Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Mabeji a tshisangilu tshia Nsombelu ne mudimu wetu wa buena Kristo  |  Ngondo wa 10 2017

 TUIKALAYI NE NSOMBELU WA BUENA KRISTO

Tshia kuenza bua kulua mulongi wa Bible wa tshisumi

Tshia kuenza bua kulua mulongi wa Bible wa tshisumi

Udi musue kuikala ne lulamatu mu mateta anu bu muvua Danyele anyi? Danyele uvua ulonga Dîyi dia Nzambi ne tshisumi, ulonga too ne mêyi male a buprofete. (Dan 9:2) Kulonga Dîyi dia Nzambi ne tshisumi kudi mua kukuambuluisha bua kushala ne lulamatu. Mmushindu kayi? Kudi mua kukolesha ditabuja diebe dia ne: milayi ya Yehowa neyikumbane. (Yos 23:14) Kudi kabidi mua kukuambuluisha bua kuvudija dinanga diebe bua Nzambi, diakusaka bua kuenza malu mimpe. (Mis 97:10) Kadi udi ne bua kutuadijila penyi? Konkonona ngenyi idi ilonda eyi.

  • Ndi ne bua kulonga tshinyi? Kulonga bimpe pa tshibidilu kudi kukongoloja kulongolola bisangilu bia tshisumbu. Dibala dia Bible dia lumingu luonso nedikupeteshe masanka a bungi biwikala ukebulula malu audi kuyi umvua. Bualu bukuabu, kudi bantu badi basungule bua kulonga bikole mêyi a buprofete a mu Bible, bibadi bishilashilangane bia dimuma dia nyuma wa Nzambi, ngendu ya bumisionere ya mupostolo Paulo, anyi bifukibua bia Yehowa bidi bimueneka. Lukonko kampanda lua malu a mu Bible luolu lukuvuile mu mutu mund’a munya, lufunda ne wenze bua luikale tshiena-bualu tshia wewe kulonga musangu udi ulonda.

  • Ndi mua kupetela malu a kulonga penyi? Bua kumanya amue malu, tangila filme wa Bintu bia kuenza nabi makebulula bua kupeta bubanji bua mu nyuma. Bua kuteta dimanya diebe, kebulula bua kumanya makalenge a bukole a pa buloba bujima adi maleja kudi nyama mu Danyele nshapita wa 7.

  • Ndi ne bua kulonga mutantshi bule kayi? Kudilongela pa tshibidilu mmuanabu ne makanda a mu nyuma mimpe. Koku mushindu, udi mua kutuadija kulonga mu minite mikese, ne kulua kuyivudija ku kakese ku kakese. Kulonga Dîyi dia Nzambi kudi anu bu kumbula bubanji budi busokome, paudi wenda ubupeta udi wenda upeta kabidi dijinga dia kumbula bikole! (Nsu 2:3-6) Dijinga diebe dia kumanya Dîyi dia Nzambi nedikole, ne neutungunuke ne kudilonga pa tshibidilu.—1Pt 2:2.

NYAMA YA MU DANYELE NSHAPITA WA 7 IDI ILEJA TSHINYI?

LUKONKO LUKUABU:

Danyele 7:8, 24 wakakumbana mushindu kayi?

MU DIDILONGELA DIEBE DIALONDA:

Nyama ya mu Buakabuluibua nshapita wa 13 idi bimfuanyi bia tshinyi?