Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yelemiya 52:1-34

MALU ADI MU MUKANDA EU

  • Sedekiya udi utombokela Babilona (1-3)

  • Ditshintshimika Yelushalema kudi Nebukadenesâ (4-11)

  • Dibutuka dia tshimenga ne ntempelo (12-23)

  • Badi bakuata bantu baya nabu mu Babilona (24-30)

  • Badi bapatula Yehoyakina mu buloko (31-34)

52  Sedekiya+ uvua ne bidimu 21 pavuaye mulue mukalenge, ne wakakokesha bidimu 11 mu Yelushalema. Dîna dia mamuende divua Hamutala+ muana wa Yelemiya wa ku Libina.  Wakatungunuka ne kuenza malu mabi ku mêsu kua Yehowa, bilondeshile bionso bivua Yehoyakima muenze.+  Bivua bua tshiji tshia Yehowa ke pavua malu onso aa menzeke mu Yelushalema ne mu Yuda, too ne pavuaye mubumbushe ku mêsu kuende.+ Pashishe Sedekiya wakatombokela mukalenge wa Babilona.+  Mu tshidimu tshia tshitema tshia bukokeshi bua Sedekiya, mu ngondo wa dikumi, mu dituku dia dikumi dia ngondo au, Nebukadenesâ* mukalenge wa Babilona wakalua ne tshiluilu tshiende tshionso bua kuluisha Yelushalema. Bakasa tshitudilu bua kumuluisha ne bakibaka tshimanu tshimunyunguluke bua kumutshintshimika.+  Bakatshintshimika tshimenga too ne mu tshidimu tshia 11 tshia mukalenge Sedekiya.  Mu ngondo muinayi, mu dituku dia tshitema dia ngondo au,+ tshiyole tshia nzala tshivua tshikole menemene mu tshimenga, ne kakuvua tshiakudia bua bantu ba mu buloba to.+  Ndekelu wa bionso, bakapanda tshimanu tshia tshimenga, ne basalayi bonso bakanyema mu tshimenga butuku butuku kupitshilabu mu tshiibi tshidi pankatshi pa bimanu bibidi pabuipi ne lupangu lua mukalenge, pavua eku bena Kasada bajingile tshimenga; ne bakatungunuka ne njila wa ku Alabâ.+  Kadi tshiluilu tshia bena Kasada tshiakalonda mukalenge, kupetelabu Sedekiya+ mu mpata ya bipela ya Yeliko, ne basalayi bende bonso bakamuangalaka, kumushiyabu.  Nunku bakakuata mukalenge, kubandabu nende kudi mukalenge wa Babilona ku Libela mu buloba bua Hamate, ne yeye kumukoselaye tshibawu. 10  Mukalenge wa Babilona wakashipa bana ba Sedekiya mu mêsu muende, kushipaye kabidi bakokeshi bonso ba Yuda mu Libela amu. 11  Pashishe mukalenge wa Babilona wakashipa Sedekiya mêsu,+ kumusuikaye ne nkanu ya tshiamu tshia mitaku, kuyaye nende ku Babilona, ne kumulamaye mu buloko too ne dituku dia lufu luende. 12  Mu ngondo muitanu, mu dituku dia dikumi dia ngondo au, mmumue ne: mu tshidimu tshia 19 tshia mukalenge Nebukadenesâ* mukalenge wa Babilona, Nebuzaladana mfumu wa balami, uvua muena mudimu wa mukalenge wa Babilona, wakabuela mu Yelushalema.+ 13  Wakuosha nzubu wa Yehowa,+ nzubu* wa mukalenge, ne nzubu yonso ya mu Yelushalema; wakuosha kabidi nzubu munene yonso. 14  Tshiluilu tshijima tshia bena Kasada tshivua ne mfumu wa balami tshiakupula bimanu bivua binyunguluke Yelushalema.+ 15  Nebuzaladana mfumu wa balami wakakuata bamue bantu bapuekele ba bantu bavua bashale bavuabu bashiye mu tshimenga, kuyaye nabu. Wakaya kabidi ne bantu bavua banyeme badifile kudi mukalenge wa Babilona kabidi ne bashadile ba benji ba midimu ya bianza bapiluke.+ 16  Kadi Nebuzaladana mfumu wa balami wakashiya bamue bantu ba mu buloba bavua bapele ba menemene bua kuikalabu badimi ba madimi a tumuma tua mvinyo ne bantu ba kuenzeja midimu mikole ku bukole.+ 17  Bena Kasada bakakosolola makunji a tshiamu tshia mitaku+ a ku nzubu wa Yehowa ne matempu+ ne Mbuu wa tshiamu tshia mitaku+ bivua mu nzubu wa Yehowa bitupa bitupa, ne bakaya ne biamu bia mitaku bionso abi mu Babilona.+ 18  Bakangata kabidi bintu bia kuboya nabi butu, bikasu, bintu bia kujima nabi kapia, bibakudi,+ makopo+ ne bintu bionso bia tshiamu tshia mitaku bivuabu benza nabi mudimu wa ku ntempelo. 19  Mfumu wa balami wakangata malongo,+ bintu bia kuambuila kapia, bibakudi, bintu bia kuboya nabi butu, bitekelu bia miendu,+ makopo, ne bibakudi bivua bienza ne or muimpe ne arjan muimpe.+ 20  Bua makunji abidi, Mbuu, ngombe 12 ya tshiamu tshia mitaku+ ivua muinshi mua Mbuu, ne matempu bivua mukalenge Solomo muenze bua nzubu wa Yehowa, bujitu bua tshiamu tshia mitaku tshia bintu bionso ebi kabuvua kupima. 21  Kadi bua makunji, dikunji dionso divua ne bule bua nkubita* 18, muonji wa kupima nawu bule wa nkubita 12 uvua mua kudinyunguluka;+ mupimbu wadi uvua wa bunene bua minu inayi,* ne divua ditubuluke munda. 22  Mutu wa dikunji uvua ku mutu kuadi uvua wa tshiamu tshia mitaku; ne bule bua mutu umue buvua bua nkubita itanu;+ ne bukondo bua tukanu ne bimuma bia grenade bivua binyunguluke mutu wa dikunji bivua bienza bionso ne tshiamu tshia mitaku. Dikunji dibidi divua anu bu diodi adi, kabidi ne bimuma bia grenade. 23  Mu nseke muvua bimuma bia grenade 96; bimuma bionso bisanga bivua binyunguluke bukondo bua tukanu bivua lukama.+ 24  Mfumu wa balami wakakuata kabidi Selaya+ mfumu wa bakuidi, Sefanya+ muakuidi tshindondi, ne balami ba ku biibi basatu.+ 25  Wakakuata mu tshimenga muena mudimu umue wa mu lubanza lua mukalenge uvua mutekibue ku mutu kua basalayi, bantu muanda mutekete bena dia mukalenge ba menemene bavuabu bapete mu tshimenga, kabidi ne mufundi wa mfumu wa tshiluilu uvua usangisha bantu ba mu buloba, ne bantu 60 ba mu bantu ba tshianana ba mu buloba bavuabu bapete kabidi mu tshimenga. 26  Nebuzaladana mfumu wa balami wakabakuata, kuyaye nabu kudi mukalenge wa Babilona ku Libela. 27  Mukalenge wa Babilona wakabakuma, kubashipaye ku Libela+ mu buloba bua Hamate. Nunku bakumbusha Yuda mu buloba buende kuyabu nende ku babende.+ 28  Aba mbantu bavua Nebukadenesâ* mukuate muye nabu: mu tshidimu tshia muanda mutekete, bena Yuda 3 023.+ 29  Mu tshidimu tshia 18 tshia Nebukadenesâ,*+ bakumbuka ku Yelushalema ne bantu* 832. 30  Mu tshidimu tshia 23 tshia Nebukadenesâ,* Nebuzaladana mfumu wa balami wakakuata bena Yuda, kuyaye nabu, bantu* 745.+ Bantu bonso basanga bavuabu bakuate baye nabu, bavua bantu* 4 600. 31  Pashishe mu tshidimu tshia 37 tshia dikuatshibua dia Yehoyakina+ mukalenge wa Yuda, mu ngondo wa 12, mu dituku dia 25 dia ngondo au, tshidimu tshivua Ewile-melodaka mukalenge wa Babilona mulue mukalenge, wakalekelela* Yehoyakina mukalenge wa Yuda, kumupatulaye mu buloko.+ 32  Wakakula nende bimpe, kubandishaye nkuasa wende wa bukalenge ku mutu kua nkuasa ya bukalenge ya bakalenge bakuabu bavua nende mu Babilona. 33  Nunku Yehoyakina wakumbusha bilamba biende bia buloko, ne uvua udia misangu yonso kumpala kuende matuku ende onso a muoyo. 34  Bavua bamupesha biakudia bungi bukosa misangu yonso bia kudi mukalenge wa Babilona, ku dituku ku dituku, too ne dituku dia lufu luende, matuku ende onso a muoyo.

Note

Ku mua.: “Nebukadelesâ,” mfundilu mukuabu wa dîna edi.
Ku mua.: “Nebukadelesâ,” mfundilu mukuabu wa dîna edi.
Anyi “dibalasa.”
Nkubita uvua ne santimetre 44,5. Tang. Tshis. B14.
Bunene bua munu buvua santimetre 1,85. Tang. Tshis. B14.
Ku mua.: “Nebukadelesâ,” mfundilu mukuabu wa dîna edi.
Ku mua.: “Nebukadelesâ,” mfundilu mukuabu wa dîna edi.
Anyi “anyima.”
Ku mua.: “Nebukadelesâ,” mfundilu mukuabu wa dîna edi.
Anyi “anyima.”
Anyi “anyima.”
Ku mua.: “wakabandisha mutu wa.”