Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yelemiya 46:1-28

MALU ADI MU MUKANDA EU

  • Mêyi a buprofete a bualu buafikila Ejipitu (1-26)

    • Ejipitu udi ne bua kutshimunyibua kudi Nebukadenesâ (13, 26)

  • Malu malaya Isalele (27, 28)

46  Edi ndîyi divua Yehowa muambile muprofete Yelemiya bua bualu bua bisamba:+  Bua Ejipitu,+ bua bualu bua tshiluilu tshia Palô Neko,+ mukalenge wa Ejipitu, uvua ku muelelu wa Musulu wa Pelata ne uvuabu batshimuine ku Kâkemisha kudi Nebukadenesâ* mukalenge wa Babilona mu tshidimu tshinayi tshia Yehoyakima+ muana wa Yoshiya, mukalenge wa Yuda, diamba ne:   “Longololayi ngabu yenu mikese* ne ngabu yenu minene,Ne ndayi kumpala batangile ku mvita.   Suikayi tubalu mikaba ne bandayipu, nuenu bendeshi ba tubalu. Dilongayi ne vualayi bifulu bienu bia mvita. Nonayi mafuma ne vualayi tuzaku tuenu tua tuamu.   ‘Bua tshinyi ndi mbamona bakuatshike buôwa? Badi balukila tshianyima, bena mvita babu mbazaza. Mbanyeme bipapu, bena mvita babu ki mbakudimuke to. Buôwa budi miaba yonso,’ ke mudi Yehowa wamba.   ‘Muena lubilu lukole kena mua kunyema, ne bena mvita kabena mua kupanduka. Ku nord, ku muelelu wa Musulu wa Pelata,Mbatetuke ne mbadishinde.’+   Nnganyi eu udi ubanda bu Musulu wa Nile,Bu misulu ya mâyi a mavuala makole?   Ejipitu udi ubanda anu bu Musulu wa Nile,+Bu misulu ya mâyi a mavuala makole,Ne udi wamba ne: ‘Nembande ne nembuikile buloba. Nembutule tshimenga ne badi basombelamu.’   Bandayi, nuenu tubalu! Nyemayi bu bapale, nuenu matempu a mvita! Bena mvita baye kumpala,Kushi ne Puta badi bamanye kuenza mudimu ne ngabu,+Ne bena Luda+ badi bamanye kuenza mudimu ne buta bua mukete ne babunana.*+ 10  “Dituku adi ndituku dia Mukalenge Mutambe Bunene, Yehowa wa biluilu, ndituku dia disombuela bua kudisombuelaye kudi baluishi bende. Muele wa mvita newubutule, newukute ne newumane nyota ne mashi abu, bualu Mukalenge Mutambe Bunene, Yehowa wa biluilu, udi ne mulambu* mu buloba bua ku nord pabuipi ne Musulu wa Pelata.+ 11  Banda ku Gilada bua kupeta buanga bua bome,+Wewe muana wa bakaji wa Ejipitu utshidi kamama. Udi muvudije manga ebe bua tshianana,Bualu kakuena luondapu buebe wewe.+ 12  Bisamba mbiumvue lumu lua dipuekeshibua diebe dia milongo,+Ne lubila luebe nduwuje buloba. Bualu muena mvita udi udituta kudi muena mvita mukuabu,Ne bonso babidi badi bakuluka panshi pamue.” 13  Edi ndîyi divua Yehowa muambile muprofete Yelemiya bua dilua dia Nebukadenesâ* mukalenge wa Babilona bua kubutula buloba bua Ejipitu:+ 14  “Ambayi bualu ebu mu Ejipitu, bumanyishayi mu Migedola.+ Bumanyishayi mu Nofa* ne mu Tapanehese.+ Ambayi ne: ‘Dilongayi ne dilongololayi,Bualu muele wa mvita newubutule nseke yenu yonso. 15  Bua tshinyi bantu bebe ba bukole mbakombibue? Kabavua batue makasa abu panshi,Bualu Yehowa mmubasakile panshi. 16  Badi batetuka ne bakuluka ba bungi. Badi bambilangana ne: “Juka! Tupinganayi kudi tshisamba tshietu ne mu buloba buetuBua bualu bua muela wa mvita wa tshikisu.”’ 17  Kuoku aku mbamanyishe ne:‘Palô mukalenge wa Ejipitu udi anu mutoyi wa tshiananaUdi mupitshishe mpunga uvua mumueneke.’*+ 18  ‘Bushuwa bu mundi ne muoyo,’ ke mudi Mukalenge, muena dîna dia Yehowa wa biluilu wamba,‘Yeye* neabuele bu Tabô+ munkatshi mua mikunaNe bu Kâmele+ kumpenga kua mbuu. 19  Longolola mabuki ebe bua tshimuangi,Wewe muana wa bakaji udi musombele mu Ejipitu. Bualu Nofa* nealue tshintu tshidi tshikuatshisha buôwa;Nebamutue kapia* ne nebamushiye kayi ne muntu musombelamu.+ 20  Ejipitu udi bu lukungulu lua ngombe luimpe kumona,Kadi mabubu nealue bua kumusuma afumina ku nord. 21  Nansha basalayi bende badiye ufuta badi munkatshi muende badi bu bana ba ngombe ba manyi,Kadi mbele pabu nyima ne mbanyeme pamue. Kabavua mua kutua makasa abu panshi,+Bualu dituku dia kabutu kabu ndibakuate,Tshikondo tshiabu tshia kulumbuluishibua.’ 22  ‘Tshiona tshiende tshidi bu tshia nyoka ulamba,Bualu badi bamulonda ne bukole, bikale ne tusuyi,Bu bantu badi bupula mitshi.* 23  Nebupule ditu diende,’ ke mudi Yehowa wamba, ‘nansha mudidi dimueneka dishitakane. Bualu bobu mba bungi kupita mpasu, bungi kabuyi kubala. 24  Muana wa bakaji wa Ejipitu neafuishibue bundu. Neafidibue mu bianza bia bantu ba ku nord.’+ 25  “Yehowa wa biluilu, Nzambi wa Isalele udi wamba ne: ‘Mpindieu ndi ntuma ntema yanyi kudi Amona+ wa mu No,*+ kudi Palô, kudi Ejipitu, kudi nzambi yende,+ ne kudi bakalenge bende, eyowa, kudi Palô ne bonso badi bamueyemena.’+ 26  “‘Nembafile mu tshianza tshia badi bakeba kuangata muoyo wabu,* kudi Nebukadenesâ* mukalenge wa Babilona+ ne bena mudimu bende. Kadi pashishe bantu nebasombelamu bu mu bikondo bia kale,’ ke mudi Yehowa wamba.+ 27  ‘Kadi wewe, muena mudimu wanyi Yakoba, kuikadi ne buôwa to,Ne kutshinyi, wewe Isalele.+ Bualu nenkupandishe kumbukila kuleNe bana* bebe kumbukila mu buloba budibu bakuatshibue.+ Yakoba neapingane ne neikale talalaa, kayi utatshishibua,Kakuyi muntu wa kubatshinyisha.+ 28  Nunku kuikadi ne buôwa to, muena mudimu wanyi Yakoba,’ ke mudi Yehowa wamba, ‘bualu ndi nebe. Nembutule ba munkatshi mua bisamba bionso mumvua mukutangalaje,+Kadi wewe, tshiakukubutula+ to. Nenkunyoke* mu mushindu mukumbane,+Kadi mu mishindu yonso tshiakupanga kukunyoka to.’”

Note

Ku mua.: “Nebukadelesâ,” mfundilu mukuabu wa dîna edi.
Ngabu mukese uvuabu batamba kuambula kudi bedi ba mikete.
Ku mua.: “babudiata.”
Ku mua.: “tshintu tshia kushipa.”
Ku mua.: “Nebukadelesâ,” mfundilu mukuabu wa dîna edi.
Anyi “Mempi.”
Ku mua.: “tshikondo tshivua tshikumbane.”
Mmumue ne: Mutshimunyi wa Ejipitu.
Anyi “Mempi.”
Anyi pamuapa: “nealue buloba bua munda mutupu.”
Anyi “bangula nkunyi.”
Mmumue ne: Tebesa.
Anyi “bakeba anyima wabu.”
Ku mua.: “Nebukadelesâ,” mfundilu mukuabu wa dîna edi.
Ku mua.: “dimiinu.”
Anyi “nenkubele.”