Ndaku munda

Ndaku ku tshikebelu

Bantemu ba Yehowa

Sungula muakulu Tshiluba

Yeshaya 31:1-9

MALU ADI MU MUKANDA EU

  • Dikuatshisha dilelela didi difumina kudi Nzambi, ki nkudi bantu to (1-9)

    • Tubalu tua Ejipitu mmusunyi (3)

31  Diakabi dikale kudi badi bapueka mu Ejipitu bua kukeba diambuluisha,+Badi betekemena tubalu,+Badi beyemena matempu a mvita bualu adi a bungi,Ne beyemena tubalu tua mvita* bualu tudi ne bukole. Kadi kabena batangila kudi Wa Tshijila wa Isalele,Ne kabena bakeba Yehowa to.   Kadi yeye udi kabidi ne meji ne neatume dikenga,Ne yeye kakupingaja mêyi ende to. Neajuke bua kuluisha nzubu wa benji ba malu mabiNe badi bambuluisha benji ba malu mabi.+   Kadi bena Ejipitu mbantu betu ba tshianana aba, kabena Nzambi to;Tubalu tuabu mmusunyi, ki nnyuma to.+ Padi Yehowa wolola tshianza tshiende,Muntu yonso udi ufila diambuluisha nealendukeNe muntu yonso udibu bambuluisha neakuluke;Bonso nebajimine tshikondo tshimue.   Bualu mona tshidi Yehowa mungambile: “Anu mudi ntambue, muana wa ntambue wa bukole,* ukungula bua tshiakudia tshiende,Padibu basangisha tshisumbu tshijima tshia balami ba mikoko bua kumuluisha,Ne mêyi abu kaayi amutshinyishaAnyi disumpakana diabu dimutekesha,Ke muapueka Yehowa wa biluilu bua kuluangana mvitaBua mukuna wa Siona ne bua mukuna wende mukese.   Bu nyunyi idi ipueka lubilu, ke muikala Yehowa wa biluilu mua kulama Yelushalema.+ Neamulame ne neamupandishe. Neamuepule ne neamusungile.”  “Alukilayi kudi Yeye unudi batombokele bikole, nuenu bantu ba Isalele.+  Bualu, mu dituku adi muntu yonso neabenge nzambi yende ya tshianana ya arjan ne nzambi yende ya patupu ya or, ivua bianza bienu nuenu bienze ne mpekatu.   Ne muena Ashû neakuluke ku muele wa mvita, ki nku wa muntu to;Ne muele wa mvita newumubutule, ki ngua bantu to.+ Neanyeme bua muele wa mvita,Ne bansongalume bende nebababueje ku bukole ku mudimu mukole.   Mukuna wende wa dibue newupite bua buôwa bua tshianana,Ne bakokeshi bende nebatshine bua mutshi wa tshimanyinu,” ke mudi Yehowa wamba,Muena butoke budi* mu Siona ne muena tshikutu tshia kapia tshidi mu Yelushalema.

Note

Anyi “bendeshi ba tubalu.”
Anyi “muana wa ntambue wa musalala.”
Anyi “kapia kadi.”