Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yelemiya 26:1-24

MALU ADI MU MUKANDA EU

  • Badi bafunyina Yelemiya bua kumushipa (1-15)

  • Badi basungila Yelemiya (16-19)

    • Badi batela mêyi a buprofete a Mika (18)

  • Muprofete Uliya (20-24)

26  Ku ntuadijilu kua bukokeshi bua Yehoyakima+ muana wa Yoshiya, mukalenge wa Yuda, dîyi edi diakafumina kudi Yehowa ne:  “Mona tshidi Yehowa wamba: ‘Imana mu lubanza lua nzubu wa Yehowa ne wakule bua bualu bua* bantu bonso ba mu bimenga bia Yuda badi baluamu bua kutendelela* mu nzubu wa Yehowa. Ubambile malu onso andi mukuambile bua kuamba; kumbushi dîyi nansha dimue to.  Imue misangu nebateleje ne muntu yonso neumbuke mu njila wende mubi, ne meme nenshintulule lungenyi luanyi bua bualu bua* dikenga dindi njinga kubatumina bua bienzedi biabu bibi.+  Bambila ne: “Monayi tshidi Yehowa wamba: ‘Nuenu kanuyi banteleje, balonde mukenji* wanyi undi muteke kumpala kuenu,  bateleje mêyi a bena mudimu banyi baprofete, bandi nnutumina njila ne njila,* banudi kanuyi bateleje,+  nunku nemvuije nzubu eu bu Shilo,+ ne nemvuije tshimenga etshi tshintu tshia mulawu kudi bisamba bionso bia pa buloba.’”’”+  Bakuidi ne baprofete ne bantu bonso bakumvua Yelemiya wamba mêyi aa mu nzubu wa Yehowa.+  Nanku pakajikija Yelemiya kuamba bionso bivua Yehowa mumuambile bua kuambila bantu bonso, nunku bakuidi ne baprofete ne bantu bonso bakamukuata, kuambabu ne: “Wewe neufue bulelela.  Bua tshinyi udi muambe mêyi a buprofete mu dîna dia Yehowa, wamba ne: ‘Nzubu eu nealue bu Shilo, ne tshimenga etshi netshibutudibue ne nebatshishiye katshiyi ne muntu musombelamu?” Nanku, bantu bonso bakunguila Yelemiya mu nzubu wa Yehowa. 10  Pakumvua bakokeshi ba Yuda mêyi aa, bakabanda ku nzubu wa Yehowa bafumina ku nzubu* wa mukalenge, kusombabu ku tshibuelelu tshia tshiibi tshipiatshipia tshia Yehowa.+ 11  Bakuidi ne baprofete bakambila bakokeshi ne bantu bonso ne: “Muntu eu mmukumbanyine tshibawu tshia lufu,+ bualu mmuambe mêyi a buprofete mabi bua tshimenga etshi anu munudi badiumvuile ne matshi enu nkayenu.”+ 12  Pashishe Yelemiya wakambila bakokeshi bonso ne bantu bonso ne: “Yehowa ke uvua muntume bua kuamba mêyi onso a buprofete anudi bumvue a bualu buafikila nzubu eu ne tshimenga etshi.+ 13  Nunku mpindieu, longololayi njila yenu ne bienzedi bienu, ne tumikilayi dîyi dia Yehowa Nzambi wenu, ne Yehowa neashintulule lungenyi luende bua bualu bua* dikenga didiye muambe bua kunutumina.+ 14  Kadi meme ndi mu tshianza tshienu. Ngenzelayi tshinudi bamone tshimpe ne tshiakane ku mêsu enu. 15  Tshidibi numanye bimpe ne: nuenu banshipe, nenuele mashi adi kaayi ne bualu pambidi penu, pa tshimenga etshi ne pa bantu badi basombelamu, bualu mu bulelela Yehowa mmuntume kunudi bua kuamba mêyi onso aa mu matshi enu.” 16  Pashishe bakokeshi ne bantu bonso bakambila bakuidi ne baprofete ne: “Muntu eu ki mmukumbanyine tshibawu tshia lufu to, bualu uvua mutuambile malu mu dîna dia Yehowa Nzambi wetu.” 17  Kabidi, bamue bakulu ba mu buloba bakajuka, kutuadijabu kuambila tshisumbu tshijima tshia bantu ne: 18  “Mika+ wa ku Molesheta uvua wamba mêyi a buprofete mu matuku a Hezikiya+ mukalenge wa Yuda, ne yeye wakambila bantu bonso ba mu Yuda ne: ‘Monayi tshidi Yehowa wa biluilu wamba: “Nebabundulule Siona bu budimi,Yelushalema nealue mishiki ya bikulu,+Ne mukuna wa Nzubu* newulue bu miaba mitumbuke ya muitu.”’*+ 19  “Hezikiya mukalenge wa Yuda ne Yuda mujima bavuaku bamushipe anyi? Kavuaku mutshine Yehowa ne mulombe luse lua Yehowa,* nunku Yehowa kushintululaye lungenyi luende bua bualu bua* dikenga dikavuaye muambe bua kubatumina anyi?+ Nunku tukadi pa kudikebela dikenga dinene tuetu nkayetu.* 20  “Kuvua kabidi muntu mukuabu uvua wamba mêyi a buprofete mu dîna dia Yehowa, Uliya muana wa Shemaya wa ku Kîyata-yalima+ uvua muambe mêyi a buprofete avua mua kufikila tshimenga etshi ne buloba ebu ne mêyi bu a Yelemiya. 21  Mukalenge Yehoyakima+ ne bilobo biende bionso ne bakokeshi bonso bakumvua mêyi ende, ne mukalenge wakakeba bua kumushipa.+ Pakumvua Uliya bualu ebu, diakamue wakumvua buôwa, kunyemenaye mu Ejipitu. 22  Pashishe mukalenge Yehoyakima wakatuma Elenatana+ muana wa Akabô ne bantu bakuabu pamue nende mu Ejipitu. 23  Bakafuma ne Uliya mu Ejipitu, kuyabu nende kudi mukalenge Yehoyakima, wakalua kumushipa ne muele wa mvita+ ne kuimansha tshitalu tshiende mu nkita ya bantu tshianana.” 24  Kadi Ahikama+ muana wa Shafana+ wakatua ku tshia Yelemiya, nunku kabakamufila mu bianza bia bantu bua kumushipa+ to.

Note

Anyi “wambile.”
Anyi “kuinama.”
Anyi “nenyingalale bua.”
Anyi “dilongesha.”
Ku mua.: “njuka patshiatshia, mbatuma.”
Anyi “dibalasa.”
Anyi “neanyingalale bua.”
Anyi “mukuna wa ntempelo.”
Anyi “bu mukuna udi ne mitshi.”
Anyi “mutete bua kutekesha mpala wa Yehowa.”
Anyi “kunyingalalaye bua.”
Anyi “bua anyima yetu.”