Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yelemiya 42:1-22

MALU ADI MU MUKANDA EU

  • Bantu badi balomba Yelemiya asambile bua kulomba buludiki (1-6)

  • Yehowa udi wandamuna ne: “Kanuyi mu Ejipitu to” (7-22)

42  Pashishe bamfumu bonso ba tshiluilu ne Yohanana+ muana wa Kalea, Yezanya muana wa Hoshaya, ne bantu bonso, kubangila ku udi mutambe bukese too ne ku udi mutambe bunene, bakasemena,  kuambilabu muprofete Yelemiya ne: “Teleja koku dilomba dietu dia kuanyishibua, ne lombaku Yehowa Nzambi webe bua bualu buetu, bua bualu bua bashadile bonso aba, bualu anu ndambu wa ku ba bungi ke udi mushale,+ anu muudi mumone emu.  Yehowa Nzambi webe atuleje njila utudi ne bua kuendela ne tshitudi ne bua kuenza.”  Muprofete Yelemiya wakabandamuna ne: “Ndi munuteleje, ne ndi ndomba Yehowa Nzambi wenu bilondeshile dilomba dienu; ne dîyi dionso didi Yehowa unuandamuna, nennuambiladi. Tshiakunusokoka dîyi nansha dimue to.”  Bakandamuna Yelemiya ne: “Yehowa ikale ntemu mulelela ne wa lulamatu watutuisha, tuetu katuyi benze menemene anu mudi Yehowa Nzambi webe ututumina dîyi ku butuangaji buebe.  Nansha diodi dimpe anyi dibi, netutumikile dîyi dia Yehowa Nzambi wetu, utudi tukutuma kudiye, bua malu ende bimpe buetu tuetu bualu tudi tutumikila dîyi dia Yehowa Nzambi wetu.”  Pakapita matuku dikumi, dîyi dia Yehowa diakalua kudi Yelemiya.  Nunku yeye wakabikidisha Yohanana muana wa Kalea ne bamfumu bonso ba tshiluilu bavua nende ne bantu bonso, kubangila ku udi mutambe bukese too ne ku udi mutambe bunene.+  Wakabambila ne: “Monayi tshidi Yehowa Nzambi wa Isalele, unuvua bantume kudiye bua kufikisha dilomba dienu dia kuanyishibua kumpala kuende, wamba: 10  ‘Nuenu bashale bushuwa mu buloba ebu, dîba adi meme nennuibake, tshiakunupula to, ne nennukune, tshiakunujula to, bualu nengumvue kanyinganyinga* bua dikenga dindi munukebele.+ 11  ‘Kanumvu buôwa bua bualu bua mukalenge wa Babilona unudi nutshina to.’+ “‘Kanumvu buôwa bua bualu buende,’ ke mudi Yehowa wamba, ‘bualu ndi nenu bua kunupandisha ne bua kunusungila mu tshianza tshiende. 12  Nennuleje luse,+ ne yeye neanumvuile luse ne neanupingaje mu buloba buenu. 13  “‘Kadi nuenu bambe ne: “Tòo, katuakushala mu buloba ebu to!” ne nuenu babenge kutumikila dîyi dia Yehowa Nzambi wenu, 14  nuamba ne: “Tòo, kadi tuetu netuye mu buloba bua Ejipitu,+ mutuikala katuyi tumona mvita anyi tumvua muadi wa mpungi anyi tukengela tshiakudia; muomu amu ke mutuasombela,” 15  nunku umvuayi dîyi dia Yehowa, nuenu bashadile ba Yuda. Monayi tshidi Yehowa wa biluilu, Nzambi wa Isalele, wamba: “Nuenu bapangadije ne muoyo mujima bua kuya mu Ejipitu ne nuenu baye bua kusombelamu,* 16  dîba adi muele wa mvita muine unudi nutshina au neunukuatshile mu buloba bua Ejipitu amu, ne tshiyole tshia nzala tshine tshinudi nutshina atshi netshinulondele mu Ejipitu, ne nenufuilamu.+ 17  Bantu bonso badi bapangadije bua kuya mu Ejipitu bua kusombelamu, nebafue ku muele wa mvita, ku tshiyole tshia nzala, ne ku tshipupu.* Muntu nansha umue wa kudibu kakupanduka peshi kunyema dikenga dingabatumina to.”’ 18  “Bualu monayi tshidi Yehowa wa biluilu, Nzambi wa Isalele, wamba: ‘Anu muvua tshiji tshianyi ne tshiji tshianyi tshikole bitshikijibue pa bantu bavua basombele mu Yelushalema,+ ke muikala tshiji tshianyi tshikole mua kuitshikijibua pambidi penu nuenu baye mu Ejipitu, ne nenulue mulawu, tshintu tshidi tshikuatshisha buôwa, diakabi, ne tshipendu,+ ne kanuakumona kabidi muaba eu nansha.’ 19  “Yehowa mmuakule bua bualu buenu, nuenu bashadile ba Yuda. Kanuyi mu Ejipitu to. Numanye bimpe ne: ndi munudimuije lelu eu 20  ne: tshilema tshienu netshinujimijile mioyo* yenu. Bualu nuvua bantume kudi Yehowa Nzambi wenu, nuamba ne: ‘Lomba Yehowa Nzambi webe bua bualu buetu, ne tuambila bualu buonso budi Yehowa Nzambi wetu wamba, ne tuetu netubuenze.’+ 21  Ndi munuambile bualu ebu lelu eu, kadi kanuakutumikila dîyi dia Yehowa Nzambi wenu anyi kuenza bualu nansha bumue buvuaye muntume bua kunumanyisha to.+ 22  Nunku numanye bimpe ne: nenufuile muaba unudi nujinga kuya bua kusombela+ au ku muele wa mvita, ku tshiyole tshia nzala, ne ku tshipupu.”

Note

Anyi “nengumvue dibungama.”
Anyi “kusomba bua tshikondo kampanda.”
Anyi “disama.”
Anyi “anyima.”