Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yelemiya 31:1-40

MALU ADI MU MUKANDA EU

  • Bashadile ba Isalele bua kusomba kabidi mu buloba (1-30)

    • Lakela udi udila bana bende (15)

  • Tshipungidi tshipiatshipia (31-40)

31  “Tshikondo atshi,” ke mudi Yehowa wamba, “Nendue Nzambi kudi mêku onso a mu Isalele, ne bobu nebalue bantu banyi.”+   Mona tshidi Yehowa wamba: “Bantu bavua bapanduke ku muele wa mvita bavua bapete dianyishibua mu tshipelaPavua Isalele wenda uya mutangile muaba wende wa kuikishila.”   Yehowa wakammuenekela kule, kuambaye ne: “Ndi mukunange ne dinanga dia tshiendelele. Ke bualu kayi ndi mukukoke kundi ne dinanga dia lulamatu.*+   Kadi nenkuibakulule kabidi ne wewe newibakuludibue.+ Wewe nsongakaji wa Isalele utshidi kamama, newangate ngoma yebe ya ku bianza tshiakabidiNe neupatuke wenda uja maja ne disanka.*+   Neudime kabidi madimi a tumuma tua mvinyo pa mikuna ya mu Samalea;+Bakunyi nebakune ne nebadie mamuma awu.+   Bualu dituku nedilue diela bansentedi badi mu mikuna ya Efelayima dîyi ne: ‘Jukayi, tubandayi ku Siona, kudi Yehowa Nzambi wetu.’”+   Bualu mona tshidi Yehowa wamba: “Elayi Yakoba mbila ne disanka. Elayi mbila ya disanka bualu nudi ku mutu kua bisamba.+ Manyishayi bualu ebu; tumbishayi ne ambayi ne:‘Yehowa, upandishe bantu bebe, bashadile ba Isalele.’+   Ndi mbapingaja bafumina ku buloba bua ku nord.+ Nembasangishe pamue kumbukila ku bitupa bia buloba bia kule menemene.+ Munkatshi muabu nemuikale mpofu ne mulema,+Mukaji udi ne difu ne mukaji udi pa lulelu, bonso pamue. Nebalukile muaba eu bu tshisumbu tshinene.+   Nebalue benda badila.+ Nembaludike padibu benda balomba dianyishibua. Nembalombole ku tusulu* tua mâyi,+Mu njila mulandakane muikalabu kabayi mua kudikuma ku tshintu. Bualu meme ndi Tatu wa Isalele, ne Efelayima mmuananyi muanabute.”+ 10  Telejayi dîyi dia Yehowa, nuenu bisamba,Ne dimanyishayi munkatshi mua bidiila* bia kule+ ne: “Yeye uvua mutangalaje Isalele neamusangishe pamue. Neamulame bu mudi mulami wa mikoko ulama mikoko yende.+ 11  Bualu Yehowa neapikule Yakoba+Ne neamusungile* ku tshianza tshia muntu udi ne bukole bupite buende.+ 12  Nebalue ne nebele mbila ne disanka pa muaba mutumbuke wa Siona+Ne nebikale ne disanka dia bungi bua buimpe bua* Yehowa,Bua ntete ne mvinyo mupiamupia+ ne mafuta,Ne bua bana ba mikoko ne ba ngombe.+ Bobu* nebalue bu budimi bua mâyi a bungi,+Ne kabakuletela kabidi nansha kakese.”+ 13  “Tshikondo atshi nsongakaji utshidi kamama neaje maja ne disanka,Kabidi ne bansongalume ne banunu pamue.+ Nenkudimune muadi wabu ulua disanka dikole.+ Nembasambe ne nembapeshe disanka pa muaba wa kanyinganyinga kabu.+ 14  Nengukutshishe bakuidi* ne biakudia bia bungi,* Ne bantu banyi nebukute ne buimpe buanyi,”+ ke mudi Yehowa wamba. 15  “Mona tshidi Yehowa wamba: ‘Dîyi didi diumvuika mu Lama,+ madilu ne muadi wa kanyinganyinga ne: Lakele udi udila bana bende ba balume.*+ Mmubenge kusambibua bua bana bende ba balume,Bualu kabatshienaku to.’”+ 16  Mona tshidi Yehowa wamba: “‘Kanda dîyi diebe bua kudidi ne mêsu ebe bua kaapuekeshi binsonji,Bualu difutu didiku bua mudimu webe,’ ke mudi Yehowa wamba. ‘Nebalukile bafumina mu buloba bua muena lukuna wabu.’+ 17  ‘Ditekemena didiku bua matuku ebe atshilualua,’+ ke mudi Yehowa wamba. ‘Bana bebe nebapingane mu buloba buabu bobu.’”+ 18  “Bushuwa ndi mumvue muadi wa Efelayima ne:‘Udi mumbele, ne ndi mubedibue,Bu muana wa ngombe udibu kabayi bibidije ne tshikokedi. Umpingaje, ne nempingane diakamue,Bualu wewe udi Yehowa Nzambi wanyi. 19  Bualu panyima pa dialukila dianyi nengumvue kanyinganyinga kakole;+Panyima pa bamane kundongesha, mvua muditute pa tshibelu bua kanyinganyinga. Mvua mumvue bundu ne mupuekeshibue milongo+Bua malu amvua muenze ku buana.’” 20  “Efelayima ki mmuana wa mushinga mukole kundi, muana munangibue anyi?+ Bualu misangu yonso indi ngakula bua kumuenzela bualu bubi, ndi anu mmuvuluka. Ke bualu kayi muoyo wa munda* udi undubakana bua bualu buende.+ Bushuwa nemmumvuile luse,” ke mudi Yehowa wamba.+ 21  “Uditekele bimanyinu bia mu njila,Ne wase makunji adi aleja njila.+ Utume ntema yebe ku tshibeba, njila uudi ne bua kuyila.+ Alukila, wewe nsongakaji wa Isalele utshidi kamama, alukila mu bimenga biebe. 22  Neutue eku ne eku too ne dîba kayi, wewe nsongakaji udi kayi ne lulamatu? Bualu Yehowa mmufuke tshintu tshipiatshipia pa buloba: Mukaji neakebe mulume ne muoyo mujima.” 23  Mona tshidi Yehowa wa biluilu, Nzambi wa Isalele, wamba: “Nebambe kabidi mêyi aa mu buloba bua Yuda ne mu bimenga biende pandi mpingaja bakuatshibue babu ne: ‘Yehowa akubeneshaku, wewe muaba wa kusombela wa buakane,+ wewe mukuna wa tshijila.’+ 24  Muomu amu nebasombelamu kudi Yuda ne bimenga biende bionso, bonso pamue, ne babidime ne bantu badi balombola bisumbu bia mikoko.+ 25  Bualu nengukutshishe muntu* udi mupungile ne nengukutshishe muntu* yonso udi uletela.”+ 26  Ke meme kubika, kukangula mêsu anyi, ne tulu tuanyi tuakandengelela. 27  “Monayi! Matuku adi alua,” ke mudi Yehowa wamba, “angamiamina nzubu wa Isalele ne nzubu wa Yuda dimiinu* dia muntu ne dimiinu dia bimuna.”+ 28  “Anu mumvua mubatabalele bua kubajula, bua kubupula, bua kubabumbula, bua kubabutula ne bua kubenzela bibi,+ nunku nembatabalele bua kubibaka ne kubakuna,”+ ke mudi Yehowa wamba. 29  “Mu matuku au kabakuamba kabidi ne: ‘Batatu bavua badie tumuma tua mvinyo tua buanji, kadi mênu a bana ke avua makuate buanji.’*+ 30  Kadi muntu yonso neafue bua tshilema tshiende yeye. Muntu yonso udi udia tumuma tua mvinyo tua buanji neumvue buanji ku mênu ende yeye nkayende.” 31  “Monayi! Matuku adi alua,” ke mudi Yehowa wamba, “angadia tshipungidi tshipiatshipia ne nzubu wa Isalele ne nzubu wa Yuda.+ 32  Katshiakuikala bu tshipungidi tshimvua mudie ne bankambua babu dituku dimvua mubakuate ku tshianza bua kubapatula mu buloba bua Ejipitu+ to, ‘tshipungidi tshianyi tshivuabu bashipe,+ nansha mumvua mfumuabu mulelela,’* ke mudi Yehowa wamba.” 33  “Bualu etshi ntshipungidi tshingadia ne nzubu wa Isalele panyima pa matuku au,” ke mudi Yehowa wamba. “Nenteke mikenji yanyi munda muabu,+ ne nenyifunde mu muoyo wabu.+ Nendue Nzambi wabu, ne bobu nebalue bantu banyi.”+ 34  “Kabakuikala kabidi balongeshangana muntu ne mukuende ne muntu ne muanabu, bamba ne: ‘Manya Yehowa!’+ bualu buonso buabu nebammanye, kubangila ku udi mutambe bukese too ne ku udi mutambe bunene wa kudibu,”+ ke mudi Yehowa wamba. “Bualu nembabuikidile tshilema tshiabu, ne tshiakuvuluka kabidi mpekatu wabu to.”+ 35  Mona tshidi Yehowa,Udi ufila dîba bua kutokesha mu munya,Mikenji ya ngondo ne mitoto bua kutokesha butuku,Udi uvuandulula mbuu ne ujula mavuala ende,Muena dîna dia Yehowa wa biluilu,+ wamba: 36  “‘Mêyi ne mikandu ebi biobi kabiyi bikumbane,’ ke mudi Yehowa wamba,‘Dîba adi bana ba Isalele kabakuikala kabidi bu tshisamba kumpala kuanyi kashidi.’”+ 37  Mona tshidi Yehowa wamba: “‘Bobu mua kupima bule bua diulu didi muulu ne kukonkonona bishimikidi bia buloba bidi muinshi, dîba adi nembenge bana bonso ba Isalele bua malu onso adibu benze,’ ke mudi Yehowa wamba.”+ 38  “Monayi! Matuku adi alua,” ke mudi Yehowa wamba, “ibakilabu Yehowa tshimenga+ kumbukila ku Tshibumba tshia Hananele+ too ne ku Tshiibi tshia ku Ditumba.+ 39  Ne nshinga wa kupima nende bule+ neapatuke buludiludi too ne ku mukuna wa Galeba, ne neanyunguluke mutangile ku Goa. 40  Tshibandabanda* tshionso tshia bitalu ne tshia butu* ne mabula onso too ne ku Tshibandabanda tshia Kidilona,+ too ne ku ditumba dia Tshiibi tshia Kabalu+ luseke lua ku est, nebikale tshintu tshia tshijila kudi Yehowa.+ Kabiakujudibua anyi kubumbudibua to.”

Note

Anyi “ndi mutungunuke ne kukuleja dinanga dia lulamatu.”
Anyi “neupatuke ne dikasa dia maja dia bantu badi baseka.”
Anyi “tusulu tua tshilonda nkoka.”
Anyi “bisanga.”
Anyi “neamulombe.”
Anyi “bintu bimpe bia kudi.”
Anyi “Anyima yabu.”
Anyi “anyima ya bakuidi.”
Ku mua.: “manyi.”
Anyi “bana.”
Ku mua.: “mala.”
Anyi “anyima.”
Anyi “anyima.”
Anyi “ndelanganyi.”
Ku mua.: “avua matshipale.”
Anyi pamuapa: “bayabu.”
Anyi “Tshibatabata.”
Anyi “butu bua manyi,” mmumue ne: butu busambakane ne manyi a milambu.