Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yehezekele 5:1-17

MALU ADI MU MUKANDA EU

  • Badi bumvuija dikuluka dia Yelushalema (1-17)

    • Nsuki mikungula ya muprofete miabanya mu bitupa bisatu (1-4)

    • Yelushalema mmubi menemene kupita bisamba bikuabu (7-9)

    • Badi benzela bantomboji malu mu mishindu isatu (12)

5  “Kadi wewe, muana wa muntu, angata muele wa mvita mutue wenze nawu mudimu bu kapaya ka mukoshi wa nsuki. Kungula mutu webe ne muedi webe, ne pashishe angata tshipiminu tshiebe tshia bujitu bua kupima ne kuabanya nsuki mu bitupa mu bitupa.  Newoshe tshia bisatu tshiayi mu kapia munda mua tshimenga padi matuku a ditshintshimika ajika.+ Pashishe newangate tshia bisatu tshikuabu, neutshitape ne muele wa mvita ku nseke yonso ya tshimenga,*+ ne tshia bisatu tshia ndekelu, neutshitangalaje mu lupepele, ne nentule muele wa mvita bua kutshipata.+  “Udi kabidi ne bua kuangata tundambu tuayi, kutujingila mu nzembe* ya tshilamba tshiebe.  Wangate ndambu wayi mukuabu, umuele mu kapia ne umuoshe. Kapia nekakuate nzubu yonso wa Isalele kafumina kuoku aku.+  “Mona tshidi Mukalenge Mutambe Bunene Yehowa wamba: ‘Yelushalema nyeye eu. Ndi mumuteke munkatshi mua bisamba, muikale ne matunga mamunyunguluke nseke yonso.  Kadi mmutombokele mapangadika anyi ne mêyi anyi mafunda, wenza malu mabi menemene kupita bisamba ne matunga adi mamunyunguluke nseke yonso.+ Bualu mbabenge mapangadika anyi, ne kabavua bendele mu mêyi anyi mafunda.’  “Nunku mona tshidi Mukalenge Mutambe Bunene Yehowa wamba: ‘Bu munuvua bena tshimvundu kupita bisamba bidi binunyunguluke, ne kanuyi bendele mu mêyi anyi mafunda peshi batumikile mapangadika anyi, kadi balonde mapangadika a bisamba bidi binunyunguluke,+  mona tshidi Mukalenge Mutambe Bunene Yehowa wamba: “Mona ndi nebe tshilumbu, wewe tshimenga,+ ne meme muine nenkumbaje dilumbuluisha munkatshi muebe mu mêsu mua bisamba.+  Nengenze munda muebe malu antu katshia tshiyi muanji kuenza, ne a buena angikala tshiyi mua kuenza kabidi, bua bienzedi biebe bionso bibi.+ 10  “‘“Nunku batatu badi munkatshi muebe nebadie bana babu ba balume,+ ne bana ba balume nebadie batatuabu, ne nenkumbaje dilumbuluisha munkatshi muebe ne nentangalaje bashadile bebe bonso mu nseke yonso.”’*+ 11  “‘Nunku bushuwa bu mundi ne muoyo,’ ke mudi Mukalenge Mutambe Bunene Yehowa wamba, ‘bualu muaba wanyi munsantu ke uuvua munyange ne mpingu yebe ya muendi ne bienzedi biebe bionso bibi,+ meme panyi nenkubenge;* dîsu dianyi kadiakumvua luse, ne tshiakuleja muoyo wa luse nansha.+ 12  Tshia bisatu tshiebe netshifue ku tshipupu* peshi netshifue munkatshi muebe ku tshiyole tshia nzala. Tshia bisatu tshikuabu netshikuluke panshi ku muele wa mvita+ ku nseke yebe yonso. Nentangalaje tshia bisatu tshia ndekelu mu nseke yonso,* ne nentule muele wa mvita bua kubipata.+ 13  Pashishe tshiji tshianyi netshitue ku ndekelu, ne tshiji tshikole tshimvua mubakuatshile netshidituije, ne nentukije.+ Bobu nebamanye ne: meme, Yehowa, ndi muakule bualu ndi nkeba bua bandamate anu meme,+ pangajikija kubitshikijila tshiji tshianyi tshikole. 14  “‘Nenkuvuije muaba mubutula ne tshintu tshia kupenda munkatshi mua bisamba bidi bikunyunguluke ne ku mêsu kua mupitshi wa njila yonso.+ 15  Neulue tshintu tshia kupenda ne tshia kupetula,+ tshilejilu tshidi tshidimuijangana, ne buôwa bukole kudi bisamba bidi bikunyunguluke, pandi nkumbaja dilumbuluisha dianyi kuudi mu tshiji ne mu tshiji tshikole ne manyoka mafila mu tshiji. Meme, Yehowa, ndi muakule. 16  “‘Nembatumine mikete ya lufu ya tshiyole tshia nzala bua kubabutula. Mikete indi ntuma neyikufikishe ku kabutu.+ Nembutule tshilaminu tshiebe tshia biakudia*+ bua kukukoleshila tshiyole tshia nzala. 17  Nenkutumine tshiyole tshia nzala ne nyama ya tshisuku ya luonji,+ nebikushipele bana. Tshipupu ne diela mashi panshi nebikupite bukole, ne nentume muele wa mvita bua kukuluisha.+ Meme, Yehowa, ndi muakule.’”

Note

Ku mua.: “yende yonso.”
Anyi “mibunyi.”
Ku mua.: “ku mpepele yonso.”
Anyi “nenkupuekeshe.”
Anyi “disama.”
Ku mua.: “ku mpepele yonso.”
Ku mua.: “ntshibula mbale ya mampa.” Pamuapa bakula bua mbale ivuabu balamina mampa.