Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yelemiya 43:1-13

MALU ADI MU MUKANDA EU

  • Bantu badi babenga kutumikila ne badi baya mu Ejipitu (1-7)

  • Dîyi dia Yehowa kudi Yelemiya mu Ejipitu (8-13)

43  Pavua Yelemiya mujikije kuambila bantu bonso aba mêyi onso aa a kudi Yehowa Nzambi wabu, dîyi dionso divua Yehowa Nzambi wabu mumutume bua kubambila,  Azaya muana wa Hoshaya, Yohanana+ muana wa Kalea, ne bantu bena dipetu bonso bakambila Yelemiya ne: “Biudi wamba abi mbia mafi! Yehowa Nzambi wetu ki mmukutume bua kuamba ne: ‘Kanuyi mu Ejipitu bua kusombelamu to.’  Kadi Baluka+ muana wa Neliya udi ukusaka bua kutuluisha, kutufila mu tshianza tshia bena Kasada bua kutushipabu anyi bua kutukuatabu, kuya netu mu Babilona.”+  Nunku Yohanana muana wa Kalea ne bamfumu bonso ba tshiluilu ne bantu bonso bakabenga kutumikila dîyi dia Yehowa dia kushala mu buloba bua Yuda.  Kadi Yohanana muana wa Kalea ne bamfumu bonso ba tshiluilu bakangata bashadile bonso ba mu Yuda bavua bapingane bua kusombela mu buloba bua Yuda bafumina mu bisamba bionso muvuabu babatangalaje.+  Bakangata balume, bakaji, bana ne bana ba bakaji ba mukalenge ne muntu* yonso uvua Nebuzaladana+ mfumu wa balami mushile Gedaliya+ muana wa Ahikama+ muana wa Shafana,+ pamue ne muprofete Yelemiya ne Baluka muana wa Neliya.  Bakaya mu buloba bua Ejipitu, bualu kabavua batumikile dîyi dia Yehowa to, ne bakafika too ne ku Tapanehese.+  Pashishe dîyi dia Yehowa diakalua kudi Yelemiya ku Tapanehese, diamba ne:  “Angata mabue manene mu tshianza tshiebe, uasokoke mu potopoto mu madioto a tshibumba tshia ku tshibuelelu tshia nzubu wa Palô mu Tapanehese, bena Yuda batangile. 10  Pashishe ubambile ne: ‘Monayi tshidi Yehowa wa biluilu, Nzambi wa Isalele, wamba: “Monayi ndi mbikidisha Nebukadenesâ* mukalenge wa Babilona, muena mudimu wanyi,+ ne nenteke nkuasa wende wa bukalenge pa mutu pa mabue andi musokoke aa, yeye nealabaje ntenta wende wa bukalenge pa mutu pawu.+ 11  Neabuele ne neakume buloba bua Ejipitu.+ Muntu yonso udi mufundila tshipupu tshia lufu, ku tshipupu tshia lufu; muntu yonso udi mufundila dikuatshibua, ku dikuatshibua; ne muntu yonso udi mufundila muele wa mvita, ku muele wa mvita.+ 12  Nentue nzubu* ya nzambi ya mu Ejipitu kapia,+ ne yeye neayoshe, ne neayikuate neaye nayi. Yeye neadijingile buloba bua Ejipitu anu bu mudi mulami wa mikoko udijingila tshilamba tshiende, ne neumbukamu mu ditalala.* 13  Neatshibule makunji* a Bete-shemeshe* bitupa bitupa mu buloba bua Ejipitu, ne neoshe nzubu* ya nzambi ya mu Ejipitu ne kapia.”’”

Note

Anyi “anyima.”
Ku mua.: “Nebukadelesâ,” mfundilu mukuabu wa dîna edi.
Anyi “ntempelo.”
Anyi “kabayi bamuenzele bibi.”
Anyi “makunji a mabue.”
Anyi “Nzubu (ntempelo) wa Dîba,” mmumue ne: Heliopolise.
anyi “ntempelo.”