Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yelemiya 28:1-17

MALU ADI MU MUKANDA EU

  • Yelemiya ne muprofete wa dishima Hananiya (1-17)

28  Mu tshidimu tshimue tshimue atshi, ku ntuadijilu kua bukokeshi bua Sedekiya+ mukalenge wa Yuda, mu tshidimu tshinayi, mu ngondo muitanu, muprofete Hananiya muana wa Azû wa ku Gibeona+ wakangambila mu nzubu wa Yehowa kumpala kua bakuidi ne kua bantu bonso ne:  “Mona tshidi Yehowa wa biluilu, Nzambi wa Isalele, wamba: ‘Nentshibule tshikokedi tshia mukalenge wa Babilona.+  Mu bidimu bibidi,* ndi mpingaja muaba eu bintu bionso bia mudimu bia mu nzubu wa Yehowa bivua Nebukadenesâ mukalenge wa Babilona muangate muaba eu, muye nabi mu Babilona.’”+  “‘Nempingaje Yekoniya+ muana wa Yehoyakima,+ mukalenge wa Yuda, ne bantu bonso ba mu Yuda bavuabu bakuate baye nabu mu Babilona muaba eu,’+ ke mudi Yehowa wamba, ‘bualu nentshibule tshikokedi tshia mukalenge wa Babilona.’”  Pashishe muprofete Yelemiya wakakula ne muprofete Hananiya kumpala kua bakuidi ne kua bantu bonso bavua bimane mu nzubu wa Yehowa.  Muprofete Yelemiya wakamba ne: “Amen!* Yehowa enze bualu ebu! Yehowa akumbaje mêyi ebe a buprofete auvua muambe padiye upingaja muaba eu bintu bia mudimu bia mu nzubu wa Yehowa ne bantu bonso bavuabu bakuate baye nabu mu Babilona!  Kadi teleja koku mukenji eu undi ngamba mu matshi ebe ne mu matshi a bantu bonso aba.  Kale baprofete bavuaku kumpala kuanyi ne kumpala kuebe bavua bamba mêyi a buprofete a bualu bua matunga a bungi ne makalenge manene, bua mvita, makenga, ne bipupu.*  Muprofete yeye muambe dîyi dia buprofete bua ditalala ne dîyi dia muprofete au diodi dikumbane, dîba adi nebimanyike ne: Yehowa uvua bushuwa mutume muprofete au.” 10  Ke muprofete Hananiya kumbusha mutshi wa tshikokedi pa nshingu wa muprofete Yelemiya, kuwutshibulaye.+ 11  Pashishe Hananiya wakamba kumpala kua bantu bonso ne: “Monayi tshidi Yehowa wamba: ‘Anu mushindu eu ke ungatshibula tshikokedi tshia Nebukadenesâ mukalenge wa Babilona ne nentshiumbushe pa nshingu ya bisamba bionso mu bidimu bibidi.’”+ Nunku, muprofete Yelemiya wakaya ne njila wende. 12  Panyima pa muprofete Hananiya mumane kutshibula mutshi wa tshikokedi ne muwumbushe pa nshingu wa muprofete Yelemiya, mukenji wa Yehowa eu wakalua kudi Yelemiya ne: 13  “Ndaku wambile Hananiya ne: ‘Mona tshidi Yehowa wamba: “Udi mutshibule mikamba ya tshikokedi ya mutshi,+ kadi wewe newenze milonda ya tshikokedi ya tshiamu pa muaba wayi.” 14  Bualu mona tshidi Yehowa wa biluilu, Nzambi wa Isalele, wamba: “Nenteke mulonda wa tshikokedi wa tshiamu pa nshingu ya bisamba ebi bionso, bua kuenzela Nebukadenesâ mukalenge wa Babilona mudimu, ne bidi ne bua kumuenzela mudimu.+ Nemmupeshe too ne nyama ya tshisuku ya mu mpata.”’”+ 15  Pashishe muprofete Yelemiya wakambila muprofete Hananiya+ ne: “Teleja koku, wewe Hananiya! Yehowa ki mmukutume to, kadi wewe udi musake bantu aba ku dieyemena dishima.+ 16  Nunku mona tshidi Yehowa wamba: ‘Tangila! Ndi nkumbusha pa buloba. Tshidimu etshi wewe neufue, bualu udi mujudile Yehowa buntomboji.’”+ 17  Nunku muprofete Hananiya wakafua tshidimu atshi, mu ngondo wa muanda mutekete.

Note

Ku mua.: “bidimu bia matuku.”
Anyi “Bikale nanku!”
Anyi “masama.”