Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Lumu Luimpe Lua Kudi Nzambi!

 DILONGESHA DIA 13

Kudi lumu luimpe bua bitendelelu anyi?

Kudi lumu luimpe bua bitendelelu anyi?

1. Bitendelelu bionso mbilelela anyi?

Mu bitendelelu bionso mutu bamue bantu batu basue kumanya Nzambi mulelela. Lumu luimpe ludi ne: Nzambi udi umona bantu aba, udi uditatshisha bua bualu buabu. Kadi bualu bua dikema, bitendelelu mbilue tshiamu tshia mudimu tshia kuenza natshi malu mabi. (2 Kolinto 4:3, 4; 11:13-15) Bilondeshile malu a ku bisanji ne a mu bikandakanda, badi baleja ne: bimue bitendelelu mbiditue mu malu aa: tshinyangu, dishipa bena bisamba bikuabu, mvita ne dikuata bana ku bukole bua kubanyanga. Malu aa atu anyingalaja bikole bantu badi banange Nzambi ne muoyo umue.Bala Matayi 24:3-5, 11, 12.

Padi tshitendelelu tshilelela tshitumbisha Nzambi, tshia dishima tshiotshi tshidi tshimunyingalaja, bualu tshidi tshilongesha malu adi kaayi mu Bible to. Tshilejilu: malu a dishima bua Nzambi ne bua bantu bakadi bafue. Kadi Yehowa utu musue bua bantu bamumanye bimpe.Bala Yehezekele 18:4; 1 Timote 2:3-5.

2. Kudi lumu luimpe bua bitendelelu anyi?

Bualu buimpe budi ne: tshitendelelu tshidi tshileja muditshi tshinange Nzambi, eku tshinange bulongolodi bua Satana, katshiena mua kushima Nzambi to. (Yakobo 4:4) Bible udi ubikila bitendelelu bionso bia dishima ne: “Babilona Munene.” Babilona ntshimenga tshia kale muvua ntendelelu wa dishima mutuadijile kunyima kua Mvula wa kabutu wa mu matuku a Noa. Mu katupa kîpi emu, Nzambi neabutule bitendelelu bidi bishimakaja bantu ne bibakengesha.Bala Buakabuluibua 17:1, 2, 5, 16, 17; 18:8.

Kudi lumu luimpe lukuabu. Yehowa ki mmupue muoyo bantu bonso badi basue kumumanya, kadi batshidi mu ntendelelu ya dishima to. Udi wenda ubalongesha bulelela bua kubasangisha kaba kamue.Bala Mika 4:2, 5.

 3. Bantu badi banange bulelela badi ne bua kuenza tshinyi?

Tshitendelelu tshilelela tshitu tshisangisha bantu pamue

Yehowa udi ulama bantu badi banange malu malelela. Udi ubalomba bua kupatuka mu nzambi ya dishima. Bantu badi banange Yehowa badi bitaba bua kulekela malu mabi anu bua kumusankisha.Bala Buakabuluibua 18:4.

Bantu bavua banange bulelela mu bidimu lukama bia kumpala bakateleja bapostolo pavuabu babambila lumu luimpe, bobu kuluitaba ne disanka. Yehowa wakabalongesha mua kuikala ne nsombelu mupiamupia, nsombelu wa disanka, kumanyabu bua tshinyi bavua ne muoyo, kumanyabu kabidi malu malenga avua mabindile kumpala. Mbatushile tshilejilu tshimpe, bualu bakitaba lumu luimpe, bobu kuteka Yehowa pa muaba wa kumpala mu malu abu onso.Bala 1 Tesalonike 1:8, 9; 2:13.

Yehowa udi ne dîku dienza ne batendeledi bende. Udi wakidilamu bantu bonso badi bapatuka mu nzambi ya dishima. Udi ukubikila pebe; wewe muitabe, neulue mulunda wende, neubuele mu dîku dipiadipia dia bantu badi bamuenzela mudimu. Ndekelu wa bionso, neupete muoyo wa tshiendelele.Bala Mâko 10:29, 30; 2 Kolinto 6:17, 18.

4. Nzambi neenzele bantu ba mu matunga onso malu mimpe kayi?

Bitendelelu bia dishima bionso bikadi pa kufua. Ki ndumu luimpe anyi? Eyowa! Nenku bantu ba pa buloba bujima nebapatuke mu bupika. Bitendelelu bia dishima kabiakushima bantu ne kubatapulula kabidi to. Bantu bonso bashala ne muoyo nebatendelele anu Nzambi umuepele mulelela, mu buobumue.Bala Buakabuluibua 18:20, 21; 21:3, 4.