Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yelemiya 18:1-23

MALU ADI MU MUKANDA EU

  • Diima mu bianza bia mufumbi (1-12)

  • Yehowa udi wela Isalele nyima (13-17)

  • Tshifufu tshielela Yelemiya; dilomba diende (18-23)

18  Edi ndîyi diakalua kudi Yelemiya difumina kudi Yehowa:  “Juka, pueka ku nzubu wa mufumbi,+ ne kuoku aku nengenze bua umvue mêyi anyi.”  Nunku ngakapueka ku nzubu wa mufumbi, ne yeye uvua wenza mudimu ku nkata yende ya mufumbi.  Kadi dilongo divua mufumbi ufumba ne diima diakanyanguka mu tshianza tshiende. Ke mufumbi kuenzulula nadi dilongo dikuabu, bu muvuaye mumone ne: mbikumbane.*  Pashishe, dîyi dia Yehowa diakalua kundi diamba ne:  “‘Nuenu nzubu wa Isalele, tshiena mua kunuenzela anu bu mudi mufumbi eu muenze anyi?’ ke mudi Yehowa wamba. ‘Monayi, bu diima mu tshianza tshia mufumbi, ke munudi mu tshianza tshianyi, nuenu nzubu wa Isalele.+  Dîba dionso dindi mua kuakula bua kujomona ne kubumbula ne kubutula tshisamba anyi bukalenge kampanda,+  ne tshisamba atshi tshidi tshilekela malu mabi atshi amvua muakule bua bualu buawu, meme panyi nenshintulule lungenyi luanyi bua bualu bua* dikenga dimvua ngela meji bua kutshitumina.+  Kadi dîba dionso dindi ngamba bua kuibaka ne kukuna tshisamba anyi bukalenge kampanda, 10  tshiotshi tshienze malu adi mabi ku mêsu kuanyi ne tshibenge kutumikila dîyi dianyi, nenshintulule lungenyi luanyi bua bualu bua* malu mimpe amvua musue kutshienzela.’ 11  “Mpindieu, ambila koku bantu ba mu Yuda ne bantu badi basombele mu Yelushalema ne: ‘Monayi tshidi Yehowa wamba: “Monayi ndi nnulongoluela* dikenga ne nnulukila meji a bualu bua kunuenzela. Umbukayiku ku njila yenu mibi, ne longololayi njila yenu ne bienzedi bienu.”’”+ 12  Kadi bakamba ne: “Kakuena ditekemena!+ Bualu netulonde ngenyi yetu, ne yonso wa kutudi neenze malu bilondeshile tshitshiu tshia muoyo wende mubi.”+ 13  Nunku, mona tshidi Yehowa wamba: “Konkayiku nkayenu munkatshi mua bisamba. Nnganyi ukadi mumvue bualu bua nunku? Nsongakaji utshidi kamama wa Isalele mmuenze bualu bubi menemene.+ 14  Neje ya Lebanona idi ijimina pa mabue manene adi pa mpulumuku yende anyi? Anyi mâyi matalale adi apueka afuma kule neakame anyi? 15  Kadi bantu banyi mbampue muoyo.+ Bualu badi balambula tshintu tshia tshianana milambu,*+Ne balenduisha bantu mu njila yabu, njila yabu ya kale,+Bua kulonda njila ya kumpenga idi kayiyi mibotakane ne milandakane,* 16  Bua kuvuija buloba buabu tshintu tshidi tshikuatshisha buôwa,+Tshintu tshia kuelela muonzo bua kashidi.+ Muntu yonso udi upitshilamu neakatshile ne buôwa bukole ne neakupe mutu wende.+ 17  Bu lupepele lua ku est, nembatangalaje kumpala kua muena lukuna. Mu dituku dia dikenga diabu nembaleje nyima wanyi, ki mpala wanyi to.”+ 18  Nunku bakamba ne: “Luayi, tuelelayi Yelemiya tshifufu,+ bualu mukenji kawakujimina* kudi bakuidi betu anyi mubelu kudi bena meji nansha dîyi kudi baprofete to. Luayi, tumuambe* ne katuteyi ntema ku malu adiye wamba.” 19  Yehowa wanyi, tumaku ntema yebe kundi,Ne teleja malu adi baluishi banyi bamba. 20  Badiku mua kufuta bubi ku buimpe anyi? Bualu, mbumbuile muoyo* wanyi dijimba.+ Uvuluke mumvua muimane kumpala kuebe bua kuakula bimpe bua bualu buabu,Bua kumbusha tshiji tshiebe tshikole kudibu. 21  Nunku, fila bana babu ku tshiyole tshia nzala,Ne bafila ku bukole bua muele wa mvita.+ Bakaji babu bajimije bana ne balue bakaji bakamba.+ Balume babu bashipibue ku tshipupu tshia lufu,Bansongalume babu bashipibue ku muele wa mvita mu mvita.+ 22  Muadi umvuike ufumina mu nzubu yabuPaudi ubatumina benzavi mu tshimpitshimpi. Bualu mbumbule dijimba bua kunkuataNe mbelele makasa anyi mateyi.+ 23  Kadi, wewe Yehowa,Udi mumanye bimpe meji adibu bandukila bua kunshipa.+ Kubuikidi tshilema tshiabu,Ne kukupudi mpekatu wabu kumpala kuebe. Bobu balenduke kumpala kuebe+Paudi ubanyoka mu tshiji tshiebe.+

Note

Ku mua.: “bu muvuabi bikumbane ku mêsu kua mufumbi bua kuenza.”
Anyi “nengumvue kanyinganyinga bua.”
Anyi “nengumvue kanyinganyinga bua.”
Ku mua.: “nnuenzela.”
Anyi “muishi wa mulambu.”
Anyi “kayiyi mibaka.”
Anyi “dilongesha kadiakujimina.”
Ku mua.: “tumukume ne ludimi.”
Anyi “anyima.”