Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yobo 42:1-17

MALU ADI MU MUKANDA EU

  • Diandamuna didi Yobo upesha Yehowa (1-6)

  • Badi bapisha balunda bende basatu (7-9)

  • Yehowa udi upingaja Yobo muvuaye kale (10-17)

    • Bana ba Yobo balume ne bakaji (13-15)

42  Pashishe Yobo wakandamuna Yehowa ne:   “Mpindieu ndi mumanye ne: udi mukumbane bua kuenza malu onso,Kabidi ne: kakuena bualu buudi wela meji bua kuenza budi mua kukukolela nansha.+   Wewe wakamba ne: ‘Nnganyi au udi ubuitshidija lungenyi luanyi kayi ne dimanya?’+ Nunku, mvua muakule, kadi tshiyi mujingululeMalu adi atamba kunkemesha bikole andi tshiyi mumanye.+   Wewe wakamba ne: ‘Teleja koku, meme nengakule. Nenkuele nkonko, ne wewe ummanyishe.’+   Matshi anyi mmumvue lumu luebe,Kadi mpindieu ndi nkumona ne mêsu anyi.   Ke bualu kayi ndi mpingaja mêyi amvua mupatule,*+Ne ndi nnyingalala bua mpekatu yanyi mu lupuishi ne mu butu.”+  Yehowa mumane kuambila Yobo mêyi aa, Yehowa wakambila Elifaza muena Temana ne: “Tshiji tshianyi tshidi tshikutemena wewe ne balunda bebe babidi,+ bualu kanuena bambe bulelela pa bidi bintangila+ bu mudi muena mudimu wanyi Yobo muambe to.  Mpindieu, angatayi bimpanga bia ngombe muanda mutekete ne bimpanga bia mikoko muanda mutekete, nuye nabi kudi muena mudimu wanyi Yobo, nulambule mulambu wa kuosha bua bualu buenu. Muena mudimu wanyi Yobo neasambile bua bualu buenu.+ Bushuwa nengitabe dilomba diende* dia kubenga kunuenzela malu bilondeshile butshimbakane buenu, bualu kanuena bambe bulelela pa bidi bintangila bu mudi muena mudimu wanyi Yobo muambe.”  Ke Elifaza muena Temana, ne Biledada muena Shuhi, ne Sofâ muena Nâmata kuyabu, kuenzabu tshivua Yehowa mubambile bua kuenza. Nunku Yehowa wakitaba disambila dia Yobo. 10  Yobo mumane kusambila bua balunda bende,+ Yehowa wakumbusha dikenga dia Yobo,+ wakamupingajila bubanji buende.* Yehowa wakamupesha bintu misangu ibidi bipite bivuaye nabi kumpala.+ 11  Bana babu bonso ba balume ne ba bakaji ne balunda bende bonso ba kale+ bakalua kudiye, kudiabu nende biakudia mu nzubu muende. Bakaditeka pa muaba wende, bobu kumusamba bua dikenga dionso divua Yehowa mulekele dimukuata. Yonso wa kudibu wakamupesha dikuta ne kakanu ka or. 12  Nunku Yehowa wakabenesha matuku a ndekelu a muoyo wa Yobo kupita ku ntuadijilu,+ Yobo wakalua kupeta mikoko binunu 14, tumelu 6 000, tusumbu tshinunu tua ngombe ibidi ibidi, ne mpunda mikaji tshinunu.+ 13  Wakalua kupeta kabidi bana bakuabu ba balume muanda mutekete ne bana bakuabu ba bakaji basatu.+ 14  Wakinyika muana wa bakaji wa kumpala ne: Yemima, muibidi ne: Kesia, ne muisatu ne: Kelene-hapuka. 15  Mu ditunga adi dijima kamuvua bakaji balengele bu muvua bana ba bakaji ba Yobo to, ne tatuabu wakabapesha bumpianyi pamue ne bana babu ba balume. 16  Panyima pa malu aa, Yobo wakashala ne muoyo bidimu 140, kumonaye bana bende ne bikulu bende, bipungu binayi. 17  Ndekelu wa bionso Yobo wakafua, yeye mumane kulala matuku a bungi ne musankishibue.*

Note

Anyi “mpingana tshianyima.”
Ku mua.: “Kakuyi mpata, nembanduluje mpala wende.”
Ku mua.: “Yehowa wakakudimuna bupika bua Yobo.”
Ku mua.: “mununu ne muwujibue ne matuku.”