Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yeshaya 59:1-21

MALU ADI MU MUKANDA EU

  • Mpekatu ya bena Isalele idi ibapandulula ne Nzambi (1-8)

  • Ditonda dia mpekatu (9-15a)

  • Yehowa udi ubuela mu tshilumbu tshia muntu udi unyingalala bua mpekatu wende (15b-21)

59  Monayi! Tshianza tshia Yehowa ki ntshîpi menemene bua kupanga kupandisha,+Nansha ditshi diende ki ndipate* bua kupanga kumvua.+   Tòo, bilema bienu nuenu ke bidi binupandulule ne Nzambi wenu.+ Mpekatu yenu ke idi mimufikishe ku dinusokoka mpala wende,Ne yeye udi ubenga bua kunuteleja.+   Bualu mu bianza bienu mmunyanguke ne mashi+Ne minu yenu ne tshilema. Mishiku yenu idi yamba mashimi,+ ne ludimi luenu ludi lunungana malu adi kaayi makane.   Muntu nansha umue kena ubikila buakane,+Ne muntu nansha umue kena uya ku tshilumbuluidi mu bulelela. Badi beyemena bualu bua dishima*+ ne bakula malu adi kaayi ne mushinga. Badi bimita tshimvundu ne balela bualu budi buenzelangana bibi.+   Badi batoya mayi a nyoka wa lulengu,Ne badi baluka buntatande bua ntande.+ Muntu yonso udi udia mayi abu udi ufua,Ne diyi didibu batayishe didi ditoya nyoka wa lulengu.   Buntatande buabu kabuakuambuluisha bu tshilamba,Ne kabakudibuikila tshintu tshidibu benza.+ Midimu yabu idi yenzelangana bibi,Ne bienzedi bia tshikisu bidi mu bianza biabu.+   Makasa abu adi aya lubilu bua kuenza malu mabi,Ne badi baya lukasa bua kuela mashi adi kaayi ne bualu panshi.+ Meji abu mmeji a kuenzelangana bibi;Dibutuka ne dikenga bidi mu njila yabu.+   Ki mbamanye njila wa ditalala to,Ne mu tujila tuabu kamuena kulumbuluisha kuakane.+ Badi bakonyangaja njila yabu;Muntu yonso udi wendelamu kakupeta ditalala.+   Ke bualu kayi kulumbuluisha kuakane kudi netu kule menemene,Ne buakane kabuena butupeta. Tudi tutungunuka ne kutekemena butoke, kadi monayi! Kudi mîdima;Tutungunuka ne kutekemena bukenke, kadi tudi tutungunuka ne kuendela mu mifitu.+ 10  Tudi tububuta tukeba tshimanu bu bampofu;Bu bantu badi kabayi ne mêsu, tudi tutungunuka ne kububuta.+ Tudi tutondoka munda munya bu badi mu mîdima ya dilolo;Munkatshi mua badi ne bukole, tudi anu bu bafue. 11  Tuetu bonso tudi tutungunuka ne kukungula bu nyama ya urseNe tudila ne kanyinganyinga bu nyunyi ya nkutshi. Tudi batekemene kulumbuluisha kuakane, kadi kakuenaku;Batekemene lupandu, kadi ludi netu kule menemene. 12  Bualu matomboka etu nga bungi kumpala kuebe;+Mpekatu yetu yonso idi itupisha.+ Bualu matomboka etu adi netu;Tudi bamanye bimpe bilema bietu.+ 13  Tudi bashipe mikenji ne bavile Yehowa;Tudi bele Nzambi wetu nyima. Tudi bakule bua dikengeshangana ne ditomboka;+Tudi bimite mashimi ne banungane mêyi a mafi afuma mu muoyo.+ 14  Mbapingaje kulumbuluisha kuakane panyima,+Ne buakane mbuimanyine pa bule;+Bualu, bulelela* mbutondoke muaba wa tshinsangansanga,Ne bualu budi bululame mbupangile mua kubuela. 15  Bulelela* mbujimine,+Ne muntu yonso udi umbuka ku malu mabi badi bamupawula. Yehowa uvua mumone bualu ebu ne kavua musanke to,*Bualu kulumbuluisha kuakane kakuvuaku to.+ 16  Wakamona ne: kakuvua muntu,Ne wakakema bua muvua muntu nansha umue kayi muakuilangane,Nunku diboko diende yeye diakatuala lupandu,*Ne buakane buende yeye buakamukuatshisha. 17  Nunku wakavuala buakane bu kazaku ka mvita ka tuamuNe tshifulu tshia lupandu* ku mutu kuende.+ Wakavuala bilamba bia disombuela bu bivualu biende+Ne wakadijingila tshisumi bu kazaku.* 18  Neabafute bua malu adibu benze:+ Tshiji tshikole kudi baluishi bende, disombuela kudi bena lukuna bende.+ Ne bidiila,* yeye neabifute tshidi bu tshiabi. 19  Nebatshine dîna dia Yehowa kumbukila kudi dîba dibuelelaNe butumbi buende kudi dîba dipatukila,Bualu yeye neabuele bu musulu udi upueka lubilu lukole,Udi nyuma wa Yehowa usaka. 20  “Mupikudi+ nealue kudi Siona,+Kudi ba mu Yakoba badi bumbuka ku dishipa dia mikenji,”+ ke mudi Yehowa wamba. 21  “Kadi meme, etshi ke tshipungidi tshianyi nabu,”+ ke mudi Yehowa wamba. “Nyuma wanyi udi pambidi pebe ne mêyi anyi andi muteke mukana muebe, kabiakumbushibua mukana muebe, mukana mua bana bebe,* anyi mukana mua bikulu bebe,”* ke mudi Yehowa wamba, “kutuadijila ku mpindieu too ne kashidi.”

Note

Ku mua.: “ndinême bujitu.”
Anyi “bua patupu.”
Anyi “bululame.”
Anyi “Bululame.”
Ku mua.: “ne buvua bualu bubi ku mêsu kuende.”
Anyi “ditshimuna diende.”
Anyi “ditshimuna.”
Anyi “muzabi wa kawuyi maboko.”
Anyi “bisanga.”
Ku mua.: “dimiinu diebe.”
Ku mua.: “mua dimiinu dia dimiinu diebe.”