Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yelemiya 37:1-21

MALU ADI MU MUKANDA EU

  • Diumbuka dia bena Kasada anu bua tshitupa tshîpi (1-10)

  • Badi bela Yelemiya mu buloko (11-16)

  • Sedekiya udi utuilangana ne Yelemiya (17-21)

    • Badi bapesha Yelemiya diampa (21)

37  Nunku mukalenge Sedekiya+ muana wa Yoshiya wakatuadija kukokesha pa muaba wa Koniya*+ muana wa Yehoyakima, bualu Nebukadenesâ* mukalenge wa Babilona wakamuteka mukalenge mu buloba bua Yuda.+  Kadi yeye ne bena mudimu bende ne bantu ba mu buloba abu kabakateleja mêyi a Yehowa avuaye muambe ku butuangaji bua muprofete Yelemiya to.  Mukalenge Sedekiya wakatuma Yehukala+ muana wa Shelemeya ne Sefanya+ muana wa muakuidi Maaseya kudi muprofete Yelemiya, wamba ne: “Tulombela koku kudi Yehowa Nzambi wetu.”  Yelemiya uvua wendakana munkatshi mua bantu kakuyi bualu, bualu kabavua banji kumuela mu buloko+ to.  Pine apu, tshiluilu tshia Palô tshikavua tshipatuke mu Ejipitu,+ ne bena Kasada bavua batshintshimike Yelushalema bakumvua lumu lua bualu buabu. Ke bobu kumbuka ku Yelushalema.+  Pashishe dîyi dia Yehowa diakalua kudi muprofete Yelemiya, diamba ne:  “Mona tshidi Yehowa Nzambi wa Isalele wamba: ‘Monayi tshinudi ne bua kuambila mukalenge wa Yuda uvua munutume kundi bua kungebeja malu: “Tangila! Tshiluilu tshia Palô tshidi tshienda tshilua bua kukuambuluisha netshipingane mu buloba buatshi, mu Ejipitu.+  Bena Kasada nebapingane, nebaluishe tshimenga etshi, nebatshikuate ne nebatshioshe ne kapia.”+  Monayi tshidi Yehowa wamba: “Kanudishimi* nuamba ne: ‘Bushuwa bena Kasada nebumbuke kutudi,’ bualu kabakumbuka to. 10  Nansha bu nuenu mua kushipa tshiluilu tshijima tshia bena Kasada badi banuluisha, kushala anu bantu babu balume badi batapike, bobu nebajuke mu ntenta yabu, neboshe tshimenga etshi ne kapia.”’”+ 11  Pavua tshiluilu tshia bena Kasada tshiumbuke ku Yelushalema bua bualu bua tshiluilu tshia Palô,+ 12  Yelemiya wakumbuka ku Yelushalema kuyaye mu buloba bua Benyamina+ bua kupeta tshiende tshitupa kuoku aku munkatshi mua tshisamba tshiabu. 13  Kadi pakafikaye ku Tshiibi tshia Benyamina, mfumu uvua ku mutu kua balami, dîna diende Iliya muana wa Shelemeya muana wa Hananiya, wakakuata muprofete Yelemiya, wamba ne: “Wewe udi unyema bua kuya kudi bena Kasada!” 14  Kadi Yelemiya wakamba ne: “Ki mmuomu to! Tshiena nnyema bua kuya kudi bena Kasada to.” Kadi yeye kakamuteleja nansha. Ke Iliya kukuataye Yelemiya, kuyaye nende kudi bakokeshi. 15  Bakokeshi bakafiikila Yelemiya munda,+ bakamututa, kumuelabu mu buloko*+ mu nzubu wa Yehonatana mufundi, nzubu uvuabu bavuije buloko. 16  Bakela Yelemiya mu buloko bua muinshi mua buloba,* mu tuzubu tua muinshi mua buloba, ne wakashalamu matuku a bungi. 17  Pashishe mukalenge Sedekiya wakamubikidisha, ne mukalenge wakamukonka malu mu musokoko mu nzubu* muende.+ Wakakonka ne: “Kudiku dîyi kampanda dia kudi Yehowa anyi?” Yelemiya wakamuambila ne: “Didiku!” kutungunukaye wamba ne: “Wewe neufidibue mu tshianza tshia mukalenge wa Babilona!”+ 18  Yelemiya wakambila kabidi mukalenge Sedekiya ne: “Mmpekatu kayi undi mukuenzele wewe, bena mudimu bebe ne bantu aba, bua wewe kungela mu buloko? 19  Mpindieu, baprofete bebe bavua bakuambile mêyi a buprofete a ne: ‘Mukalenge wa Babilona kakulua kukuluisha wewe ne buloba ebu’+ badi penyi? 20  Mpindieu, teleja koku, wewe mfumu mukalenge wanyi. Dilomba dianyi difike koku kuudi. Kumpingajiku mu nzubu wa Yehonatana+ mufundi to, tshianana nemfuilamu.”+ 21  Nunku mukalenge Sedekiya wakatuma dîyi bua balamine Yelemiya mu Lubanza lua balami,+ ne bavua bamupesha diampa dia tshijengu dituku dionso difumina mu musesu wa benji ba mampa+ too ne pavua mampa onso a mu tshimenga majike.+ Kadi Yelemiya wakashala mu Lubanza lua balami.

Note

Bavua bamubikila kabidi ne: Yehoyakina ne Yekoniya.
Ku mua.: “Nebukadelesâ,” mfundilu mukuabu wa dîna edi.
Anyi “Anyima yenu kayidishimi.”
Ku mua.: “kumuelabu mu nzubu wa nkanu.”
Ku mua.: “nzubu wa tshina.”
Anyi “dibalasa.”