Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yelemiya 24:1-10

MALU ADI MU MUKANDA EU

  • Mfigi mimpe ne mfigi mibi (1-10)

24  Pashishe, Yehowa wakandeja bisaka bibidi bia mfigi biteka kumpala kua ntempelo wa Yehowa, panyima pa Nebukadenesâ* mukalenge wa Babilona mumane kukuata Yekoniya*+ muana wa Yehoyakima,+ mukalenge wa Yuda, muye nende pamue ne bakokeshi ba Yuda, bansenda ne bafudi ba biamu;* wakumbuka nabu ku Yelushalema kuyaye nabu ku Babilona.+  Tshisaka tshimue tshivua ne mfigi mimpe mitambe, bu mfigi ya ntuadijilu, kadi tshisaka tshikuabu tshivua ne mfigi mibi mitambe, mibi menemene ivuabu kabayi mua kudia.  Pashishe Yehowa wakangebeja ne: “Yelemiya udi umona tshinyi?” Ke meme kuamba ne: “Mfigi; mfigi mimpe mmimpe mitambe, kadi idi mibi mmibi mitambe, mibi menemene idibu kabayi mua kudia.”+  Pashishe, dîyi dia Yehowa diakalua kundi diamba ne:  “Mona tshidi Yehowa Nzambi wa Isalele wamba: ‘Anu bu mfigi mimpe eyi, ke mungangata mu mushindu muimpe bantu ba Yuda badibu bakuate baye nabu, bamvua muipate muaba eu mutume mu buloba bua bena Kasada.  Nenteke dîsu dianyi kudibu bua diakalenga diabu, ne nengenze bua bapingane mu buloba ebu.+ Nembibake ne tshiakubupula to; nembakune, ne tshiakubajula to.+  Nembapeshe muoyo wakummanya ne: meme ndi Yehowa.+ Nebalue bantu banyi, ne meme nendue Nzambi wabu,+ bualu nebapingane kundi ne muoyo wabu mujima.+  “‘Kadi bua bualu bua mfigi mibi idi mibi menemene idibu kabayi mua kudia,+ mona tshidi Yehowa wamba: “Ke mungangata Sedekiya+ mukalenge wa Yuda, bakokeshi bende, bashadile ba mu Yelushalema badi bashale mu buloba ebu ne aba badi basombele mu buloba bua Ejipitu.+  Nembavuije tshintu tshidi tshikuatshisha buôwa ne tshia dikenga kudi makalenge onso a pa buloba,+ tshipendu, lusumuinu, tshintu tshia kuseka ne mulawu+ mu miaba yonso indi mbatangalaja.+ 10  Nembatumine muele wa mvita,+ tshiyole tshia nzala ne tshipupu,*+ too ne padibu bajimina mu buloba bumvua mubapeshe bobu ne bankambua babu.”’”

Note

Ku mua.: “Nebukadelesâ,” mfundilu mukuabu wa dîna edi.
Bavua bamubikila kabidi ne: Yehoyakina ne Koniya.
Anyi pamuapa: “bibaki ba bibumba bia kudikuba nabi.”
Anyi “disama.”