Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yehezekele 43:1-27

MALU ADI MU MUKANDA EU

  • Butumbi bua Yehowa budi buwuja ntempelo (1-12)

  • Tshioshelu (13-27)

43  Pashishe wakaya nanyi ku tshiibi tshidi tshitangile ku est.+  Kuoku aku meme kumona butumbi bua Nzambi wa Isalele bufumina ku est,+ ne dîyi diende divua bu mukungulu wa mâyi a nkuaka mukole;+ ne buloba buakatokeshibua ne butumbi buende.+  Tshimvua mumone tshivua bu tshikena kumona tshingakamona pamvua* mulue bua kubutula tshimenga, ne tshiakamueneka bu tshingakamona pabuipi ne musulu wa Kebâ;+ ke meme kutua mpala panshi.  Pashishe, butumbi bua Yehowa buakabuela mu ntempelo* lua ku tshiibi tshidi tshitangile ku est.+  Pashishe, nyuma wakangambula, kuyaye nanyi mu lubanza lua munda, meme kumona ne: ntempelo uvua muwule tente ne butumbi bua Yehowa.+  Pashishe, ngakumvua muntu wakuila nanyi mu ntempelo, ne muntu au wakalua, kuimanaye ku luseke kuanyi.+  Wakangambila ne: “Muana wa muntu, eu mmuaba wa nkuasa wanyi wa bukalenge+ ne muaba wa kudiatshila makasa anyi,+ muaba ungasombela munkatshi mua tshisamba tshia Isalele bua kashidi.+ Ba mu nzubu wa Isalele, bobu ne bakalenge babu, kabakunyanga kabidi dîna dianyi dia tshijila+ ne masandi abu a mu nyuma ne bitalu bia bakalenge babu padibu bafua nansha.  Pakatekabu mushiku wa mbelu wabu pabuipi ne mushiku wa mbelu wanyi ne dibaya diabu dia mu luseke dia ku mushiku wa mbelu pabuipi ne dibaya dianyi dia mu luseke dia ku mushiku wa mbelu, kuikale anu tshimanu pankatshi panyi nabu,+ bakanyanga dîna dianyi dia tshijila ne malu mabi avuabu benze, nunku ngakabashipa mu tshiji tshianyi.+  Mpindieu, bumbushe masandi abu a mu nyuma ne bitalu bia bakalenge babu kule nanyi, nunku meme nensombe munkatshi muabu bua kashidi.+ 10  “Kadi wewe, muana wa muntu, umvuija ba mu nzubu wa Isalele mudi ntempelo eu,+ bua bumvue bundu bua bilema biabu,+ ne badi ne bua kulonga tshifundu tshiende.* 11  Bobu bumvue bundu bua malu onso adibu benze, udi ne bua kubaleja tshifundu tshia ntempelo, mushindu udiye, bipatukidi biende, ne bibuelelu biende.+ Ubaleje bifundu biende bionso ne mêyi ende mafunda, bifundu biende ne mikenji yende, ne ubifunde ku mêsu kuabu, bua balonde tshifundu tshiende tshionso ne batumikile mêyi mafunda ende.+ 12  Eu ke mukenji wa ntempelo. Tshitupa tshionso tshidi tshinyunguluke lusongo lua mukuna ntshitambe tshijila.+ Mona! Eu ke mukenji wa ntempelo. 13  “Ebu mbunene ne bule bua tshioshelu mu nkubita+ (ku nkubita yonso bavua basakidile ntanta wa bunene bua tshianza).* Tshitaku tshiatshi tshidi nkubita umue, ne tshidi nkubita umue mu butshiama. Tshidi ne mubangubangu wa bunene bua ntanta wa tshianza tshibalula* ku muelelu watshi wonso. Etshi ke tshitaku tshia tshioshelu. 14  Kumbukila panshi ku tshitaku too ne ku kabumba ka kuinshi kadi kanyunguluke, kudi nkubita ibidi, ne bunene buaku mbua nkubita umue. Kumbukila ku kabumba kakese kadi kanyunguluke too ne ku tshibumba tshinene tshidi tshinyunguluke, kudi nkubita inayi, ne bunene buatshi mbua nkubita umue. 15  Dîku dia tshioshelu didi nkubita inayi mu bule bua muulu, ne nsengu inayi mmipatuke ku dîku dia tshioshelu.+ 16  Dîku dia tshioshelu didi ne nseke inayi ya bule bumue, nkubita 12 mu bule ne nkubita 12 mu butshiama.+ 17  Nseke inayi ya kabumba kadi kanyunguluke, idi nkubita 14 mu bule ne nkubita 14 mu butshiama; ne mubangubangu udi munyunguluke udi tshitupa tshia nkubita, ne tshitaku tshiatshi tshidi nkubita umue mu nseke yonso. “Bibandilu biatshi mbitangile ku est.” 18  Pashishe, yeye wakangambila ne: “Muana wa muntu, mona tshidi Mukalenge Mutambe Bunene Yehowa wamba: ‘Aa ke mêyi a kulonda padibu benza tshioshelu, bua bamone mua kulambuilapu milambu ya kuosha mijima ne bua bamone mua kumiaminapu mashi.’+ 19  “‘Udi ne bua kufila muana mulume wa ngombe wa mu tshisumbu tshia ngombe bu mulambu wa mpekatu+ kudi bakuidi bena Lewi ba mu bana ba balume ba Sadoka,+ badi basemena pabuipi nanyi bua kungenzela mudimu,’ ke mudi Mukalenge Mutambe Bunene Yehowa wamba. 20  ‘Udi ne bua kuangata ndambu wa mashi ende, kuela ku nsengu inayi ya tshioshelu, ku matumba anayi a kabumba kadi kanyunguluke, ku mubangubangu mu nseke yonso, bua kutshikezula ku mpekatu ne kutshibuikidila mpekatu.+ 21  Pashishe, wangate muana mulume wa ngombe, mulambu wa mpekatu, bua kumuoshila muaba musungula wa ntempelo, pambelu pa muaba munsantu.+ 22  Dituku dibidi neulambule mbuji muimpe wa mpumbu bu mulambu wa mpekatu; ne nebakezule tshioshelu ku mpekatu anu bu muvuabu batshikezule ku mpekatu ne muana mulume wa ngombe.’ 23  “‘Paudi ujikija kutshikezula ku mpekatu, neulambule muana mulume muimpe wa ngombe wa mu tshisumbu tshia ngombe ne tshimpanga tshimpe tshia mukoko tshia mu tshisumbu tshia mikoko. 24  Udi ne bua kubifila kudi Yehowa, ne bakuidi badi ne bua kubiela mukele+ ne kubilambula Yehowa bu mulambu wa kuosha mujima. 25  Mu matuku muanda mutekete neulambule mbuji wa mpumbu bu mulambu wa mpekatu ku dituku ku dituku,+ kabidi ne muana mulume wa ngombe wa mu tshisumbu tshia ngombe ne tshimpanga tshia mukoko tshia mu tshisumbu tshia mikoko; neulambule nyama idi kayiyi ne kalema.* 26  Mu matuku muanda mutekete badi ne bua kubuikidila tshioshelu mpekatu, ne badi ne bua kutshikezula ne kutshibanjija. 27  Padi matuku au akumbana, mu dituku dia muanda mukulu+ ne matuku adi alonda, bakuidi nebalambule milambu yenu* ya kuosha mijima ne milambu yenu ya diumvuangana pa tshioshelu; nunku nensanke bua bualu buebe,’+ ke mudi Mukalenge Mutambe Bunene Yehowa wamba.”

Note

Anyi pamuapa: “pavuaye.”
Ku mua.: “nzubu.”
Ku mua.: “kupima mushindu wende.”
Badi bakula bua nkubita ya mile. Tang. Tshis. B14.
Santimetre mitue ku 22,2. Tang. Tshis. B14.
Anyi “idi mipuangane.”
Mmumue ne: ya tshisamba.