Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yelemiya 40:1-16

MALU ADI MU MUKANDA EU

  • Nebuzaladana udi ulekela Yelemiya (1-6)

  • Badi bateka Gedaliya ku mutu kua ditunga (7-12)

  • Tshifufu tshielela Gedaliya (13-16)

40  Dîyi diakalua kudi Yelemiya difumina kudi Yehowa panyima pa Nebuzaladana+ mfumu wa balami mumane kumulekeela ku Lama.+ Wakaya nende kuntu aku musuika nkanu, ne yeye uvua munkatshi mua bantu ba mu Yelushalema ne ba mu Yuda bavuabu bakuate, baya nabu mu Babilona.  Pashishe mfumu wa balami wakangata Yelemiya, kumuambilaye ne: “Yehowa Nzambi webe ukavua muambe bua dikenga edi didi dikuate muaba eu,  ne Yehowa mmuditume anu muvuaye muambe, bualu nuenu nuvua benzele Yehowa mpekatu ne kanuvua batumikile dîyi diende. Ke bualu kayi bualu ebu mbunukuate.+  Mpindieu, ndi nkusulula lelu eu nkanu idi ku bianza biebe. Wewe mumone ne: mbimpe bua kuya nanyi ku Babilona, luaku tuye, ne nenkulame. Kadi wewe kuyi musue kuya nanyi ku Babilona, kulu to. Tangila! buloba bujima budi kumpala kuebe. Ndaku kuonso kuudi usungula bua kuya.”+  Yelemiya kayi muanji kukudimuka, Nebuzaladana wakamba ne: “Pingana kudi Gedaliya+ muana wa Ahikama+ muana wa Shafana,+ udi mukalenge wa Babilona muteke ku mutu kua bimenga bia Yuda, ne usombe nende munkatshi mua bantu; peshi ndaku kuonso kuudi usungula bua kuya.” Pashishe mfumu wa balami wakamupesha ndambu wa biakudia ne dipa, ne wakamulekela bua aye.  Nunku Yelemiya wakaya kudi Gedaliya muana wa Ahikama ku Misepa+ ne wakasomba nende munkatshi mua bantu bavua bashale mu buloba abu.  Pakapita matuku, bamfumu bonso ba tshiluilu bavua mu mpata ne bantu babu bakumvua ne: mukalenge wa Babilona uvua muteke Gedaliya muana wa Ahikama ku mutu kua ditunga, ne uvua mumuteke ku mutu kua bantu balume, kua bantu bakaji ne kua bana ba mu bantu bapele ba mu ditunga adi bavuabu kabayi baye nabu mu Babilona. +  Nunku bakalua kudi Gedaliya ku Misepa.+ Mu bantu abu muvua: Yishemaele+ muana wa Netanya, Yohanana+ ne Yonatana bana ba Kalea, Selaya muana wa Tanehumeta, bana ba Efayi muena Netofa, ne Yezanya+ muana wa muena Mâkata, pamue ne bantu babu.  Gedaliya muana wa Ahikama muana wa Shafana wakaditshipa kudibu ne kudi bantu babu wamba ne: “Kanutshinyi bua kuenzela bena Kasada mudimu. Sombayi mu buloba ebu, ne enzelayi mukalenge wa Babilona mudimu, ne malu neende bimpe buenu nuenu.+ 10  Meme nenshale mu Misepa bua kuikala muleji mpala wenu kudi* bena Kasada badi balua kutudi. Kadi nudi ne bua kusangisha mvinyo, bimuma bia mu muvu wa luya lukole,* ne mafuta, nubiele mu bintu bienu bia kulamina bintu ne nusombe mu bimenga binudi bangate.”+ 11  Bena Yuda bonso bavua mu Moaba, mu Amona ne mu Edome, kabidi ne aba bavua mu matunga makuabu onso, bakumvua pabu ne: mukalenge wa Babilona uvua mushiye bashadile mu Yuda ne kabidi ne: uvua mubatekele Gedaliya muana wa Ahikama muana wa Shafana ku mutu kuabu. 12  Nunku bena Yuda bonso bakabanga kupingana bafumina miaba yonso ivuabu babatangalaje, ne bakalua mu buloba bua Yuda kudi Gedaliya ku Misepa. Bakasangisha mvinyo ne bimuma bia mu muvu wa luya lukole* bia bungi menemene. 13  Yohanana muana wa Kalea ne bamfumu bonso ba tshiluilu bavua mu mpata bakalua kudi Gedaliya ku Misepa. 14  Bakamuambila ne: “Kuena mumanye ne: Bâlisa mukalenge wa bena Amona+ mmutume Yishemaele muana wa Netanya bua kukushipa* anyi?”+ Kadi Gedaliya muana wa Ahikama kakabitaba to. 15  Pashishe Yohanana muana wa Kalea wakambila Gedaliya mu musokoko ku Misepa ne: “Ndi musue kuya kushipa Yishemaele muana wa Netanya, ne muntu nansha umue kakumanya to. Yeye udi ne bua kukushipa* bua tshinyi? Bua tshinyi badi ne bua kutangalaja bantu bonso ba mu Yuda badi badisangishe kuudi ne kushipa bashadile ba Yuda?” 16  Kadi Gedaliya+ muana wa Ahikama wakambila Yohanana muana wa Kalea ne: “Kuenji bualu ebu to, bualu tshiudi wamba bua Yishemaele ntshia dishima.”

Note

Ku mua.: “bua kuimana kumpala kua.”
Anyi “été.
Anyi “été.
Anyi “kukuma anyima webe.”
Anyi “kukuma anyima webe.”