Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yelemiya 20:1-18

MALU ADI MU MUKANDA EU

  • Pashû udi ukuma Yelemiya (1-6)

  • Yelemiya kena mua kulekela kuyisha (7-13)

    • Mukenji wa Nzambi bu kapia kadi katema (9)

    • Yehowa bu muena mvita udi wenza buôwa (11)

  • Didiabakena dia Yelemiya (14-18)

20  Nanku Pashû muana wa Imê, muakuidi, uvua kabidi mfumu mulombodi mu nzubu wa Yehowa, uvua uteleja pavua Yelemiya wamba malu a buprofete aa.  Pashishe Pashû wakakuma muprofete Yelemiya, kumuelaye mu bikunyi+ bivua ku Tshiibi tshia Kuulu tshia Benyamina tshivua mu nzubu wa Yehowa.  Kadi dituku diakalonda, pavua Pashû mupatule Yelemiya mu bikunyi, Yelemiya wakamuambila ne: “Yehowa ki mmukuinyike ne: Pashû to, kadi mmukuinyike ne: Buôwa Nseke yonso.+  Bualu mona tshidi Yehowa wamba: ‘Nenkuvuije tshintu tshidi tshikuatshisha buôwa kuudi wewe ne kudi balunda bebe bonso, nebakuluke ku muele wa mvita wa bena lukuna babu mêsu ebe matangile;+ ne nemfile Yuda mujima mu tshianza tshia mukalenge wa Babilona, ne yeye neaye nabu ku babende mu Babilona ne neabashipe ku muele wa mvita.+  Nemfile lupetu luonso lua tshimenga etshi, biuma biatshi bionso, bintu biatshi bionso bia mushinga, ne mabanji onso a bakalenge ba Yuda mu tshianza tshia bena lukuna babu.+ Nebabipawule, nebabikuate ne nebaye nabi mu Babilona.+  Kadi wewe, Pashû, ne bantu bonso badi basombele mu nzubu muebe, nenukuatshibue. Neuye ku Babilona ne neufuilaku, ne nebakujiikilaku ne balunda bebe bonso, bualu udi mubambile mêyi a buprofete a dishima.’”+   Udi muntatakaje, wewe Yehowa, ne mvua mutatakajibue. Uvua munduishe ne bukole buebe, wewe kuntshimuna.+ Ndi mulue tshintu tshia kusekabu dituku dijima;Muntu yonso udi unseka.+   Bualu misangu yonso indi ngakula, ndi ne bua kuela mbila ne kumanyisha ne:“Tshikisu ne dibutuka!” Dîyi dia Yehowa ndilue kundi meme tshikebeshi tshia bipendu ne tuseku dituku dijima.+   Ke meme kuamba ne: “Tshiakutela bualu buende to,Ne tshiakuakula kabidi mu dîna diende nansha.”+ Kadi dîyi diende diakalua munda muanyi bu kapia kadi kosha kabuta mu mifuba yanyi,Ne ngakatshioka ne kudilama munda muanyi;Tshiakakokesha kabidi mua kupuwa nansha.+ 10  Bualu ndi mumvue biambamba bibi bia bungi;Buôwa bukole mbunjingile.+ “Muelayi patoke; tumuelayi patoke!” Muntu yonso uvua unjingila ditalala uvua ubadila dikuluka dianyi,+ wamba ne: “Pamuapa neenze tshilema tshia butatakane,Ne tudi mua kutshimuna ne kudisombuela kudiye.” 11  Kadi Yehowa uvua nanyi bu muena mvita udi wenza buôwa.+ Ke bualu kayi bantu badi bankengesha nebalenduke ne kabakutshimuna to.+ Nebafuishibue bundu bua bungi, bualu kabakuenza bualu nansha. Dipuekeshibua diabu dia milongo dia tshiendelele kadiakupuibua muoyo to.+ 12  Kadi wewe, Yehowa wa biluilu, udi ukonkonona muntu muakane;Wewe udi umona meji adi munda menemene* ne muoyo.+ Ndekela mmone muudi udisombuela kudibu,+Bualu kuudi wewe ke kundi mufile tshilumbu tshianyi.+ 13  Imbilayi Yehowa misambu! Tumbishayi Yehowa! Bualu mmusungile mupele* mu tshianza tshia benji ba malu mabi. 14  Dituku divuabu bandele dikale diedibue mulawu! Dituku divua mamuanyi mundele kadibeneshibu to!+ 15  Mulawu wikale kudi muntu uvua mutuadile tatuanyi lumu luimpe, wamba ne: “Mbakulelele muana wa balume, muana mulume!” Umusankisha bikole. 16  Muntu au ikale bu bimenga bivua Yehowa mutonkole kayi unyingalala. Yeye umvue lubila mu dinda ne tshiona tshia didimuija munda munya. 17  Bua tshinyi kavua munshipele mu difu,Bua mamuanyi alue lukita luanyiNe difu diende dishale anu dimite?+ 18  Bua tshinyi mvua ne bua kupatuka mu difuBua kumona lutatu ne kanyinganyinga,Bua kujikija matuku anyi mu bundu?+

Note

Anyi “mudi muntu udiumvua munda muende menemene.” Ku mua.: “tuonyi.”
Anyi “anyima wa mupele.”