Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yelemiya 16:1-21

MALU ADI MU MUKANDA EU

  • Yelemiya kena ne bua kusela, kudila, anyi kuenza tshibilu tshia disanka (1-9)

  • Dinyokibua, pashishe dipingajibua kabidi (10-21)

16  Dîyi dia Yehowa diakalua kabidi kundi, diamba ne:  “Kuena ne bua kusela mukaji, ne kuena ne bua kulela bana ba balume ne bana ba bakaji muaba eu to.  Bualu, mona tshidi Yehowa wamba bua bana ba balume ne bua bana ba bakaji badi baledibua muaba eu, ne bua bamamuabu badi babalela ne bua batatuabu badi babalela mu buloba ebu:  ‘Nebafue ku masama a lufu,+ kadi muntu kakubadila anyi kubajiika; nebalue bu tumvi pa mutu pa buloba.+ Nebafue ku muele wa mvita ne ku tshiyole tshia nzala,+ ne bitalu biabu nebikale biakudia bia nyunyi ya muulu ne bia nyama ya pa buloba.’   Bualu, mona tshidi Yehowa wamba:‘Kubuedi mu nzubu udibu benzela tshibilu tshia bena madilu,Ne kuyi bua kuela kabobo ka muadi peshi bua kusambangana.’+ ‘Bualu ndi mumbushe ditalala dianyi kudi bantu aba,’ ke mudi Yehowa wamba,‘Mumbushe ne dinanga dianyi dia lulamatu ne luse luanyi.+   Bonso, banene ne bakese, nebafue mu buloba ebu. Kabakubajiika,Muntu kakubadila,Anyi muntu kakuditapa peshi kudikungula mutu bua bualu buabu to.*   Muntu kakupesha badi mu madilu biakudia,Bua kubasamba bua bafue babu;Anyi muntu kakubapesha dikopo dia busambiBua kunua bua dijimija dia tatuabu anyi mamuabu to.   Kubuedi mu nzubu wa tshibilu tshia disanka Bua kusomba nabu bua kudia ne kunua to.’  “Bualu, mona tshidi Yehowa wa biluilu, Nzambi wa Isalele, wamba: ‘Mu muaba eu, mu matuku enu ne mu mêsu enu mene, nenkoseshe mitoyi ya disanka dienu dikole ne ya masanka enu, ne dîyi dia musedianganyi ne dîyi dia mukaji udibu basela.’+ 10  “Paudi wambila bantu aba mêyi onso aa, nebakuebeje ne: ‘Bua tshinyi Yehowa mmuambe bua dikenga dinene edi dionso ditukuate? Ntshilema kayi ne mmpekatu kayi utudi benzele Yehowa Nzambi wetu?’+ 11  Udi ne bua kubandamuna ne: ‘“Bualu bankambua benu bavua bandekele,”+ ke mudi Yehowa wamba, “ne bakatungunuka ne kulonda nzambi mikuabu ne kuyenzela mudimu ne kuyinamina.+ Kadi meme bavua bandekele, ne mikenji yanyi kabavua bayilame to.+ 12  Nudi benze malu mabi menemene kupita bankambua benu,+ ne yonso wa kunudi udi ulonda tshitshiu tshia muoyo wende mubi pamutu pa kuntumikila meme.+ 13  Nunku, nennumbushe mu buloba ebu nnukupa mu buloba bunudi kanuyi bamanye nuenu nansha bankambua benu,+ ne muomu amu nenuenzele nzambi mikuabu mudimu munya ne butuku,+ bualu tshiakunuleja luse nansha.”’ 14  “‘Kadi, matuku adi alua,’ ke mudi Yehowa wamba, ‘ikalabu kabayi mua kuamba kabidi ne: “Bushuwa bu mudi Yehowa ne muoyo, yeye wakapatula bantu ba Isalele mu buloba bua Ejipitu!”+ 15  kadi nebambe ne: “Bushuwa bu mudi Yehowa ne muoyo, yeye wakapatula bantu ba Isalele mu buloba bua ku nord ne mu matunga onso muvuaye mubatangalaje!” ne nembapingaje mu buloba buabu, bumvua mupeshe bankambua babu.’+ 16  ‘Mona, ndi mbikidisha balobi ba bungi,’ ke mudi Yehowa wamba,‘Ne nebabalobe. Pashishe nembikidishe bilembi bia bungi,Ne nebibalembe pa mukuna munene wonso ne mukuna mukese wonsoNe mu mitanta ya mikuna ya mabue. 17  Bualu mêsu anyi adi amona malu onso adibu benza.* Ki mmasokoka kumpala kuanyi,Anyi tshilema tshiabu ki ntshisokoka ku mêsu kuanyi. 18  Nenganji kubafuta difutu dionso dijima bua tshilema tshiabu ne bua mpekatu yabu,+Bualu mbanyange buloba buanyi ne bimfuanyi bidi kabiyi ne muoyo* bia mpingu yabu ya muendiNe mbuwuje bumpianyi buanyi ne bintu biabu bibi.’”+ 19  Wewe Yehowa, bukole buanyi ne muaba wanyi wa kusokomena,Muaba wanyi wa kunyemena dituku dia dikenga,+Kuudi bisamba nebilue bifumina ku ntengu ya buloba,Ne nebiambe ne: “Bankambua betu bavua bapiane dishima dia menemene,Bualu bua patupu ne bintu tshianana bidi kabiyi ne dikuatshisha.”+ 20  Muntu udiku mua kudienzela nzambiPadiyi kayiyi bushuwa nzambi anyi?+ 21  “Nanku nembafikishe ku dimanya,Musangu eu nembafikishe ku dimanya bukole buanyi ne dikanda dianyi,Nunku nebamanye ne: dîna dianyi n’Yehowa.”

Note

Bilele bia madilu bia bampanganu bivuabu benza pamuapa kudi bena Isalele batontolodi.
Ku mua.: “njila yabu yonso.”
Ku mua.: “bitalu.”