Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yeshaya 2:1-22

MALU ADI MU MUKANDA EU

  • Mukuna wa Yehowa mmubandishibue (1-5)

    • Miele ya mvita ilua nkasu ya kudima nayi (4)

  • Dituku dia Yehowa didi dipuekesha bena diambu (6-22)

2  Ebu mbualu buvua Yeshaya muana wa Amoza mumone budi butangila Yuda ne Yelushalema:+   Ku ndekelu kua matuku,*Mukuna wa nzubu wa YehowaNewujadikibue bikole ku mutu kua nsongo ya mikuna minene,+Ne newubandishibue ku mutu kua mikuna mikese,Ne bisamba bionso nebipuilaku.+   Nanku bisamba bia bungi bia bantu nebiye, nebiambe ne: “Luayi, tubande ku mukuna wa Yehowa,Ku nzubu wa Nzambi wa Yakoba.+ Yeye neatulongeshe njila yende,Ne tuetu netuendele mu njila yende.”+ Bualu mukenji* newupatuke mu Siona,Ne dîyi dia Yehowa nedipatuke mu Yelushalema.+   Yeye neakose bilumbu munkatshi mua bisambaNe nealulamije malu* adi atangila bukua bantu buvule. Nebafule miele yabu ya mvita kuyivuija nkasu ya kudima nayiNe mafuma abu kuavuija miele ya kusonza nayi mitshi.+ Tshisamba katshiakujudila tshisamba tshikuabu muele wa mvita,Kabakulonga kabidi mvita nansha.+   Wewe nzubu wa Yakoba, luaku,Tuendele mu butoke bua Yehowa.+   Bualu wewe udi mulekele bantu bebe, nzubu wa Yakoba,+Bualu bobu mbuwule tente ne bintu bia ku Est;Badi benza malu a majimbu+ bu bena Peleshete,Ne badi ne bana ba bantu ba ku babende bungi tshianana.   Buloba buabu mbuwule tente ne arjan ne or,Ne biuma biabu kabiena ne ndekelu. Buloba buabu mbuwule tente ne tubalu,Ne matempu abu kaena ne ndekelu.+   Buloba buabu mbuwule tente ne nzambi ya patupu.+ Badi binamina mudimu wa bianza biabu,Binamina bintu bidi minu yabu mienze.   Nunku muntu udi winama panshi, udi upueka panshi,Ne wewe kuena mua kubafuila luse. 10  Buela mu dibue, sokoma mu lupuishiBua dikalaku dia Yehowa didi dienza buôwaNe butumbi buende bunene.+ 11  Mêsu a didibandisha a muntu neapuekeshibue,Ne diambu dia bantu nediname.* Yehowa nkayende neabandishibue mu dituku adi. 12  Bualu ndituku dia Yehowa wa biluilu.+ Didi dilua kudi muntu yonso udi ne didibandisha ne didisua,Kudi muntu yonso, mubandishibue anyi mupuekeshibue.+ 13  Didi dilua pa mitshi yonso ya sedre ya ku Lebanona idi mile ne mitumbukeNe pa mitshi ya nsanga yonso ya ku Bashana, 14  Pa mikuna minene mile yonsoNe pa mikuna mikese yonso idi mitumbuke, 15  Pa tshibumba tshionso tshile ne tshimanu tshionso tshikolesha, 16  Pa mazuwa onso a ku Tâshishi+Ne pa matu onso adi malengele. 17  Didibandisha dia muntu nedipuekeshibue panshi,Ne diambu dia bantu nediname.* Yehowa nkayende neabandishibue mu dituku adi. 18  Nzambi ya patupu neyijimine kashidi.+ 19  Nunku bantu nebabuele mu nyongolo ya mu mabueNe mu mena a mu buloba,+Bua dikalaku dia Yehowa didi dienza buôwaNe butumbi buende bunene,+Padiye ujuka bua kukankisha buloba ne buôwa. 20  Dituku adi bantu nebangate nzambi yabu ya patupu ya arjan ne ya orIvuabu badienzele bua kuyinamina,Nebayikupile tupelekese* ne midima,+ 21  Bua kubuela mu mena a mu mabueNe mu mitanta ya mikuna ya mabue,Bua dikalaku dia Yehowa didi dienza buôwaNe butumbi buende bunene,Padiye ujuka bua kukankisha buloba ne buôwa. 22  Bua diakalenga dienu, lekelayi kueyemena muntu wa patupu,Udi anu mupuya mu mimpempe yende patupu.* Nebamubale bua tshinyi?

Note

Anyi “Mu matuku a ku nshikidilu.”
Anyi “dilongesha.”
Anyi “neakaje malu.”
Anyi “nedipuekeshibue.”
Anyi “nedipuekeshibue.”
Tupuku.
Anyi “Udi ne mueyelu wende mu mimpempe yende.”