Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yelemiya 8:1-22

MALU ADI MU MUKANDA EU

  • Bantu badi basungula njila wa bantu ba bungi (1-7)

  • Mmeji kayi adiku padiku kakuyi dîyi dia Yehowa? (8-17)

  • Yelemiya udi udila bua ditshibuka dia Yuda (18-22)

    • “Kakuena bome mu Gilada anyi?” (22)

8  “Tshikondo atshi,” ke mudi Yehowa wamba, “nebumbushe mifuba ya bakalenge ba Yuda, mifuba ya bakokeshi bende, mifuba ya bakuidi, mifuba ya baprofete, ne mifuba ya badi basombele mu Yelushalema mu nkita yabu.  Nebayitangalaje ku dîba ne ku ngondo ne ku musumba wonso wa bia mu diulu uvuabu banange, benzele mudimu, balonde, bakebe ne binamine.+ Kabakubasangisha anyi kubajiika to. Nebalue anu bu tumvi pa mutu pa buloba.”+  “Kadi bashadile ba dîku dibi edi badi bapanduka nebasungule lufu pamutu pa muoyo mu miaba yonso indi mbatangalaja,” ke mudi Yehowa wa biluilu wamba.  “Udi ne bua kubambila ne: ‘Monayi tshidi Yehowa wamba: “Nebakuluke kabayi bajuka kabidi anyi? Muntu yeye mukudimuke, mukuabu kakukudimuka pende anyi?   Bua tshinyi bantu aba, bena Yelushalema, mbapangile lulamatu ne dipanga lulamatu didi kadiyi dijika? Badi bakuata bikole ku dishima;Badi babenga kukudimuka.+   Mvua muteye ntema ne mutungunuke ne kuteleja, kadi mushindu uvuabu bakule kawuvua muimpe to. Muntu nansha umue kavua munyingalale bua malu mabi ende anyi muebeje ne: ‘Tshindi muenze ntshinyi?’+ to. Muntu yonso udi utungunuka ne kupingana ku njila wa bantu ba bungi, bu mpunda udi uditua mu mvita.   Nansha kasonga nyunyi muulu nkamanye bikondo biaku;*Kamanda nkutshi* ne kandindi ne nyunyi wa mutendi* bidi binemeka dîba diabi dia kupingana.* Kadi bantu banyi meme kabena bajingulula dilumbuluisha dia Yehowa.”’+   ‘Mmunyi munudi mua kuamba ne: “Tudi ne meji, ne tudi ne mukenji wa* Yehowa”? Bualu mu bulelela, mbenze mudimu ne mutshi wa mukanda+ wa dishima* wa bafundi* anu bua dishima.   Bena meji mbafuishibue bundu.+ Mbakuatshike buôwa ne nebabakuate. Monayi! Mbabenge dîyi dia Yehowa,Ne mmeji kayi adibu nawu? 10  Nunku nemfile bakaji babu kudi balume bakuabu,Ne madimi abu bua ikale a bantu bakuabu;+Bualu kubangila ku udi mutambe bukese too ne ku udi mutambe bunene, muntu yonso udi upetela bintu ku mashimi;+Kubangila ku muprofete too ne ku muakuidi, muntu yonso udi wibila.+ 11  Badi bateta kuondopa ditshibuka dia muana wa bakaji wa bantu banyi pa mutu pa mutu, bamba ne:“Ditalala didiku! Ditalala didiku!” Padiku kakuyi ditalala.+ 12  Badiku bumvua bundu bua malu mabi adibu benze anyi? Kabena bumvua bundu nansha bukese! Kabena nansha bamanye mua kudiumvua bapuekeshibue milongo to!+ Nunku nebakuluke munkatshi mua badi bakuluke. Pandi mbatumina dinyoka nebalenduke,’+ ke mudi Yehowa wamba. 13  ‘Pandi mbasangisha, nembafikishe ku ndekelu wabu,’ ke mudi Yehowa wamba. ‘Kakuakuikala tumuma tushala ku muonji wa tumuma tua mvinyo nansha mfigi ku mutshi wa mfigi to, ne mabeji neafubidile. Bintu bimvua mubapeshe nebibajimine.’” 14  “Tshitudi basombele muaba eu ntshinyi? Tudisangishayi pamue, tubuelayi mu bimenga bikolesha+ ne tufuilamu. Bualu Yehowa Nzambi wetu neatubutule,Ne yeye udi utupesha mâyi malunga bua kunua,+Bualu tudi benzele Yehowa mpekatu. 15  Kuvua ditekemena dia ditalala, kadi bualu buimpe nansha bumue kabuakalua,Kuvua ditekemena dia tshikondo tshia kuondopibua, kadi kudi buôwa bukole!+ 16  Dipemba dia tubalu tuende didi diumvuika kumbukila ku Dana. Bua mutoyi wa muadi wa tubalu tuende,Ditunga dijima didi dikanka. Badi babuela ne babutula ditunga ne bionso bidimu,Tshimenga ne badi basombelamu.” 17  “Monayi ndi ntuma nyoka munkatshi muenu,Nyoka ya lulengu idibu kabayi mua kutekesha ne mupongo,Ne yoyi neyinusume bushuwa,” ke mudi Yehowa wamba. 18  Kanyinganyinga kanyi kakena mua kuondopibua;Muoyo wanyi udi usama. 19  Muadi wa dilomba diambuluisha udi ufumina mu buloba bua kuleKudi muana wa bakaji wa bantu banyi ne: “Yehowa kena mu Siona anyi? Peshi mukalenge wende kena munda muende anyi?” “Bua tshinyi mbamfiikishe munda ne mpingu yabu misonga,Ne nzambi yabu ya patupu ya ku babende?” 20  “Tshikondo tshia dinowa tshiapitshi, muvu wa luya lukole* wajiki,Kadi katuena bapandishibue!” 21  Ndi musunsula kudi ditshibuka dia muana wa bakaji wa bantu banyi;+Ndi mubungame. Buôwa bukole mbunkuate. 22  Kakuena bome* mu Gilada anyi?+ Peshi muondopianganyi* kenamu anyi?+ Bua tshinyi muana wa bakaji wa bantu banyi ki mmuondopibue?+

Note

Anyi “bikondo biaku bikosa.”
Anyi “Kakutshikutshi.”
Anyi pamuapa: “nyunyi wa mudinga.”
Anyi “luendu.”
Anyi “dilongesha dia.”
Anyi “mafi.”
Anyi “basekretere.”
Anyi “été.
Anyi “buanga bua mutshi wa bome budi butalaja bisama.”
Anyi “munganga.”