Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yeshaya 65:1-25

65  “Ndi muenze bua bankebe kudi bantu bavua kabayi bangebeje;Ndi muenze bua bampete kudi bantu bavua kabayi bankebe.+ Mvua muambile tshisamba tshivua katshiyi tshibila dîna dianyi ne: ‘Mmeme eu, mmeme eu!’+   Ndi muoluele tshisamba tshia mutu mukole bianza bianyi dituku dijima,+Bantu badi bendela mu njila udi kayi muimpe,+Balonda ngenyi yabubobu;+   Bantu badi bampenda mu mêsu muanyi misangu yonso,+Balambuila milambu mu madimi+ ne bafuimishila muishi wa mulambu pa madioto.   Badi basomba munkatshi mua nkita,+Ne badi bapitshishila butuku mu miaba misokome,*Badia munyinyi wa ngulube,+Ne nsupu wa bintu bibole* udi mu ngesu yabu.+   Badi bamba ne: ‘Imanyina kuudi aku; kusemenyi pabuipi nanyi to,Bualu ndi wa tshijila kukupita wewe.’* Bantu aba badi muishi mu mimpempe yanyi, kapia kadi katema dituku dijima.   Monayi! Mbafunde kumpala kuanyi;Tshiakushala talalaa,Kadi nembafute,+Nembafute difutu diabu dionso*   Bua bilema biabu ne bua bilema bia bankambua babu kabidi,”+ ke mudi Yehowa wamba. “Bualu mbafuimishile muishi wa mulambu pa mikuna mineneNe mbampende pa mikuna mikese,+Nenganji kubapimina difutu diabu dionso.”*   Mona tshidi Yehowa wamba: “Anu bu padi mvinyo mupiamupia muikale mu tshisumbu tshia tumuma tua mvinyoNe muntu wamba ne: ‘Kutshinyangi to, bualu munda muatshi mudi tshintu tshimpe,’* Ke mungenza bua bualu bua bena mudimu banyi;Tshiakubabutula bonso to.+   Nempatule bana* mu YakobaNe nempatule mu Yuda muntu bua kupiana mikuna yanyi;+Basungula banyi nebapiane buloba,Ne bena mudimu banyi nebasombelamu.+ 10  Shalona+ nealue mpata wa kudishila mikokoNe Tshibandabanda* tshia Akola+ muaba wa ngombe kuikishila,Bua bantu banyi badi bankeba. 11  Kadi nuenu nudi munkatshi mua badi balekela Yehowa,+Badi bapua mukuna wanyi wa tshijila muoyo,+Badi balongoluela nzambi wa Dikasa dimpe mêsa,Ne badi buwuja makopo a mvinyo musambakaja bua nzambi wa Tshidi tshimana kufunda. 12  Nunku nennufundile muele wa mvita,+Ne nuenu bonso nenuiname bua kushipibua,+Bualu mvua mubikile, kadi kanuvua bandamune,Mvua muakule, kadi kanuvua bateleje;+Nuakatungunuka ne kuenza malu avua mabi ku mêsu kuanyi,Ne nuvua basungule malu avua kaayi ansankisha.”+ 13  Nunku, mona tshidi Mukalenge Mutambe Bunene Yehowa wamba: “Monayi! Bena mudimu banyi nebadie, kadi nuenu nenuikale ne nzala.+ Monayi! Bena mudimu banyi nebanue,+ kadi nuenu nenuikale ne nyota. Monayi! Bena mudimu banyi nebasanke,+ kadi nuenu nenufue bundu.+ 14  Monayi! Bena mudimu banyi nebele mbila ya disanka bualu muoyo wabu udi bimpe,Kadi nuenu nenuele mbila bua kusama kua muoyoNe nenuele kabobo ka muadi bua dishikila dia lungenyi. 15  Nenushiye dîna dikala basungula banyi benza nadi mudimu bu mulawu,Ne Mukalenge Mutambe Bunene Yehowa neashipe muntu yonso wa kunudi,Kadi bena mudimu bende neababikile ku dîna dikuabu;+ 16  Nunku, muntu yonso udi udikebela dibenesha mu bulobaNeabeneshibue kudi Nzambi wa bulelela,*Ne muntu yonso udi uditshipa mutshipu mu bulobaNeaditshipe mu dîna dia Nzambi wa bulelela.*+ Bualu nebapue makenga a* kale muoyo;Nebaasokoke ku mêsu kuanyi.+ 17  Bualu monayi! Ndi mfuka diulu dipiadipia ne buloba bupiabupia;+Ne malu a kale kaakubavuila kabidi mu lungenyi,*Anyi kubabanda kabidi ku muoyo to.+ 18  Nanku sankayi bikole ne ikalayi ne disanka bua kashidi mu tshindi mfuka. Bualu monayi! Ndi mfuka Yelushalema tshintu tshidi tshifila disankaNe bantu bende tshintu tshidi tshisankishangana bikole.+ 19  Nengikale ne disanka bua Yelushalema ne nensanke bikole bua bantu banyi;+Kabakumvuamu kabidi tshiona tshia muadi anyi lubila lua dikenga to.”+ 20  “Kakuakuikala kabidi muana mutekete wa muaba au udi ushala ne muoyo anu matuku makese to,Peshi muntu mukole udi upanga kumana matuku ende a muoyo. Bualu muntu udi ufua ne bidimu lukama nebamumone anu muana mutekete,Ne muenji wa mpekatu needibue mulawu, nansha yeye ne bidimu lukama.* 21  Nebase nzubu ne nebasombelamu,+Ne nebadime madimi a tumuma tua mvinyo ne nebadie tumuma tuawu.+ 22  Kabakuibaka bua muntu mukuabu asombelamu,Ne kabakukuna bintu bua bantu bakuabu babidie. Bualu matuku a bantu banyi neikale bu matuku a mutshi,+Ne basungula banyi nebasanke bikole menemene bua mudimu wa bianza biabu. 23  Kabakukuata mudimu mukole* bua tshianana,*+Anyi kulela bana bua dikenga to,Bualu badi ndelanganyi mienza* ne badi Yehowa mubeneshe,+Ne bana babu pamue nabu.+ 24  Nansha kumpala kua bobu kubikila, meme nengandamune;Patshidibu anu bakula, meme nengumvue. 25  Mbua wa ditu ne muana wa mukoko nebidie pamue,Ntambue neadie bisonsa anu bu ngombe,+Ne biakudia bia nyoka nebikale lupuishi. Kabiakuenzelangana bualu bubi peshi kukebesha kabutu mu mukuna wanyi wa tshijila wonso,”+ ke mudi Yehowa wamba.

Note

Anyi pamuapa: “mu mitanda ya bansentedi.”
Anyi “bia bukoya.”
Anyi pamuapa: “Bualu nenkusambulujile bunsantu buanyi.”
Ku mua.: “mu tshiadi tshiabu.”
Ku mua.: “mu tshiadi tshiabu.”
Ku mua.: “dibenesha.”
Ku mua.: “dimiinu.”
Anyi “Tshibatabata.”
Anyi “lulamatu.” Ku mua.: “Amen.”
Anyi “lulamatu.” Ku mua.: “Amen.”
Anyi “ntatu ya.”
Anyi “kabakuavuluka.”
Anyi pamuapa: “Ne muntu udi kayi ukumbaja bidimu lukama nebamumone bu muedibue mulawu.”
Anyi “Kabakutata.”
Anyi “patupu.”
Ku mua.: “dimiinu dienza.”