Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yeshaya 63:1-19

MALU ADI MU MUKANDA EU

  • Disombuela dia Yehowa pa bisamba (1-6)

  • Dinanga dia lulamatu dia Yehowa mu bikondo bia kale (7-14)

  • Disambila dia dinyingalala bua mpekatu (15-19)

63  Eu nnganyi udi ufumina ku Edome,+Ufumina ku Bosela+ ne bilamba bia mekala matuile,*Yeye udi ne bilamba bilengele,Wenda wenda mu bukole buende bunene? “Mmeme, Yeye udi wakula mu buakane,Yeye udi ne bukole bunene bua kupandishangana.”   Bua tshinyi bilamba biebe mbikunze? Bua tshinyi bilamba biebe bidi bu bia muntu udi udiata tumuma tua mvinyo mu tshikaminu tshia mvinyo?+   “Ndi mudiate tshikaminu tshia mvinyo nkayanyi. Muntu nansha umue wa mu bukua bantu kavua nanyi to. Mvua mutungunuke ne kubadiata mu tshiji tshianyi,Ne mvua mutungunuke ne kubadiatakaja mu tshiji tshianyi tshikole.+ Bilamba bianyi bivua biyile mashi abu,Ne ndi munyange bilamba bianyi bionso.   Bualu dituku dia disombuela didi mu muoyo wanyi,+Ne tshidimu tshia bapikula banyi ntshilue.   Mvua mutangile, kadi kakuvua muntu wa kungambuluisha;Mvua mukeme bua muvua muntu nansha umue kayi munkuatshishe. Nunku diboko dianyi diakampetesha lupandu,*+Ne tshiji tshianyi tshikole tshiakankuatshisha.   Ngakadiatakaja bukua bantu mu tshiji tshianyi,Ngakenza bua banue bakuatshike tshiji tshianyi tshikole+Ne ngakupumuna mashi abu panshi.”   Nengakule bua bienzedi bia dinanga dia lulamatu bia Yehowa,Bienzedi bia Yehowa bia kutumbisha,Bua malu onso adi Yehowa mutuenzele,+Malu mimpe a bungi adiye muenzele nzubu wa Isalele,Bilondeshile luse luende ne dinanga diende dinene dia lulamatu.   Bualu wakamba ne: “Bobu mbantu banyi bushuwa, bana bikala kabayi mua kupanga lulamatu.”*+ Nunku yeye wakalua Mupandishi wabu.+   Mu makenga abu onso, uvua ukenga pende.+ Ne mutuadi wende yeye wa mukenji* wakabapandisha.+ Mu dinanga diende ne luse luende, yeye wakabapikula,+Ne wakabajula ne kubambula matuku onso a kale.+ 10  Kadi bakatomboka,+ kunyingalajabu nyuma wende muimpe.+ Nunku yeye wakalua muena lukuna wabu,+Ne wakabaluisha.+ 11  Bakavuluka matuku a kale,Matuku a Mose muena mudimu wende, bamba ne: “Yeye uvua mubapatule mu mbuu+ ne balami ba mikoko yende udi penyi?+ Yeye uvua muele nyuma Wende muimpe munda muende,+ 12  Yeye uvua muenze bua diboko Diende dia butumbi diye ne tshianza tshia balume tshia Mose,+Yeye uvua mupande mâyi kumpala kuabu+Bua kudienzela dîna dia tshiendelele,+ 13  Yeye uvua mubendeshile mu mâyi a mavuala makole,*Bafike ku dienda kabayi batetuka,Bu kabalu mu mpata mualabale,* udi penyi? 14  Anu bu padi tshisumbu tshia nyama tshipueka mu mpata wa mu tshibandabanda,Nyuma wa Yehowa wakabapesha dikisha.”+ Ke muuvua mulombole bantu bebe,Bua kudienzela dîna dia butumbi bunene.*+ 15  Mu diulu muudi amu tangila panshi ne monaKumbukila ku tshisombedi tshiebe tshitumbuke tshia bunsantu ne butumbi.* Tshisumi tshiebe ne bukole buebe,Dijuka dia luse luebe*+ ne dibuikidilangana diebe bidi penyi?+ Mbampalabi. 16  Bualu wewe udi Tatu wetu;+Nansha mudi Abalahama kayi mua kutumanyaNe Isalele kayi mua kutujingulula,Wewe, Yehowa, udi Tatu wetu. Mupikudi wetu wa katshia ku kale ndîna diebe.+ 17  Yehowa wetu, bua tshinyi udi utulekela tumbuka* mu njila yebe? Bua tshinyi udi ulekela* mioyo yetu ipapa, bua katukutshinyi?+ Pingana, bua bualu bua bena mudimu bebe,Bisa bia bumpianyi buebe.+ 18  Bantu bebe ba tshijila bavua babupiane bua tshitupa tshîpi. Baluishi betu mbadiatakaje muaba webe munsantu.+ 19  Kukadi mutantshi mule tudi balue bu bantu bautu kuyi muanji kukokesha,Bu bantu batu kabayi banji kubikidibua ku dîna diebe.

Note

Anyi pamuapa: “bikunze kunzuu.”
Anyi “butshimunyi.”
Anyi “mua kushima.”
Anyi “muanjelu uvua mufume kumpala kuende.”
Anyi “mâyi mondoke.”
Anyi “tshipela.”
Anyi “dilengele.”
Anyi “bulengele.”
Ku mua.: “disalakana dia bia munda biebe.”
Anyi “wenza bua tumbuke.”
Ku mua.: “uvuija.”