Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yelemiya 5:1-31

MALU ADI MU MUKANDA EU

  • Bantu badi babenga dinyoka dia Yehowa (1-13)

  • Dibutula kadi kadiyi dibutula dia butubutu to (14-19)

  • Yehowa udi ubueja bantu ku tshilumbuluidi (20-31)

5  Tambakanayi mu misesu ya Yelushalema. Kenzakanayi ne teyayi ntema. Kebayi mu miaba yende ya tshinsangansanga bua kumonaBinuikala mua kupeta muntu udi wenza malu ne buakane,+Muntu udi ukeba bua kuikala ne lulamatu,Ne nemfuile tshimenga etshi luse.   Nansha bobu bambe ne: “Bushuwa bu mudi Yehowa ne muoyo!” Badi baditshipa anu ku bualu bua mashimi.+   Yehowa wetu, mêsu ebe kaenaku akeba lulamatu anyi?+ Wakabakuma, kadi kabivua bibenzele bualu.* Wakababutula, kadi bakabenga kuitaba dinyoka.+ Bakavuija mpala yabu mikole kupita dibue,+Ne bakabenga kukudimuka.+   Kadi ngakadiambila ne: “Bushuwa aba badi ne bua kuikala bashadile. Badi benza malu ne butshimbakane, bualu ki mbamanye njila wa Yehowa,Dilumbuluisha dia Nzambi wabu.   Nenye kudi bantu bende lumu ne nengakule nabu,Bualu badi ne bua kuikala bateye ntema ku njila wa Yehowa,Dilumbuluisha dia Nzambi wabu.+ Kadi bavua batshibule buonso buabu tshikokediNe bakose nkanu* ivua mibasuike.”   Ke bualu kayi ntambue wa muitu udi ubabunda,Mbua wa ditu wa mu mpata ya bipela udi utungunuka ne kubabutula,Nkashama udi walamina ku bimenga biabu. Muntu yonso udi upatukamu badi bamusunsulula. Bualu dishipa diabu dia mikenji ndia bungi;Bienzedi biabu bia dipanga lulamatu mbivule.+    Mmunyi mundi mua kukufuila luse bua bualu ebu? Bana bebe mbandekele,Ne badi baditshipa mu dîna dia tshidi katshiyi Nzambi.+ Mvua mubakumbajile majinga abu,Kadi bakatungunuka ne kuenda masandi,Ne bavua bapuile ku nzubu wa ndumba.   Badi bu tubalu tudi tuzuka, tudi ne dijinga dikole dia kusangila,Muntu yonso udi utungunuka ne kuela mukaji wa muntu mukuabu+ dîyi bu muadi wa kabalu.   “Tshiena mua kubalumbuluisha bua malu aa anyi?” ke mudi Yehowa ukonka. “Tshiena* mua kudisombuela kudi tshisamba tshia nunku anyi?”+ 10  “Bandayi bua kunyanga mabula ende a mu budimi bua tumuma tua mvinyo ne butulayi,Kadi kanubutudi butubutu+ to. Umbushayi matamba ende adi masampile,Bualu ki nga Yehowa to. 11  Bualu nzubu wa Isalele ne nzubu wa Yuda Mmingele mâyi ku makasa bibi be!” ke mudi Yehowa wamba.+ 12  “Mbavile Yehowa, ne badi batungunuka ne kuamba ne:‘Kakuenza bualu nansha bumue.*+ Dikenga nansha dimue kadiakutukuata;Katuakumona muele wa mvita nansha tshiyole tshia nzala to.’+ 13  Baprofete mbuwule tente ne lupepele,Ne dîyi* kadiena munda muabu. Bualu ebu bubakuate!” 14  Nunku, mona tshidi Yehowa, Nzambi wa biluilu, wamba: “Bu mudi bantu aba bamba nunku,Mona ndi mvuija mêyi anyi kapia mukana muebe,+Ne bantu aba badi nkunyi,Ne kapia nekabashidishe.”+ 15  “Mona ndi nkutuadila tshisamba tshidi tshifumina kule, wewe nzubu wa Isalele,”+ ke mudi Yehowa wamba. “Ntshisamba tshia matuku a bungi. Ntshisamba tshia kale,Tshisamba tshidi ne muakulu uudi kuyi mumanye,Ne tshidi ne ngakuilu uudi kuyi mua kumvua.+ 16  Nsapu wabu wa mikete udi bu lukita ludi buashi;Buonso buabu mbena mvita. 17  Nebabutule bintu biebe binowa ne biakudia biebe.+ Nebabutule bana bebe ba balume ne bana bebe ba bakaji. Nebabutule mikoko yebe ne ngombe yebe. Nebabutule mionji yebe ya tumuma tua mvinyo ne mitshi yebe ya mfigi. Nebabutule bimenga biebe bikolesha biudi weyemena ku muele wa mvita.” 18  “Kadi nansha mu matuku au,” ke mudi Yehowa wamba, “tshiakunubutula butubutu+ to. 19  Padibu bebeja ne: ‘Bua tshinyi Yehowa Nzambi wetu mmutuenzele malu onso aa?’ neubandamune ne: ‘Anu bu munuvua bandekele bua kuenzela nzambi wa ku babende mudimu mu buloba buenu, ke munuenzela bantu ba ku babende mudimu mu buloba budi kabuyi buenu.’”+ 20  Amba bualu ebu mu nzubu wa Yakoba,Ne ubumanyishe mu Yuda, wamba ne: 21  “Telejayi bualu ebu, nuenu bantu batshimbakane badi kabayi ne meji:*+ Bobu badi ne mêsu, kadi kabena bamona;+Bobu badi ne matshi, kadi kabena bumvua.+ 22  ‘Kanuena nuntshina anyi?’ ke mudi Yehowa ukonka,‘Kanuena mua kuzakala kumpala kuanyi anyi? Meme ke uvua muteke lusenga bu mukalu wa mbuu,Mukenji wa kashidi udi mbuu kayi mua kusambuka. Nansha mavuala ende owu asampuka, kaena mua kupita to;Nansha owu akungula, kaena anu mua kuya dia muamua diawu to.+ 23  Kadi bantu aba badi ne muoyo mupape wa buntomboji;Mbasesuke ne mbalonde wabu njila.+ 24  Kadi kabena bamba mu muoyo wabu ne: “Mpindieu tutshinayi Yehowa Nzambi wetu,Yeye udi ufila mvula mu tshikondo tshiende,Mvula ya mbedi ne mvula ya ndekelu,Yeye udi utulamina mbingu mikosa ya dinowa bintu.”+ 25  Bilema bienu nuenu mbipangishe malu aa bua kuenzekawu;Mpekatu yenu nuenu mminupangishe tshidi tshimpe.+ 26  Bualu munkatshi mua bantu banyi mudi bantu babi. Badi batungunuka ne kutentekela bu padi bilembi bia nyunyi bibutama. Badi bela buteyi bua lufu. Bantu ke badibu bakuata. 27  Bu nsanji udi muwule tente ne nyunyi,Ke mudi nzubu yabu miuwule tente ne mashimi.+ Ke bualu kayi mbalue bantu ba bukole ne babanji. 28  Mbase manyi ne mbasenene;Mbuwule tente ne malu mabi ayila too ne panshi. Kabena balumbuluila muana udi mufuishe tatuende tshilumbu tshiende,+Bua bamone mua kuya kumpala;Ne badi bapala bapele kulumbuluisha kuakane.’”+ 29  “Tshiena mua kubalumbuluisha bua malu aa anyi?” ke mudi Yehowa ukonka. “Tshiena* mua kudisombuela kudi tshisamba tshia nunku anyi? 30  Bualu kampanda bua dikema ne budi buenza buôwa mbuenzeke mu buloba: 31  Baprofete badi bamba mêyi a buprofete a mashimi,+Ne bakuidi badi bakokesha ku bukokeshi buabu nkayabu. Ne bantu banyi meme mbanange mudibi bienzeka amu.+ Kadi nenuenze tshinyi padi nshikidilu ulua?”

Note

Ku mua.: “kabakateketa.”
Ku mua.: “mionji.”
Anyi “Anyima wanyi kena.”
Anyi pamuapa: “Yeye kenaku.”
Mmumue ne: dîyi dia Nzambi.
Ku mua.: “nuenu bantu batshimbakane badi kabayi ne muoyo wa munda.”
Anyi “Anyima wanyi kena.”