Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yeshaya 40:1-31

MALU ADI MU MUKANDA EU

  • Busambi bua bantu ba Nzambi (1-11)

    • Dîyi mu tshipela (3-5)

  • Bunene bua Nzambi (12-31)

    • Bisamba bu dimata dia mâyi difuma mu mbeketshi (15)

    • Nzambi mmusombele pa mutu pa “tshijengu tshia buloba” (22)

    • Mitoto yonso idi ibikidibua ku dîna (26)

    • Nzambi katu utshioka nansha (28)

    • Ditekemena kudi Yehowa didi difilulula bukole (29-31)

40  Nzambi udi wamba ne: “Sambayi, sambayi bantu banyi.”+   “Ambilayi muoyo wa Yelushalema,*Mumanyishayi ne: mudimu udibu bamuenzeja ku bukole wakumbanyi,Ne: mbafute bua tshibawu tshiende.+ Mmupete difutu dijima* bua mpekatu yende yonso ku tshianza tshia Yehowa.”+   Dîyi dia muntu udi wela lubila mu tshipela ne: “Tokeshayi* njila wa Yehowa!+ Lulamijayi tshibeba+ mu tshipela bua Nzambi wetu.+   Tshibandabanda tshionso tshibandishibue,Ne mukuna munene wonso ne mukuna mukese wonso ipuekeshibue. Buloba bua bibungubungu budi ne bua kulandakana,Ne buloba budi ne binina budi ne bua kulua mpata wa mu tshibandabanda.+   Butumbi bua Yehowa nebusokolodibue,+Ne bantu bonso nebabumone* tshiapamue,+Bualu mukana mua Yehowa mmuakule.”   Teleja! Muntu udi wamba ne: “Ela dîyi!” Mukuabu udi webeja ne: “Ngele dîyi dia tshinyi?” “Bantu bonso badi* bisonsa bibishi. Dinanga diabu dionso dia lulamatu didi bu bilongo bia mu mpata.+   Bisonsa bibishi bidi biuma,Bilongo bidi bifubidila,+Bualu mupuya* wa Yehowa udi ubituta.+ Bushuwa, bantu badi anu bisonsa bibishi.   Bisonsa bibishi bidi biuma,Bilongo bidi bifubidila,Kadi dîyi dia Nzambi wetu didi dishala kashidi.”+   Banda pa mukuna mule,Wewe mukaji udi ulua ne lumu luimpe bua Siona.+ Bandisha dîyi diebe ne bukole buonso,Wewe mukaji udi ulua ne lumu luimpe bua Yelushalema. Dibandisha, kutshinyi to. Manyisha bimenga bia Yuda ne: “Nzambi wenu nyeye eu.”+ 10  Tangila! Mukalenge Mutambe Bunene Yehowa nealue muikale ne bukole,Ne diboko diende nedikokeshe buende yeye.+ Tangila! Difutu diende didi kudiye,Ne difutu didiye ufuta didi kumpala kuende.+ 11  Bu mulami wa mikoko, yeye nealame* tshisumbu tshiende tshia mikoko.+ Neasangishe bana ba mikoko pamue ne diboko diende,Neabambule mu tshiadi tshiende. Idi yamusha bana bayi mabele neayilombole bitulu bitulu.+ 12  Nnganyi udi mupime mâyi munda mua tshianza tshiende+Ne muangate bipimu bia* diulu ne ntanta wa tshianza tshiende tshibalula?* Nnganyi udi musangishe lupuishi lua buloba mu tshipiminu+Anyi mupime bujitu bua mikuna minene mu tshipiminu tshia bujituNe bua mikuna mikese mu tshipiminu tshia bujitu? 13  Nnganyi udi mupime bunene bua* nyuma wa Yehowa,Ne nnganyi udi mua kumubela bu mumupeshi wa ngenyi?+ 14  Nnganyi uvuaye mulombe lungenyi bua kupetaye dijingulula dia malu,Anyi nnganyi udi umulongesha njila wa kulumbuluisha kuakane,Anyi udi umulongesha dimanya,Anyi udi umuleja njila wa dijingulula dia malu dilelela?+ 15  Monayi! Bisamba bidi bu dimata dia mâyi difuma mu mbeketshi,Yeye udi ubimona bu tupuishipuishi pa tshipimu.+ Monayi! Yeye udi wambula bidiila* bu tupuishi tukese. 16  Nansha Lebanona kena ukumbana bua kulama kapia katema,*Ne nyama yende ya tshisuku kayena ikumbana bua mulambu wa kuosha. 17  Bisamba bionso bidi bu tshintu tshidi katshiyiku kumpala kuende;+Udi ubimona bu bintu bidi kabiyiku, bu tshintu tshia dishima.+ 18  Nudi mua kufuanyikija Nzambi ne nganyi?+ Ntshinyi tshinudi mua kuteka pabuipi nende tshidi tshifuanangane nende?+ 19  Nsenda udi wenza lupingu,*Mufudi wa biamu udi ululamika or,+Udi ufula shene ya arjan. 20  Udi usungula mutshi bu dipa diende,+Mutshi wikala kawuyi mua kubola. Udi ukeba nsenda mupilukeBua kulongolola lupingu lusonga luikala kaluyi mua kukuluka.+ 21  Kanuena bamanye anyi? Kanuena bumvue anyi? Ki mbanuambile katshia ku tshibangidilu anyi? Kanuena bajingulule katshia ku ditekibua dia bishimikidi bia buloba anyi?+ 22  Kudi Yeye udi musombele pa mutu pa tshijengu tshia* buloba,+Ne badi basombelapu badi bu mpasu. Yeye udi olola diulu bu tshilamba tshimpe tshidi tshimuenesha dia muamua,Ne udi ubalula diulu bu ntenta wa kusombela.+ 23  Udi uvuija bakokeshi banene tshintu tshidi katshiyikuNe uvuija balumbuluishi* ba pa buloba tshintu tshia dishima. 24  Mbafume ku dibakuna,Mbafume ku dibamiamina,Tshitaku tshiabu tshitshidi tshielelaku miji mu buloba,Badi babapepula, badi buma,Ne tshipepele tshidi tshiya nabu bu nsona.+ 25  “Nnganyi unudi mua kumfuanyikija nende bua kumvuija mumue nende?” ke mudi Wa Tshijila wamba. 26  “Bandishayi mêsu enu mu diulu, numone. Udi mufuke bintu ebi nnganyi?+ Nyeye udi upatula musumba wabi ku bungi buabi;Udi ubibikila bionso ku dîna diabi.+ Bua ngulu yende ne bukole buende bua dikema,+Kakuena nansha tshimue tshidi tshipangike. 27  Wewe Yakoba, bua tshinyi udi wakula, wewe Isalele, bua tshinyi udi wamba ne: ‘Njila wanyi mmusokome ku mêsu kua Yehowa,Ne tshiena mpeta kulumbuluisha kuakane kudi Nzambi’?+ 28  Kuena mumanye anyi? Kuena mumvue anyi? Yehowa, Mufuki wa ntengu ya buloba, udi Nzambi bua kashidi ne tshiendelele.+ Yeye kena utshioka anyi upungila nansha.+ Dijingulula diende dia malu kadiena kukonkonona.*+ 29  Udi upesha muntu udi mutshioke bukole,Upesha badi kabayi ne bukole* dikanda dionso.+ 30  Bana ba balume nebatshioke, nebapungile,Ne bansongalume nebatondoke, nebadishinde, 31  Kadi badi batekemena kudi Yehowa nebapetulule bukole. Nebaye muulu ne mapuapua bu nyunyi ya mikanku.+ Nebanyeme lubilu, kabakupungila to;Nebende, kabakutshioka to.”+

Note

Anyi “Ambilayi Yelushalema mêyi a busambi.”
Anyi “Mmupete misangu ibidi.”
Anyi “Longololayi.”
Anyi “musunyi wonso newubumone.”
Ku mua.: “Musunyi wonso udi.”
Anyi “nyuma.”
Anyi “neadishe.”
Anyi “bunene bua.”
Ntanta wa kumbukila ku lusongo lua tshiala too ne ku lua kantenkenene padibu babalule tshianza. Tang. Tshis. B14.
Anyi pamuapa: “mujingulule.”
Anyi “bisanga.”
Anyi “kena mua kufila nkunyi bungi bukumbane.”
Anyi “lupingu lua tshiamu tshiengulula.”
Anyi “dibulunge dia.”
Anyi “bamfumu.”
Anyi “kadiena kupima.”
Anyi “ngulu.”