Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yobo 22:1-30

MALU ADI MU MUKANDA EU

  • Muyuki muisatu wa Elifaza (1-30)

    • ‘Muntu udi ne diambuluisha kudi Nzambi anyi?’ (2, 3)

    • Udi ubanda Yobo ne: udi ne lukuka ne kansungansunga (9)

    • ‘Pingana kudi Nzambi, bakupingaje muuvua kale’ (23)

22  Elifaza+ muena Temana wakandamuna ne:   “Muntu udi mua kuikala ne dikuatshisha kudi Nzambi anyi? Muntu udi ne busunguluji udi mua kuikala ne diambuluisha kudiye anyi?+   Wa Bukole Buonso udiku uditatshisha* ne: wewe udi muntu muakane anyi?Peshi yeye udi ne tshidiye upeta bualu wewe udi ulonda njila wa muoyo mutoke+ anyi?   Yeye neakupeshe dinyokaNe neapite nebe ku tshilumbuluidi bua kutshina kuebe kua Nzambi anyi?   Ki mbualu malu mabi ebe mmapite bungiNe bilema biebe kabiena ne ndekelu anyi?+   Bualu wewe udi ukuata bintu bia bana benu bu tshieya kakuyi bualu,Ne udi uvula bantu bilamba biabu, ubashiya butaka.*+   Kuena upesha muntu udi mutshioke mâyi a kunua,Ne udi upala badi ne nzala biakudia.+   Buloba mbua muntu udi ne bukole,+Ne muntu udibu banyishe udi usombapu.   Kadi wewe wakapingaja bakaji bakamba bianza bitupu,Ne wakazaza maboko a bana badi bafuishe batatuabu.* 10  Ke bualu kayi mateyi* mmakunyunguluke,+Ne malu a tshimpitshimpi adi enzangana buôwa bukole adi akutshinyisha; 11  Ke bualu kayi kudi mîdima mikole ne kuena mua kumona,Mâyi a bungi adi akubuikila. 12  Nzambi kena mu miaba mitumbuke ya mu diulu anyi? Tangila mudi mitoto yonso mikale muulu mule. 13  Kadi wewe wakamba ne: ‘Ntshinyi tshidi Nzambi mumanye menemene? Udi mua kulumbuluishilangana mu mifitu mikole anyi? 14  Matutu mmamujike, nunku kena umonaPadiye wendakana pa mutu pa diulu padi pavungamane.’* 15  Neulonde njila wa kale kaleWakendela bantu babi, 16  Bantu badibu babakule* kumpala kua dîba diabu,Bena tshishimikidi tshivuabu bapuekeshe kudi mâyi a bungi mapasalale* anyi?+ 17  Bavua bambila Nzambi mulelela ne: ‘Tulekela!’ Kabidi ne: ‘Ntshinyi tshidi Wa Bukole Buonso mua kutuenzela?’ 18  Pende yeye ke Eu uvua muwuje nzubu yabu ne bintu bilenga. (Lungenyi lubi lua mushindu eu ludi kule ne luanyi.) 19  Bantu bakane nebamone bualu ebu, nebasanke,Ne badi kabayi ne bualu nebabaseke, bamba ne: 20  ‘Baluishi betu mbabutudibue,Ne kapia nekashidishe bishadile biabu.’ 21  Longa bua kumumanya Yeye, ne newikale mu ditalala;Nunku bintu bilenga nebilue kuudi. 22  Itaba mukenji wa mukana muende,Ne lama mêyi ende mu muoyo webe.+ 23  Wewe mupingane kudi Wa Bukole Buonso, nebakupingaje muuvua kale;+Wewe mumbushe malu mabi mu ntenta webe, 24  Wewe muele or* webe mu lupuishiNe or wa ku Ofî+ mu bipongopongo* bia mabue, 25  Nunku Wa Bukole Buonso nealue or* webe,Ne neikale arjan webe wa mushinga mukole. 26  Bualu dîba adi disanka diebe nedikale mu Wa Bukole Buonso,Ne neubandishe mpala webe kudi Nzambi. 27  Neumutendekene, ne yeye neakuteleje;Mitshipu yebe wewe neuyikumbaje. 28  Bualu buonso buwapangadija bua kuenza nebukumbane,Ne bukenke nebutokeshe mu njila webe. 29  Bualu neupuekeshibue milongo paudi wakula ne diambu,Kadi yeye neapandishe bena budipuekeshi.* 30  Neasungile badi kabayi ne bualu;Nunku bikala bianza biebe bikezuke, neusungidibue bushuwa.”

Note

Anyi “Bidiku bisankisha Wa Bukole Buonso.”
Ku mua.: “uvula bilamba bia badi butaka.”
Anyi “a bana ba nshiya.”
Ku mua.: “mateyi a nyunyi.”
Anyi “penze tshijengu.”
Anyi “bavuabu bipidije mioyo yabu.”
Ku mua.: “musulu.”
Anyi “tubulu tua or.”
Anyi “tusulu tua tshilonda nkoka.”
Anyi “tubulu tua or.”
Anyi “muntu udi ne mêsu minyika panshi.”