Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yeshaya 32:1-20

MALU ADI MU MUKANDA EU

  • Mukalenge ne bakokeshi nebakokeshe bua kulumbuluisha kuakane kulelela (1-8)

  • Didimuija kudi bakaji badi kabayi batshiuka bualu (9-14)

  • Mabenesha padibu bitshikija nyuma (15-20)

32  Monayi! Mukalenge+ neakokeshe bua buakane,+Ne bakokeshi nebakokeshe bua kulumbuluisha kuakane.   Nunku, muntu yonso neikale bu muaba wa kusokomena* tshipepele,Muaba wa kupengama* mvula wa tshipepele,Bu tusulu tua mâyi mu buloba budi kabuyi ne mâyi,+Bu dileji dia mukuna munene wa dibue mu buloba bume.   Nunku mêsu a badi bamona kabakualamika kabidi bua kuakanga nansha,Ne matshi a badi bumvua neateye ntema.   Muoyo wa badi balubakana newelangane meji bikole bua dimanya,Ne ludimi ludi lukukumina neluakule bipepele ne mu mushindu mutoke.+   Kabakubikila kabidi muntu mutshimbakane ne: mupeshanganyi wa bintu,Ne kabakubikila muntu musenji ne: muntu munene to;   Bualu muntu mutshimbakane neakule malu matshimbakane,Ne muoyo wende newulukakaje malu mabi,+Bua kumuangalaja butontolodi* ne bua kuamba Yehowa mêyi mabi,Bua kulekela muntu udi ne nzala* ufua ne nzala,Ne kupala muntu udi ne nyota tshia kunua.   Bintu bidi muntu musenji wenza nabi mudimu mbibi;+Udi utungunuja tshikadilu tshia bunduBua kuenzela mukengi bibi ne mashimi,+Nansha padi mupele wamba malu makane.   Kadi mupeshanganyi wa bintu udi ne lungenyi lua dipeshangana bintu,Ne udi unanukila mu didienzeja bua kupeshangana bintu.*   “Nuenu bakaji badi basombe talalaa, jukayi nuteleje dîyi dianyi! Nuenu bana ba bakaji badi kabayi batshiuka bualu,+ teyayi ntema ku bindi ngamba! 10  Mu tshidimu tshijima ne ndambu, nuenu badi kabayi batshiuka bualu nenukanke,Bualu kamuma nansha kamue kakakuikala kasangisha padi tshikondo tshia dipuola dia tumuma tua mvinyo tshijika.+ 11  Zakalayi, nuenu bakaji badi basombe talalaa! Kankayi, nuenu badi kabayi batshiuka bualu! Vulayi bilamba, nushale butaka,Ne dijingilayi tshilamba tshikayabale mu bimono bienu.+ 12  Dilayi nudikuma mu tshiadiBua madimi malenga ne muonji wa tumuma tua mvinyo udi ukuama bikole. 13  Bualu nebabuikile buloba bua bantu banyi kudi mêba ne tumitshi tua mêba;Nebibuikile nzubu yonso ya masanka,Eyowa, tshimenga tshia disanka dikole.+ 14  Bualu tshibumba tshikolesha ntshilekela;Tshimenga tshia mutoyi ntshilekelela.+ Ofele+ ne tshibumba tshia nsentedi mbilue buloba bua munda mutupu bua kashidi,Disanka dia mpunda ya tshisuku,Mpata wa kudiila wa bimuna,+ 15  Too ne padibu batuitshikijila nyuma ufuma muulu,+Ne tshipela tshilua budimi bua mitshi ya bimuma,Ne bamona budimi bua mitshi ya bimuma bu ditu.+ 16  Nunku kulumbuluisha kuakane nekusombe mu tshipela,Ne buakane nebusombele mu budimi bua mitshi ya bimuma.+ 17  Tshipeta tshia buakane bulelela netshikale ditalala,+Ne mamuma a buakane bulelela neikale bupole ne bukubi bia tshiendelele.+ 18  Bantu banyi nebasombele muaba udi ditalala dia kashidi,Mu miaba ya kusombela ya bukubi ne mu miaba ya kuikishila ya bupole.+ 19  Kadi mvula wa mabue neupule ditu,Ne tshimenga tshionso tshijima netshilandakajibue. 20  Nudi ba diakalenga nuenu badi bakuna mamiinu ku mielelu ya mâyi onso,Badi basulula* ngombe ne mpunda.”+

Note

Anyi “muaba wa kueyema.”
Anyi “Tshinyemenu ku.”
Anyi “dienza malu adi kaayi a ditshina dia Nzambi.”
Anyi “anyima wa muntu udi ne nzala.”
Anyi “kuenzelangana malu mimpe.”
Anyi “balekelela.”