Nzambi ne wenza tshidiye ukulomba, udi uleja ne: udi munange Nzambi. Ke tshiakuambuluisha bua kusemena pabuipi nende.Bala 1 Timote 2:4; 1 Yone 5:3.