Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yelemiya 21:1-14

MALU ADI MU MUKANDA EU

  • Yehowa udi ubenga dilomba dia Sedekiya (1-7)

  • Bantu badi ne bua kusungula muoyo anyi lufu (8-14)

21  Yelemiya wakapeta dîyi dia kudi Yehowa pavua mukalenge Sedekiya+ mumutumine Pashû+ muana wa Malakiya ne Sefanya+ muana wa Maaseya, muakuidi, ulomba ne:  “Ebeja koku Yehowa bua bualu buetu, bualu Nebukadenesâ* mukalenge wa Babilona udi utuela mvita.+ Pamuapa Yehowa neenze tshimue tshia ku bienzedi biende bia kukema bua bualu buetu, nunku yeye neumbuke kutudi.”+  Yelemiya wakabambila ne: “Monayi tshinudi ne bua kuambila Sedekiya:  ‘Mona tshidi Yehowa Nzambi wa Isalele wamba: “Ndi ntangija kunudi* bia mvita bidi mu bianza bienu nuenu, binudi nuluisha nabi mukalenge wa Babilona+ ne bena Kasada badi banutshintshimike pambelu pa tshimanu. Nembasangishe munkatshi mua tshimenga etshi.  Meme muine nenduangane nenu mvita+ ne tshianza tshiolola ne diboko dia bukole, ne tshiji ne tshiji tshikole ne difiika munda dikole.+  Nenkume badi basombele mu tshimenga etshi, bantu ne nyama. Nebafue ku tshipupu tshikole.”’*+  “‘“Panyima pa malu aa,” ke mudi Yehowa wamba, “nemfile Sedekiya mukalenge wa Yuda ne bena mudimu bende ne bantu ba mu tshimenga etshi, bantu badi bapanduka ku tshipupu, ku muele wa mvita ne ku tshiyole tshia nzala, mu tshianza tshia Nebukadenesâ* mukalenge wa Babilona, mu tshianza tshia bena lukuna babu ne mu tshianza tshia badi bakeba kuangata muoyo wabu.*+ Neabashipe ne muele wa mvita. Kakumvua kanyinganyinga bua bualu buabu, anyi kuditeka pa muaba wabu peshi kumvua luse+ to.”’  “Udi ne bua kuambila bantu aba ne: ‘Yehowa udi wamba nunku: “Monayi ndi nteka njila wa muoyo ne njila wa lufu kumpala kuenu.  Badi bashala mu tshimenga etshi nebafue ku muele wa mvita, ku tshiyole tshia nzala ne ku tshipupu. Kadi muntu udi upatuka ne udifila kudi bena Kasada badi banutshintshimike neashale ne muoyo, neapete muoyo* wende bu tshintu tshinyenga mu mvita.”’*+ 10  “‘“Bualu ndi mutangije mpala wanyi ku tshimenga etshi bua dikenga, ki mbua bualu buimpe to,”+ ke mudi Yehowa wamba. “Netshifidibue mu tshianza tshia mukalenge wa Babilona,+ ne yeye neatshioshe ne kapia.”+ 11  “‘Kudi ba mu nzubu wa mukalenge wa Yuda: Umvuayi dîyi dia Yehowa. 12  Wewe nzubu wa Davidi, mona tshidi Yehowa wamba: “Imanyina kulumbuluisha kuakane dinda dionso,Ne sungila muntu udibu bapawula mu tshianza tshia muntu udi udiangana bintu ku mashimi,+Bua tshiji tshianyi tshikole katshitemi bu kapia+Ne kosha kakuyi muntu wa kukajimaBua bualu bua bienzedi bienu bibi.”’+ 13  ‘Mona ndi nebe tshilumbu, wewe udi musombele mu tshibandabanda,*Wewe dibue dinene dia mu mpata,’ ke mudi Yehowa wamba. ‘Bua nuenu badi bamba ne: “Nnganyi wapueka bua kutuluisha? Ne nnganyi wakuata miaba yetu ya kusombela?” 14  NennunyokeBu mudibi bikumbane bua bienzedi bienu,’+ ke mudi Yehowa wamba. ‘Nentue ditu diende kapia,Ne koku nekoshe bintu bionso bidi bimunyunguluke.’”+

Note

Ku mua.: “Nebukadelesâ,” mfundilu mukuabu wa dîna edi.
Anyi “nkudimuna.”
Anyi “disama dikole.”
Ku mua.: “Nebukadelesâ,” mfundilu mukuabu wa dîna edi.
Anyi “bakeba anyima yabu.”
Anyi “anyima.”
Anyi “neasungile muoyo wende.”
Anyi “tshibatabata.”