Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yelemiya 38:1-28

MALU ADI MU MUKANDA EU

  • Badi bela Yelemiya mu tshina tshia kulamina mâyi (1-6)

  • Ebede-meleke udi usungila Yelemiya (7-13)

  • Yelemiya udi ubela Sedekiya bua kudifila (14-28)

38  Nunku Shefataya muana wa Matane, Gedaliya muana wa Pashû, Yukala+ muana wa Shelemeya, ne Pashû+ muana wa Malakiya bakumvua mêyi avua Yelemiya wambila bantu bonso, a ne:  “Mona tshidi Yehowa wamba: ‘Muntu udi ushala mu tshimenga etshi neafue ku muele wa mvita, ku tshiyole tshia nzala ne ku tshipupu.*+ Kadi muntu udi udifila* kudi bena Kasada neashale ne muoyo ne neapete muoyo* wende bu tshintu tshinyenga mu mvita* ne neikale ne muoyo.’+  Mona tshidi Yehowa wamba: ‘Tshimenga etshi netshifidibue bushuwa mu bianza bia tshiluilu tshia mukalenge wa Babilona, ne yeye neatshikuate.’”+  Bakokeshi bakambila mukalenge ne: “Shipesha koku muntu eu,+ bualu mushindu eu ke udiye utekesha lungenyi lua* basalayi badi bashale mu tshimenga etshi, kabidi ne lua bantu bonso, padiye ubambila mêyi a nunku. Bualu muntu eu kena ukeba ditalala dia bantu aba to, kadi udi ukeba dikenga diabu.”  Mukalenge Sedekiya wakandamuna ne: “Monayi! Yeye udi mu bianza bienu, bualu mukalenge kena mua kuenza bualu nansha bumue bua kunukandika to.”  Nunku bakangata Yelemiya, kumuela mu tshina tshia kulamina mâyi tshia Malakiya muana wa mukalenge, tshivua mu Lubanza lua balami.+ Bakapuekeshila Yelemiya ku mionji. Dîba adi mu tshina atshi kamuvua mâyi to, muvua anu bitotshi, ne Yelemiya wakatuadija kudina mu bitotshi.  Ebede-meleke+ muntu mutungu* muena Etshiopi, wa mu nzubu* wa mukalenge, wakumvua ne: mbele Yelemiya mu tshina tshia kulamina mâyi. Dîba adi mukalenge uvua musombe ku Tshiibi tshia Benyamina,+  ke Ebede-meleke kupatukaye mu nzubu* wa mukalenge, kuambilaye mukalenge ne:  “Wewe mfumu mukalenge wanyi, tshidi bantu aba benzele muprofete Yelemiya ntshibi! Mbamuele mu tshina tshia kulamina mâyi, ne yeye neafuilamu bua nzala, bualu kakuena diampa dishale mu tshimenga to.”+ 10  Pashishe mukalenge wakatumina Ebede-meleke muena Etshiopi dîyi ne: “Angata bantu 30 muaba eu, patulayi muprofete Yelemiya mu tshina tshia kulamina mâyi kumpala kua yeye kufua.” 11  Ke Ebede-meleke kuangata bantu abu, kubuelaye nabu mu nzubu* wa mukalenge, muaba udi muinshi mua tshibutshilu,+ kuangatabu mikusu ya bilamba ya kale ne bitetela bia bilamba bia kale, kubipuekeshilabu Yelemiya ku mionji mu tshina tshia mâyi. 12  Pashishe Ebede-meleke muena Etshiopi kuambilaye Yelemiya ne: “Ela koku mikusu ya bilamba ayi ne bitetela bia bilamba abi ne mionji ayi mu mâpa ebe.” Yelemiya wakenza nanku, 13  ne bakakoka Yelemiya ne mionji, kumupatulabu pambelu pa tshina. Kadi Yelemiya wakashala mu Lubanza lua balami.+ 14  Mukalenge Sedekiya wakabikidisha muprofete Yelemiya bua alue kudiye ku tshibuelelu tshisatu, tshidi mu nzubu wa Yehowa, ne mukalenge kuambilaye Yelemiya ne: “Ndi ne bualu bua kukukonka. Kunsokoki bualu nansha bumue to.” 15  Pashishe Yelemiya wakambila Sedekiya ne: “Meme mukuambile, wewe neunshipe bushuwa. Meme mukupeshe lungenyi, kuakunteleja to.” 16  Ke mukalenge Sedekiya kuditshipaye kudi Yelemiya mu musokoko, wamba ne: “Bushuwa bu mudi Yehowa ne muoyo, yeye udi mutupeshe muoyo eu,* tshiakukushipa to, ne tshiakukufila mu tshianza tshia bantu aba badi bakeba kuangata muoyo webe* to.” 17  Pashishe Yelemiya wakambila Sedekiya ne: “Mona tshidi Yehowa, Nzambi wa biluilu, Nzambi wa Isalele, wamba: ‘Wewe mudifile* kudi bakokeshi ba mukalenge wa Babilona, muoyo webe neupandishibue,* ne kabakuosha tshimenga etshi ne kapia, ne wewe ne ba mu nzubu muebe nenupandishibue.+ 18  Kadi wewe kuyi mudifile* kudi bakokeshi ba mukalenge wa Babilona, tshimenga etshi netshifidibue kudi bena Kasada, ne nebatshioshe ne kapia,+ ne wewe kuakupanduka mu tshianza tshiabu to.’”+ 19  Pashishe mukalenge Sedekiya wakambila Yelemiya ne: “Ndi ntshina bena Yuda badi bumbuke baye kudi bena Kasada, bualu meme mufidibue mu bianza biabu, badi mua kungenzela malu ne tshikisu.” 20  Kadi Yelemiya wakamba ne: “Kuakufidibua kudibu to. Tumikila koku dîyi dia Yehowa dindi nkuambila, ne malu neende bimpe buebe wewe, ne neushale* ne muoyo. 21  Kadi wewe mubenge bua kudifila,* mona tshidi Yehowa mmunsokoluele: 22  Mona! Badi bapatula bakaji bonso badi bashale mu nzubu* wa mukalenge wa Yuda baya nabu kudi bakokeshi ba mukalenge wa Babilona,+ ne badi bamba ne:‘Balume bauvua mueyemene* mbakushime ne mbakutshimune.+ Mbenze bua dikasa diebe didine mu bitotshi. Mpindieu mbalukile tshianyima.’ 23  Badi bapatula bakaji bebe bonso ne bana bebe baya nabu kudi bena Kasada, ne wewe kuakupanduka ku tshianza tshiabu, kadi nebakukuate kudi mukalenge wa Babilona,+ ne bua bualu buebe neboshe tshimenga etshi ne kapia.”+ 24  Pashishe Sedekiya wakambila Yelemiya ne: “Muntu nansha umue kamanyi malu aa, bua wewe kufu to. 25  Bakokeshi bobu bumvue ne: ndi muyikile nebe, bobu balue kuudi bakuambile ne: ‘Tuambila koku biuvua muambile mukalenge. Kutusokoki bualu nansha bumue to, ne tuetu katuakukushipa to.+ Mukalenge uvua mukuambile tshinyi?’ 26  udi ne bua kubambila ne: ‘Mvua ndomba mukalenge bua kampingaji mu nzubu wa Yehonatana bua meme tshifuidimu to.’”+ 27  Pashishe bakokeshi bonso bakalua kudi Yelemiya, kumuelabu nkonko. Yeye kubambila malu onso avua mukalenge mumuambile bua kuamba. Nunku kabakamuasa bualu bukuabu to, bualu muntu nansha umue kavua mumvue muyuki au to. 28  Yelemiya wakashala mu Lubanza lua balami+ too ne dituku divuabu bakuate Yelushalema; utshivua anu muomu pavuabu bakuate Yelushalema.+

Note

Anyi “disama.”
Ku mua.: “upatuka uya.”
Anyi “anyima.”
Anyi “neapanduke ne muoyo wende.”
Ku mua.: “bianza bia.”
Anyi “muena mudimu wa mu lubanza lua mukalenge.”
Anyi “dibalasa.”
Anyi “dibalasa.”
Anyi “dibalasa.”
Anyi “wakatuenzela anyima eu.”
Anyi “bakeba anyima webe.”
Ku mua.: “mupatuke muye.”
Anyi “anyima webe neashale ne muoyo.”
Ku mua.: “mupatuke muye.”
Anyi “anyima webe neashale.”
Ku mua.: “kupatuka kuya.”
Anyi “dibalasa.”
Ku mua.: “Balume ba ditalala diebe.”