Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yelemiya 11:1-23

MALU ADI MU MUKANDA EU

  • Yuda udi ushipa tshipungidi ne Nzambi (1-17)

    • Nzambi bungi bu bimenga (13)

  • Badi bafuanyikija Yelemiya ne muana wa mukoko wa kushipa (18-20)

  • Buluishi bua kudi bantu ba mu tshimenga tshia ba Yelemiya (21-23)

11  Edi ndîyi diakalua kudi Yelemiya difuma kudi Yehowa, diamba ne:  “Telejayi mêyi a tshipungidi etshi, nuenu bantu! “Uambile* bantu ba Yuda ne bantu badi basombele mu Yelushalema,  ubambile ne: ‘Monayi tshidi Yehowa Nzambi wa Isalele wamba: “Mulawu wikale kudi muntu udi kayi utumikila mêyi a tshipungidi etshi,+  amvua muambile bankambua benu dituku dimvua mubapatule mu buloba bua Ejipitu,+ mu tshikutu tshia dienguluila biamu,+ ngamba ne: ‘Tumikilayi dîyi dianyi, ne enzayi malu onso andi nnuambila bua kuenza; nunku nenulue bantu banyi ne meme nengikale Nzambi wenu,+  bua nkumbaje mutshipu umvua muditshipe kudi bankambua benu, bua kubapesha buloba budi ne mabele ne buitshi+ bia bungi, anu bu mudibi dituku edi,’”’” Ne meme ngakandamuna ne: “Amen,* Yehowa wetu.”  Pashishe Yehowa wakangambila ne: “Manyisha mêyi onso aa mu bimenga bia Yuda ne mu misesu ya Yelushalema ne: ‘Umvuayi mêyi a tshipungidi etshi, ne enzayi.  Bualu ngakadimuija bankambua benu patoke dituku dimvua mubapatule mu buloba bua Ejipitu too ne ku dituku edi, mbadimuija njila ne njila* ne: “Tumikilayi dîyi dianyi.”+  Kadi kabakateleja anyi kuinyika ditshi diabu; kadi muntu yonso wakatungunuka ne kulonda muoyo wende mubi ne mutu mukole.+ Nunku ngakabatuadila mêyi onso a tshipungidi etshi amvua mubambile bua kuenza, kadi bakabenga bua kuenza mêyi au.’”  Pashishe Yehowa wakangambila ne: “Kudi tshifufu munkatshi mua bantu ba Yuda ne bantu badi basombele mu Yelushalema. 10  Mbapingane ku bilema bia bankambua babu ba kale bavua babenge kutumikila mêyi anyi.+ Bobu pabu mbalonde nzambi mikuabu ne mbayenzele mudimu.+ Nzubu wa Isalele ne nzubu wa Yuda mmishipe tshipungidi tshianyi tshimvua mudie ne bankambua babu.+ 11  Nunku, mona tshidi Yehowa wamba: ‘Mona ndi mbatumina dikenga+ dikalabu kabayi mua kunyema. Padibu bambikila bua kubambuluisha, tshiakubateleja to.+ 12  Dîba adi bimenga bia Yuda ne bantu badi basombele mu Yelushalema nebaye kudi nzambi idibu balambula milambu,* ne nebalombe diambuluisha,+ kadi yoyi kayakubapandisha mu tshikondo tshia dikenga diabu nansha. 13  Bualu nzambi yebe mmilue ya bungi anu bu bimenga biebe, wewe Yuda, ne udi muashile tshintu tshia bundu* bioshelu bungi bu misesu idi mu Yelushalema, bioshelu bia kulambuila Bâla milambu.’+ 14  “Kadi wewe,* kusambidi bua bantu aba to. Kuedi lubila bua bualu buabu anyi kuenji disambila bua bualu buabu,+ bualu tshiakuteleja padibu bangela mbila bua dikenga diabu to. 15  Mbukenji kayi budi nabu munanga wanyi bua kuikala mu nzubu muanyiPadi ba bungi bakumbaje meji abu mabi avuabu baluke? Nebapangishe dikenga ne munyinyi wa tshijila* padidi dilua kuudi anyi? Neusanke bikole tshikondo atshi anyi? 16  Musangu kampanda Yehowa wakakubikila ne: mutshi wa olive udi usampila,Muimpe kumona ne bimuma bimpe. Mmumutue kapia ne tshiona tshia mukungulu mukole,Ne mbakose matamba awu. 17  “Yehowa wa biluilu, Mukukunyi,+ mmuambe ne: dikenga nedikukuate bua bubi buenza kudi ba mu nzubu wa Isalele ne ba mu nzubu wa Yuda badi bamfiikishe munda padibu balambula Bâla milambu.”+ 18  Yehowa wakammanyisha bua mmanye;Tshikondo atshi wewe wakenza bua mmone bivuabu benza. 19  Mvua anu bu muana wa mukoko udi ukokela, udibu baya nende ku tshishipelu. Tshivua mumanye ne: bavua bandukila meji mabi a ne:+ “Tubutulayi mutshi ne mamuma awu,Ne tumumbushe mu buloba bua badi ne muoyo,Bua kabavuluki kabidi dîna diende nansha.” 20  Kadi Yehowa wa biluilu udi ulumbuluisha ne buakane;Yeye udi ukonkonona meji adi munda menemene* ne muoyo.+ Ndekela mmone muudi udisombuela kudibu,Bualu kuudi wewe ke kundi mufile tshilumbu tshianyi. 21  Nunku, mona tshidi Yehowa wamba bua bantu ba mu Anatota+ badi bakeba bua kuangata muoyo* webe ne badi bamba ne: “Kuena ne bua kuamba mêyi a buprofete mu dîna dia Yehowa+ to, tshianana neufue ku tshianza tshietu”; 22  Nunku, mona tshidi Yehowa wa biluilu wamba: “Mona ndi mbalumbuluisha. Bansongalume nebafue ku muele wa mvita,+ bana babu ba balume ne bana babu ba bakaji nebafue ku tshiyole tshia nzala.+ 23  Kabakushiya nansha bashadile ba kudibu, bualu nentumine bantu ba mu Anatota+ dikenga mu tshidimu tshia dilumbuluishibua diabu.”

Note

Bambila pamuapa Yelemiya.
Anyi “Bikale nanku.”
Ku mua.: “njuka patshiatshia, mbadimuija.”
Anyi “bafuimishila muishi wa mulambu.”
Anyi “nzambi udi wenza bundu.”
Mmumue ne: Yelemiya.
Mmumue ne: milambu mifila mu ntempelo.
Anyi “mudi muntu udiumvua munda muende menemene.” Ku mua.: “tuonyi.”
Anyi “bakeba anyima.”