Ndaku munda

Ndaku ku tshikebelu

Bantemu ba Yehowa

Sungula muakulu Tshiluba

 DILONGESHA DIA 9

Nudi mua kupeta disanka mu dîku mushindu kayi?

Nudi mua kupeta disanka mu dîku mushindu kayi?

1. Bua tshinyi mbimpe kufundisha dibaka kua mbulamatadi?

Lumu luimpe ludi lufumina kudi Yehowa, Nzambi wa disanka. Mmusue bua mêku onso ikale ne disanka. (1 Timote 1:11) Yeye ke wakafuka dibaka. Bidi bikengela kufundisha dibaka kua mbulamatadi, bua dîku dikale ne disanka. Bualu kuya kua mbulamatadi, nekuambuluishe mulume ne mukaji bua kukolesha bana bimpe, ne bua kudiumvua mu bukubi.

Nzambi utu wangata dibaka mushindu kayi? Utu musue bua mulume ne mukaji bashale mu dibaka bua kashidi. Bena Kristo badi ne bua kutumikila mikenji ya mbulamatadi idi ilomba bua kufundisha dibaka. (Luka 2:1, 4, 5) Yehowa mmusue bua bena dibaka bashale balamatangane. (Ebelu 13:4) Yehowa utu mukine dishipa dia dibaka. (Malaki 2:16) Kadi utu muanyishe bua muena Kristo kushipa dibaka ne kubuela mu dikuabu, anu padi muena dibaka nende muende bundumba.Bala Matayi 19:3-6, 9.

2. Mulume ne mukaji badi ne bua kuenzelangana malu mushindu kayi?

Yehowa mmufuke mulume ne mukaji bua bikale bambuluishangana mu dibaka. (Genese 2:18) Mulume ke mfumu wa dîku. Nunku yeye ke udi ne mudimu wa kukebela bena mu dîku diende bintu bidibu nabi dijinga, ne kubalongesha malu a Nzambi. Udi ne bua kunanga mukajende, kudipangisha ne amue malu. Mulume ne mukaji badi ne bua kunangangana ne kunemekangana. Bu mudi balume ne bakaji bonso bikale bena mibi, bobu bamanye mua kufuilangana luse, nebikale ne disanka mu dibaka.Bala Efeso 4:31, 32; 5:22-25, 33; 1 Petelo 3:7.

 3. Kumbuka ku dibaka didi ne bilumbu nkuimpe anyi?

Nuenu ne bilumbu mu dibaka, nuditatshishe bua kuenzelangana malu ne dinanga. (1 Kolinto 13:4, 5) Bible kena ulomba bena dibaka bua kutapulukangana bua kujikija bilumbu bitu bijuka mu dibaka to.Bala 1 Kolinto 7:10-13.

4. Nuenu bana, Nzambi mmusue bua nuikale mushindu kayi?

Yehowa mmusue bua nuikale ne disanka. Mmunupeshe mibelu mimpe ya mushindu wa kuikala ne disanka mu bunsonga buenu. Mmusue bua baledi benu banuambuluishe ne meji ne dimanya didibu nadi. (Kolosayi 3:20) Yehowa ke Mufuki wenu. Mmusue kabidi bua nuikale ne disanka dia kumuenzela yeye ne muanende Yezu Kristo mudimu.Bala Muambi 11:9–12:1; Matayi 19:13-15; 21:15, 16.

5. Baledi wetu, nudi mua kuenza tshinyi bua kupetesha bana benu disanka?

Nudi ne bua kuenza mudimu mukole bua kukebela bana benu biakudia, ne bia kuvuala ne muaba wa kulala. (1 Timote 5:8) Kadi bua bana benu kupetabu disanka, nudi kabidi ne bua kubalongesha bua banange Nzambi, ne bikale balonga malu ende. (Efeso 6:4) Nuenu banange Nzambi, bidi mua kusaka bana benu bua kumunangabu pabu. Wewe ubela muanebe muimanyine pa Dîyi dia Nzambi, udi mua kupeta meji mimpe.Bala Dutelonome 6:4-7; Nsumuinu 22:6.

Wewe ukankamija bana bebe ne ubela kalumbandi, nebibambuluishe bikole. Udi kabidi ne bua kubabela ne kubapesha dinyoka. Wewe wenza nunku, neubepule ku malu adi mua kubanyangila disanka. (Nsumuinu 22:15) Kadi, ki mbimpe kubanyoka ne tshikisu to.Bala Kolosayi 3:21.

Bantemu ba Yehowa batu bapatula mikanda mivule bua kuambuluisha baledi ne bana. Malu adi mu mikanda eyi atu afumina mu Bible.Bala Musambu wa 19:7, 11.