Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Lumu Luimpe Lua Kudi Nzambi!

 DILONGESHA DIA 11

Mêyi manene a mu Bible adi atuambuluisha mushindu kayi?

Mêyi manene a mu Bible adi atuambuluisha mushindu kayi?

1. Tudi dijinga ne mêyi manene a mu Bible bua tshinyi?

Mmushindu kayi udi mêyi manene a mu Bible atusaka bua kuepuka njiwu?MUSAMBU 36:9.

Mufuki wetu udi ne meji a bungi kutupita. Bu mudiye Tatu muimpe, mutunange bikole, katu utupua muoyo to. Kavua musue bua tuikale tudienzela malu katuyi tumuebeja to. (Yelemiya 10:23) Tuetu bonso tudi tujinga ne: Nzambi atulombole, anu bu mutu muana mukese ujinga bua baledi bende bamulombole. (Yeshaya 48:17, 18) Mêyi manene a mu Bible adi atuludika bualu ndipa didi difumine kudi Nzambi.Bala 2 Timote 3:16.

Mikenji ya Yehowa ne mêyi manene ende bidi bituambuluisha bua kuikala ne nsombelu mutambe buimpe mpindieu. Bidi kabidi bituleja mutudi mua kupeta masanka a kashidi mu matuku atshilualua. Bu mudi Nzambi ke udi mutufuke, mbimpe tuikale ne dianyisha bua mudiye utulombola, tuikale kabidi ne disanka dia kutumikila mikenji ne mêyi manene ende.Bala Musambu wa 19:7, 11; Buakabuluibua 4:11.

2. Mêyi manene a mu Bible ntshinyi?

Mêyi manene a mu Bible, mmalu malelela a nshindamenu. Mikenji yoyi, idi itangila nsombelu kampanda misunguluke. (Dutelonome 22:8) Tudi ne bua kuela meji bikole bua kumona mutudi mua kutumikila dîyi dinene kampanda mu nsombelu kansanga. (Nsumuinu 2:10-12) Tshilejilu, Bible udi wamba ne: Nzambi ke udi mutupeshe muoyo. Dîyi dinene edi didi mua kutuambuluisha patudi ku mudimu, ku nzubu anyi mu luendu. Didi ditusaka bua kubenga kuteka muoyo wetu anyi wa bakuabu mu njiwu.Bala Bienzedi 17:28.

3. Mmêyi manene kayi abidi adi mapite makuabu?

Yezu wakakula bua mêyi manene abidi adi ne mushinga wa bungi. Dia kumpala didi dileja  ne: bantu badi ne muoyo bua kumanya Nzambi, kumunanga ne kumuenzela mudimu ne muoyo mujima. Tudi ne bua kuvuluka dîyi edi dîba dionso ditudi basue kuenza bualu. (Nsumuinu 3:6) Bantu badi batumikila dîyi edi badi balua balunda ba Nzambi, bapeta disanka dilelela, bashala bindile kabidi muoyo wa tshiendelele.Bala Matayi 22:36-38.

Dîyi dinene dibidi didi dituambuluisha bua kusomba mu ditalala ne bakuabu. (1 Kolinto 13:4-7) Tudi tutumikila dîyi edi patudi tuenzela bantu malu anu mutu Nzambi ubenzelawu.Bala Matayi 7:12; 22:39, 40.

4. Mêyi manene a mu Bible adi atuambuluisha mushindu kayi?

Mêyi manene a mu Bible adi ambuluisha bena mu mêku bua kunangangana ne kuikala mu buobumue. (Kolosayi 3:12-14) Dîyi dia Nzambi didi kabidi diambuluisha mêku bualu didi dilongesha dîyi dinene dikuabu edi: dibaka didi ne bua kushala kashidi.Bala Genese 2:24.

Kutumikila mibelu ya mu Bible kudi kutulama mu nsombelu wetu, kutuepula ku tunyinganyinga. Tshilejilu, bamfumu ba midimu ba bungi batu bakeba bena mudimu badi ne bululame ne benza mudimu ne disuminyina, anu bu mudi Bible wamba. (Nsumuinu 10:4, 26; Ebelu 13:18) Bible udi kabidi utuambila bua tusanke ne bintu bitudi nabi, bua tuteke malanda atudi badie ne Nzambi ku mutu kua dikeba bintu bia ku mubidi.Bala Matayi 6:24, 25, 33; 1 Timote 6:8-10.

Kutumikila mibelu ya Nzambi kudi kutuambuluisha bua kulama makanda etu a mubidi. (Nsumuinu 14:30; 22:24, 25) Tshilejilu, kutumikila mukenji wa Nzambi udi ukandika dikuatshika dia maluvu, kudi kutuepula ku masama ne ku njiwu. (Nsumuinu 23:20) Yehowa ki mmutukandike bua kunua maluvu pa nnuinu to. (Musambu 104:15; 1 Kolinto 6:10) Mêyi manene a Nzambi adi atuambuluisha kabidi, bualu adi atulomba bua kutangila bienzedi bietu ne meji etu bimpe. (Musambu 119:97-100) Bena Kristo balelela kabena batumikila mibelu ya Nzambi anu bualu idi ibambuluisha to. Kadi, badi bayitumikila bualu mbasue kutumbisha Yehowa.Bala Matayi 5:14-16.