Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yeshaya 7:1-25

MALU ADI MU MUKANDA EU

  • Mukenji kudi mukalenge Ahaza (1-9)

    • Sheâ-yashuba (3)

  • Tshimanyinu tshia Emanuele (10-17)

  • Bipeta bibi bia dipanga lulamatu (18-25)

7  Mpindieu, mu matuku a Ahaza+ muana wa Yotama muana wa Uziya, mukalenge wa Yuda, Lesine mukalenge wa Sulia ne Peka+ muana wa Lemalaya, mukalenge wa Isalele, bakabanda bua kuela Yelushalema mvita, kadi kavua* mua kumukuata to.+  Bakambila ba mu nzubu wa Davidi ne: “Sulia mmudisangishe ne Efelayima.” Muoyo wa Ahaza ne mioyo ya bantu bende yakabanga kuzakala, bu mitshi ya muitu inyunga ne lupepele.  Ke Yehowa kuambila Yeshaya ne: “Ndaku koku bua kutuilangana ne Ahaza, wewe ne muanebe Sheâ-yashuba,*+ ku ndekelu kua munkoloji* wa mâyi wa dijiba dia ku mutu+ didi mu tshibeba tshia ku budimi bua musukudi wa bilamba.  Udi ne bua kumuambila ne: ‘Utabalele bua kushala talalaa. Kutshinyi, ne kuteketshi ku muoyo bua bitaku bibidi bia mitshi bidi bifuima ebi to, bua tshiji tshikole tshia Lesine ne Sulia ne muana wa Lemalaya.+  Bualu Sulia ne Efelayima ne muana wa Lemalaya mbele tshifufu bua kukuenzela bibi, bamba ne:  “Tubandayi bua kuluisha Yuda ne tumupandulule bipese* ne tumutshimune* buetu tuetu, ne tumutekele muana wa Tabêla mukalenge.”+  “‘Mukalenge Mutambe Bunene Yehowa udi wamba nunku: “Bualu ebu kabuakukumbana to,Ne kabuakuenzeka to.   Bualu Damaseke ke mutu wa Sulia,Ne Lesine ke mutu wa Damaseke. Mu bidimu 65 tshiananaEfelayima neasunsudibue yonso ne kakuikala kabidi tshisamba to.+   Samalea ke mutu wa Efelayima,+Ne muana wa Lemalaya ke mutu wa Samalea.+ Anu wewe muikale ne ditabuja dikole,Tshianana kuakujadikibua bikole to.”’” 10  Yehowa wakatungunuka ne kuakula ne Ahaza, wamba ne: 11  “Lomba Yehowa Nzambi webe tshimanyinu;+ nansha tshiotshi tshikale tshiondoke bu Lukita* anyi tshitumbuke bu diulu.” 12  Kadi Ahaza wakamba ne: “Tshiakulomba tshimanyinu anyi kuteka Yehowa mu diteta to.” 13  Ke Yeshaya kuamba ne: “Telejayi koku, nuenu ba mu nzubu wa Davidi. Ki mbikumbane bua munudi nuteka lutulu lua bantu mu diteta anyi? Nudi kabidi ne bua kuteta lutulu lua Nzambi anyi?+ 14  Nunku Yehowa muine neanupeshe tshimanyinu: Tangilayi! Nsongakaji* neimite difu, nealele muana wa balume,+ neamuinyike ne: Emanuele.*+ 15  Yeye neadie manteka ne buitshi dîba diamanyaye mua kubenga malu mabi ne kusungula malu mimpe. 16  Bualu, kumpala kua muana eu kumanya mua kubenga malu mabi ne kusungula malu mimpe, buloba bua bakalenge babidi baudi utshina bikole aba nebuikale bulekelela buonso.+ 17  Yehowa neakutumine wewe ne bantu bebe ne ba mu nzubu wa tatuebe tshikondo tshitu katshiyi tshianji kulua katshia ku dituku divua Efelayima mutapulukangane ne Yuda,+ bualu Yeye nealue ne mukalenge wa Ashû.+ 18  “Dituku adi Yehowa neele njiji ya ku tusulu tua kule tua musulu wa Nile wa mu Ejipitu ne mbulubulu ya mu buloba bua Ashû kashiba, 19  neyilue yonso ne neyikile pa mpulumuku ya bibandabanda,* mu mitanta ya mabue, pa tumitshi tuonso tua mêba, ne pa miaba yonso idi mâyi. 20  “Mu dituku adi, Yehowa neakungule mutu ne miosa ya ku mikolo ne kapaya kangata ku mudimu ka mu buloba bua ku Musulu,* mukalenge wa Ashû,+ ne nekakone kabidi ne muedi. 21  “Mu dituku adi, muntu nealame ne muoyo muana wa ngombe umue wa mu ngombe yende ne mikoko ibidi. 22  Bua bungi bua mabele, yeye neadie manteka, bualu muntu yonso udi ushala mu buloba neadie manteka ne buitshi. 23  “Mu dituku adi, muaba uvua mionji ya tumuma tua mvinyo tshinunu ya mushinga wa bitupa bia arjan tshinunu, newikale anu tumitshi tua mêba ne bisuku. 24  Bantu nebayaku ne buta ne mukete, bualu buloba buonso nebuikale ne tumitshi tua mêba ne bisuku. 25  Nunku, mikuna yonso ivuabu badima ne lukasu, kuakusemena pabuipi nayi bua buôwa bua tumitshi tua mêba ne bisuku; neyilue muaba wa kudiila wa ngombe ne buloba bua mikoko kudiatakaja.”

Note

Anyi pamuapa: “kabavua.”
Mmumue ne: “Anu bashadile ke bapingana.”
Anyi “mukidi.”
Anyi pamuapa: “tumutshingishayi.”
Anyi “tutubulayi bimanu biende.” Ku mua.: “tumupandayi.”
Anyi “Sheole,” mmumue ne: lukita lua bukua bantu buonso. Tang. Diumv.
Anyi “Nsongakaji utshidi kamama.”
Mmumue ne: “Nzambi udi netu.”
Anyi “tusulu tua tshilonda nkoka.”
Mmumue ne: musulu wa Pelata.