Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yehezekele 9:1-11

MALU ADI MU MUKANDA EU

  • Bashipianganyi 6 ne muntu udi ne kalondo ka mâyi a mukanda (1-11)

    • Dilumbuluisha didi dituadijila muaba munsantu (6)

9  Nunku wakela lubila ne dîyi dikole mu matshi anyi, wamba ne: “Bikidisha bantu bikala mua kunyoka tshimenga, muntu ne muntu ne tshia mvita tshiende tshia kubutula natshi mu tshianza tshiende!”  Ngakamona bantu basambombo bafumina luseke lua tshiibi tshia ku mutu+ tshidi tshitangile ku nord, muntu ne muntu ne tshiende tshia mvita tshia kutayisha natshi mu tshianza tshiende; kuvua muntu umue munkatshi muabu muvuale bilamba bia line, muikale ne kalondo ka mâyi a mukanda ka mufundi mu tshimono tshiende, ne bakabuela, kuimanabu ku luseke lua tshioshelu tshia tshiamu tshia mitaku.+  Pashishe butumbi bua Nzambi wa Isalele+ buakajuka bufumina kuvuabu busombe pa mutu pa bakeluba, kuyabu ku tshibuelelu tshia mushiku wa mbelu wa nzubu,+ ne yeye kutuadija kuela dîyi kudi muntu uvua muvuale bilamba bia line uvua ne kalondo ka mâyi a mukanda ka mufundi mu tshimono tshiende.  Yehowa wakamuambila ne: “Pitshila munkatshi mua tshimenga, munkatshi mua Yelushalema, tuaku tshimanyinu pa mpala ya bantu badi batua mikemu ne badila+ bua malu mabi adi enzeka mu tshimenga.”+  Yeye wakambila bakuabu mu matshi anyi ne: “Pitshilayi munkatshi mua tshimenga panyima pende ne nushipe. Dîsu dienu kadiumvu luse, ne kanufuidi muntu luse nansha.+  Nudi ne bua kushipa muntu mukulumpe, nsongalume, nsongakaji utshidi kamama, muana mutekete, ne bakaji, kushipa kushipelamu.+ Kadi kanusemenyi pabuipi ne muntu yonso udi ne tshimanyinu+ to. Nudi ne bua kutuadijila muaba wanyi munsantu.”+ Nunku bakatuadija ne bakulu bavua kumpala kua nzubu.+  Pashishe wakabambila ne: “Nyangayi nzubu eu ne uwujayi mbanza ne bantu banudi nushipa.+ Ndayi!” Nunku bakaya kushipabu bantu mu tshimenga.  Pavuabu benda babashipa, meme kushala nkayanyi, meme kutua mpala panshi, kuela dîyi ne: “Kaah, Mukalenge Mutambe Bunene Yehowa wanyi! Neubutule bashadile bonso ba Isalele paudi witshikijila Yelushalema tshiji tshiebe tshikole+ anyi?”  Ke yeye kungambila ne: “Tshilema tshia nzubu wa Isalele ne wa Yuda ntshinene, ntshinene be!+ Buloba mbuwuja tente ne diela dia mashi panshi,+ ne tshimenga ntshiuwule tente ne malu mabi.+ Bualu badi bamba ne: ‘Yehowa mmulekele buloba ebu, ne Yehowa kena umona to.’+ 10  Kadi meme, dîsu dianyi kadiakumvua luse; tshiakubaleja nansha muoyo wa luse to.+ Nentume bipeta bia njila wabu pa mutu wabu.” 11  Pashishe ngakamona muntu uvua muvuale bilamba bia line muikale ne kalondo ka mâyi a mukanda mu tshimono tshiende waluja dîyi, wamba ne: “Ndi muenze anu bu muuvua mungambile bua kuenza.”

Note