Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yeshaya 13:1-22

MALU ADI MU MUKANDA EU

  • Dîyi diamba bua bualu bua Babilona (1-22)

    • Dituku dia Yehowa didi pabuipi! (6)

    • Bena Madayi badi ne bua kukulula Babilona (17)

    • Bantu kabakusombela kabidi mu Babilona nansha (20)

13  Dîyi diamba bua bualu bua Babilona+ divua Yeshaya+ muana wa Amoza mumone mu tshikena kumona:   “Imanyikayi tshimanyinu*+ pa mukuna wa mabue udi kawuyi ne tshintu. Belayi dîyi, kupakajayi tshianza,Bua balue kubuela mu bibuelelu bia bantu banene.   Ndi mutumine bantu bandi muteke* dîyi.+ Ndi mubikidishe bena mvita banyi bua kuleja tshiji tshianyi,Bantu banyi badi basanka bikole ne kudisua.   Umvuayi! Musumba wa bantu ku mikuna;Bidi biumvuika bu bantu bapite bungi! Umvuayi! Diyoyo dia makalenge,Dia bisamba bisangisha pamue!+ Yehowa wa biluilu udi usangisha tshiluilu bua mvita.+   Badi bafumina mu ditunga dia kule,+Ku ditengu dia diulu,Yehowa ne bia mvita bia tshiji tshiende tshikole,Bua kubutula buloba buonso.+   Elayi kabobo ka muadi, bualu dituku dia Yehowa didi pabuipi! Nedilue bu kabutu kafumina kudi Wa Bukole Buonso.+   Ke bualu kayi bianza bionso nebitekete,Ne muoyo wa muntu yonso newenguluke ne buôwa.+   Bantu mbakuatshike buôwa bukole.+ Disubakana ne kusama mbibakuate,Bu mukaji udi udinyenga bua kulela. Badi batangilangana ne buôwa bukole,Ne mpala mitemesha kapia kudi kanyinganyinga.   Tangilayi! Dituku dia Yehowa didi dienda dilua,Dibi menemene dikale ne luonji ne tshiji tshikole,Bua kuvuija buloba tshintu tshidi tshikuatshisha buôwa,+Ne bua kubutula mu buloba benji ba mpekatu badimu. 10  Bualu mitoto ya mu diulu ne bisumbu biayi*+Kabiakufila butoke buabi to;Dîba nedikale difiike padidi dipatuka,Ne ngondo kakufila butoke buende to. 11  Nendumbuluishe buloba budi bantu basombele bua malu mabi abu,+Ne bantu babi bua tshilema tshiabu. Nentuishe lutambishi lua bena dikamakama ku ndekelu,Ne nempuekeshe kudibandisha kua bakengeshanganyi.+ 12  Nemvuije muntu ufuafua kayi utamba kumueneka kupita ne or mulengeja,+Ne bantu kabayi batamba kumueneka kupita ne or wa ku Ofî.+ 13  Ke bualu kayi nenkankishe diulu,Ne buloba nebunyukuke bumbuka pa muaba wabu+Ku tshiji tshikole tshia Yehowa wa biluilu mu dituku dia tshiji tshiende tshikole. 14  Bu kabuluku kadibu balembe ne bu tshisumbu tshia nyama idi kayiyi ne muntu wa kuyisangisha,Muntu yonso neapingane mu tshisamba tshiabu;Muntu yonso neanyemene mu buloba buabu.+ 15  Muntu yonso wasanganabu nebamutubule,Ne muntu yonso wakuatabu neakuluke ku muele wa mvita.+ 16  Nebasunsule bana babu tupese tupese mu mêsu abu,+Nebapawule nzubu yabu,Ne nebalale ne bakaji babu ku bukole. 17  Monayi, ndi mbajudila bena Madayi,+Badi bamona arjan bu tshintu tshiananaNe badi or kayi usankisha. 18  Mata abu a mikete neasunsule bansongalume;+Kabakumvuila mamuma a mu difu dia mamu luseAnyi kumvuila bana luse to. 19  Ne Babilona, bukalenge butambe kutumba mu* makalenge onso,+Bulengele ne lutambishi lua bena Kasada,+Neikale bu Sodoma ne Amola pavua Nzambi mubibutule.+ 20  Bantu kabakusombelamu nansha kakese,Ne kakuikala muaba wa kusombela mu bipungu bionso bia bantu.+ Muena Arabe kakuasamu ntenta wende,Ne balami ba mikoko kabakuikishishamu mikoko yabu to. 21  Bifukibua bia mu tshipela nebilalamu;Nzubu yabu neyuwule ne nyunyi ya bipungulu. Nyunyi ya mfiondo neyisombelamu,+Ne mbuji ya tshisuku* neyitumpikamu. 22  Bifukibua bidi biela mikunda nebididile mu bibumba biende,Ne mibuabua mu mabalasa ende a mushinga mukole. Tshikondo tshiende tshidi pabuipi, ne kabakulepesha matuku ende to.”+

Note

Anyi “mutshi wa tshimanyinu.”
Ku mua.: “bantu banyi bajidila.”
Ku mua.: “ne Kezila yabi,” bakula pamuapa bua Orion ne bisumbu bia mitoto bidi bimunyunguluke.
Anyi “tshilenge tshia.”
Anyi pamuapa: “Ne bademon badi bu mbuji.”