Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yelemiya 15:1-21

MALU ADI MU MUKANDA EU

  • Yehowa kakushintulula dilumbuluisha diende (1-9)

  • Didiabakena dia Yelemiya (10)

  • Diandamuna dia Yehowa (11-14)

  • Disambila dia Yelemiya (15-18)

    • Disanka bua didia dia dîyi dia Nzambi (16)

  • Yelemiya mmukolesha kudi Yehowa (19-21)

15  Pashishe, Yehowa wakangambila ne: “Nansha bu Mose ne Samuele bimane kumpala kuanyi,+ tshivua mua kuleja bantu aba luse* to. Bumbusha kumpala kuanyi. Baye.  Bobu bakukonke ne: ‘Nkuepi kutudi ne bua kuya?’ udi ne bua kubambila ne: ‘Yehowa udi wamba nunku: “Muntu udi mufundila tshipupu tshia lufu, ku tshipupu tshia lufu! Muntu udi mufundila muele wa mvita, ku muele wa mvita!+ Muntu udi mufundila tshiyole tshia nzala, ku tshiyole tshia nzala! Ne muntu udi mufundila dikuatshibua, ku dikuatshibua!”’+  “‘Nunku, nembatekele makenga anayi,’*+ ke mudi Yehowa wamba, ‘muele wa mvita bua kushipa, mbua bua kupulumuna, ne nyunyi ya muulu ne nyama ya pa buloba bua kudia ne kubutula.+  Nembavuije tshintu tshidi tshikuatshisha buôwa kudi makalenge onso a pa buloba+ bua bualu bua Manashe muana wa Hezikiya, mukalenge wa Yuda, bua malu avuaye muenze mu Yelushalema.+   Nnganyi wakumvuila luse, wewe Yelushalema,Nnganyi waditeka pa muaba webe,Ne nnganyi wimana bua kukonka bua kumanya muudi?’   ‘Wewe udi mundekele,’ ke mudi Yehowa wamba.+ ‘Udi utungunuka ne kungela nyima.*+ Nunku nenkoluele tshianza tshianyi ne nenkubutule.+ Ndi mupungile ne dikumvuila luse.*   Ne nembapepule ne ngalafu mu biibi bia ditunga. Nembashiye kabayi ne bana.+ Nembutule bantu banyi,Bu mudibu babenga kulekela njila yabu.+   Bakaji bakamba babu nebavulangane bikole kumpala kuanyi kupita nsenga ya ku mbuu. Nembatumine mubutudi munda munya, bua kubutula bamamu ne bansongalume. Nembatumine dipampakana ne buôwa bukole mu tshimpitshimpi.   Mukaji uvua mulele bana muanda mutekete mmuletele;Yeye* udi utata ne mueyelu. Dîba diende ndibuele tutshidi munda munya,Bifuisha bundu ne bipuekeshisha milongo.’* ‘Kadi bantu bakese ba kudibu badi bashaleNembafile ku muele wa mvita kumpala kua bena lukuna babu,’ ke mudi Yehowa wamba.”+ 10  Diakabi dianyi, mamu wanyi, bualu uvua mundele meme,+Muntu wa kutandangana nende ne kukokangana nende kudi ditunga dijima. Tshiena musombeshangane tshintu anyi musombangane tshintu;Kadi buonso buabu badi bangela milawu. 11  Yehowa wakamba ne: “Bushuwa nenkuenzele bualu buimpe;Bushuwa nenkulombele mu tshikondo tshia dikenga,Mu tshikondo tshia kanyinganyinga kudi muena lukuna. 12  Muntu udiku mua kutshibula tshiamu tshifiike bitupa bitupa,Tshiamu tshifiike tshia ku nord, ne tshiamu tshia mitaku anyi? 13  Biuma biebe ne bubanji buebe nembifile bu tshintu tshia kupawula,+Kabiyi ku mushinga kampanda, kadi bua mpekatu yebe yonso mu bitupa biebe bionso bia maloba. 14  Nembifile kudi bena lukuna bebeBua kuyabu nabi mu ditunga diudi kuyi mumanye.+ Bualu tshiji tshianyi ntshitemeshe kapia,Ne kadi kakutemena.”+ 15  Yehowa wanyi, wewe udi mumanye,Umvuluke ne utume ntema yebe kundi. Unsombuele kudi badi bankengesha.+ Kundekedi mfua* bua muudi kuyi ukuata tshiji lukasa. Umanye ne: bua bualu buebe, ndi muambule tshipendu etshi.+ 16  Ngakapeta mêyi ebe, meme kuadia;+Ne dîyi diebe diakalua disanka dikole kundi ne disanka dia muoyo wanyi,Bualu badi bambikila ku dîna diebe, wewe Yehowa Nzambi wa biluilu. 17  Tshiena nsomba pamue ne bena bisankasanka ne nsanka to.+ Bualu tshianza tshiebe tshidi pambidi panyi, ndi musombe nkayanyi,Bualu wewe udi munguwuje tente ne tshiji.*+ 18  Bua tshinyi dikenga dianyi ndia kashidi ne mputa wanyi ngua lubangu? Mputa udi ubenga bua kumumishabu. Wewe neulue kundi bu mushimi wa mâyi wa dishimaUdi kawuyi kueyemena anyi? 19  Nanku, mona tshidi Yehowa wamba: “Wewe mupingane, nunku nenkupingaje tshiuvua,Ne newimane kumpala kuanyi. Wewe mutapulule tshidi ne mushinga ku tshidi katshiyi ne mushinga,Wewe neulue bu mukana muanyi.* Bobu badi ne bua kupingana kuudi,Kadi wewe kuakupingana kudibu to.” 20  “Ndi nkuvuija tshimanu tshikolesha tshia tshiamu tshia mitaku kudi bantu aba.+ Bushuwa nebakuluishe,Kadi kabakukupita bukole to,*+Bualu ndi nebe bua kukupandisha ne bua kukusungila,” ke mudi Yehowa wamba. 21  “Nenkusungile mu tshianza tshia bantu babi Ne nenkukuule mu tshianza tshia bakengeshanganyi.”

Note

Anyi “anyima wanyi kavua mua kutangila kudi bantu aba.”
Anyi pamuapa: “mishindu inayi ya dilumbuluisha.” Ku mua.: “mêku anayi.”
Anyi pamuapa: “utungunuka ne kualukila tshianyima.”
Anyi “diumvua kanyinganyinga.”
Anyi “Anyima wende.”
Anyi pamuapa: “Ndifue bundu ne ndipuekeshibue milongo.”
Ku mua.: “Kungumbushi.”
Anyi “mukenji wa dipisha.”
Anyi “neulue mutuadi wanyi wa dîyi.”
Anyi “kabakukutshimuna to.”