Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yelemiya 29:1-32

MALU ADI MU MUKANDA EU

  • Mukanda wa Yelemiya kudi bavuabu bakuate baye nabu mu Babilona (1-23)

    • Isalele udi ne bua kupingana panyima pa bidimu 70 (10)

  • Mukenji mutumina Shemaya (24-32)

29  Aa mmêyi a mu mukanda mufumine ku Yelushalema uvua muprofete Yelemiya mutumine bakulu bavua bashale munkatshi mua bantu bavuabu bakuate baye nabu ku babende, munkatshi mua bakuidi, mua baprofete, ne mua bantu bonso bavua Nebukadenesâ mukuate ku Yelushalema muye nabu ku Babilona,  panyima pa mukalenge Yekoniya,+ mukalenge mukaji+ mamuende wa mukalenge,* bena mudimu ba mu lubanza lua mukalenge, bakokeshi ba mu Yuda ne mu Yelushalema, ne bena midimu ya bianza ne bansenda ba biamu* bamane kupatuka mu Yelushalema.+  Yeye wakatuma mukanda au ku tshianza tshia Elasa muana wa Shafana+ ne Gemaleya muana wa Hilekiya uvua mukalenge Sedekiya+ wa mu Yuda mutume ku Babilona kudi Nebukadenesâ mukalenge wa Babilona. Mukanda uvua wamba ne:  “Monayi tshidi Yehowa wa biluilu, Nzambi wa Isalele, wamba bua bantu bonso bavuabu baye nabu ku babende, bamvua mumuangeshe mu Yelushalema mutume mu Babilona:  ‘Ibakayi nzubu, nusombelamu. Kunayi bintu mu madimi, nudie mamuma abi.  Selayi bakaji, nulele bana ba balume ne ba bakaji; selelayi bana benu ba balume bakaji ne seleshayi bana benu ba bakaji, bua bobu pabu balele bana ba balume ne ba bakaji. Nuvulangane muaba au, kanukepedi to.  Nukebe ditalala dia tshimenga tshindi munutumamu bakuatshibue, nusambile Yehowa bua bualu buatshi, bualu tshiotshi mu ditalala, nenuikale penu mu ditalala.+  Bualu monayi tshidi Yehowa wa biluilu, Nzambi wa Isalele, wamba: “Kanuitabi bua baprofete benu ne bena ndota benu badi munkatshi muenu banudinge+ to, ne kanuteleji bilota bidibu balota to.  Bualu ‘badi banuambila malu a buprofete a dishima mu dîna dianyi. Meme tshiena mubatume to,’+ ke mudi Yehowa wamba.”’” 10  “Bualu monayi tshidi Yehowa wamba: ‘Padi bidimu 70 mu Babilona bikumbana, nentume ntema yanyi kunudi,+ ne nenkumbaje mulayi wanyi pa kunupingaja muaba eu.’+ 11  “‘Bualu ndi mumanye bimpe meji andi nnuelela,’ ke mudi Yehowa wamba, ‘meji a ditalala, ki nga dikenga to,+ bua kunupesha matuku atshilualua mimpe ne ditekemena.+ 12  Nenumbikile, nenulue ne nenundombe mu disambila, ne meme nennuteleje.’+ 13  “‘Nenunkebe ne nenumpete,+ bualu nenunkebe ne muoyo wenu mujima.+ 14  Nengenze bua numpete,’+ ke mudi Yehowa wamba. ‘Nenkunguije bantu benu badibu bakuate ne nennusangishe pamue, nnupatula mu bisamba bionso ne mu miaba yonso indi munutangalaje,’+ ke mudi Yehowa wamba. ‘Nennupingaje mu muaba umvua muenze bua banukuate baye nenu ku babende.’+ 15  “Kadi nudi bambe ne: ‘Yehowa mmutujudile baprofete mu Babilona.’ 16  “Monayi tshidi Yehowa wambila mukalenge udi musombe mu nkuasa wa bukalenge wa Davidi+ ne bantu bonso badi basombele mu tshimenga etshi, bana benu badi kabayi baye nenu ku babende kudibu banukuate, 17  ‘Monayi tshidi Yehowa wa biluilu wamba: “Tangilayi, ndi mbatumina muele wa mvita, tshiyole tshia nzala, ne tshipupu,*+ ne nembavuije bu tumuma tua mfigi tubole* tudi tubi menemene tudibu kabayi mua kudia.”’+ 18  “‘Nembalondakaje ne muele wa mvita,+ ne tshiyole tshia nzala, ne tshipupu kabidi, ne nembavuije tshintu tshidi tshikuatshisha buôwa kudi makalenge onso a pa buloba,+ ne mulawu, ne tshintu tshidi tshikemesha, ne tshintu tshia kuelela muonzo,+ ne tshipendu munkatshi mua bisamba bionso mundi mbatangalaja,+ 19  bualu ki mbateleje mêyi anyi amvua mubatumine kudi bena mudimu banyi baprofete,’ ke mudi Yehowa wamba, ‘mbatuma njila ne njila.’*+ “‘Kadi kanuena bateleje,’+ ke mudi Yehowa wamba. 20  “Nunku telejayi dîyi dia Yehowa nuenu bantu bonso badibu bakuate baye nabu ku babende, bandi mumbushe mu Yelushalema mutume ku Babilona. 21  Monayi tshidi Yehowa wa biluilu, Nzambi wa Isalele, wamba bua Ahaba muana wa Kolaya ne bua Sedekiya muana wa Maaseya badi bamba mêyi a buprofete a dishima mu dîna dianyi:+ ‘Monayi ndi mbafila mu tshianza tshia Nebukadenesâ* mukalenge wa Babilona, ne yeye neabashipe ku mêsu kuenu. 22  Tshidi tshibenzekela netshilue mulawu udibu bela kudi bantu bonso ba mu Yuda badibu bakuate baye nabu mu Babilona ne: “Yehowa akuvuije bu Sedekiya ne bu Ahaba bavua mukalenge wa Babilona muoshe mu kapia!” 23  bualu mbenze malu a bundu mu Isalele,+ benda masandi ne bakaji ba bende ne bamba mu dîna dianyi mêyi a dishima amvua tshiyi mubambile bua kuamba.+ “‘“Meme ndi Yeye udi mumanye, ne ndi ntemu,”+ ke mudi Yehowa wamba.’” 24  “Newambile Shemaya+ wa ku Nehelama ne: 25  ‘Mona tshidi Yehowa wa biluilu, Nzambi wa Isalele, wamba: “Bualu uvua mutumine bantu bonso badi mu Yelushalema, Sefanya+ muana wa Maaseya, muakuidi, ne bakuidi bonso mikanda mu dîna diebe, wamba ne: 26  ‘Yehowa mmukuteke muakuidi pa muaba wa muakuidi Yehoyada bua ulue mutangidi wa nzubu wa Yehowa, bua wikale utangila muntu mupale yonso udi wenza malu bu muprofete ne bua kumuela mu bikunyi ne mu nkanu;*+ 27  Nunku bua tshinyi kuena mutandishe Yelemiya wa ku Anatota+ udi unuenzela malu bu muprofete?+ 28  Bualu yeye uvua mututumine too ne mukenji ku Babilona, wamba ne: “Netshikale tshikondo tshile! Ibakayi nzubu, nusombelamu. Kunayi bintu mu madimi, nudie mamuma abi,+ . . .”’”’” 29  Pavua muakuidi Sefanya+ mubale mukanda eu mu matshi a muprofete Yelemiya, 30  dîyi dia Yehowa diakalua kudi Yelemiya diamba ne: 31  “Tumina bantu bonso bavuabu bakuate baye nabu ku babende mukenji ne: ‘Monayi tshidi Yehowa wamba bua Shemaya wa ku Nehelama: “Bu muvua Shemaya munuambile mêyi a buprofete, ne mutete bua kunufikisha ku dieyemena mashimi,+ nansha mumvua tshiyi mumutume, 32  nunku monayi tshidi Yehowa wamba: ‘Tangilayi ndi ntuma ntema yanyi kudi Shemaya wa ku Nehelama ne kudi ndelanganyi yende. Muntu wende nansha umue kakupanduka munkatshi mua bantu aba ne kakumona malu mimpe angenzela bantu banyi,’ ke mudi Yehowa wamba, ‘bualu yeye uvua mujudile Yehowa buntomboji.’”’”

Note

Anyi “inabanza.”
Anyi pamuapa: “bibaki ba lumbu.”
Anyi “disama.”
Anyi pamuapa: “tutayike.”
Ku mua.: “njuka patshiatshia, mbatuma.”
Ku mua.: “Nebukadelesâ,” mfundilu mukuabu wa dîna edi.
Anyi “nkanu ya kuela nshingu.”