Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yehezekele 41:1-26

MALU ADI MU MUKANDA EU

  • Muaba munsantu wa ntempelo (1-4)

  • Tshimanu ne nzubu ya mu nseke (5-11)

  • Nzubu wa ku ouest (12)

  • Badi bapima bunene bua nzubu (13-15a)

  • Munda mua muaba munsantu (15b-26)

41  Pashishe, wakambueja mu muaba munsantu wa pambelu,* ne wakapima makunji a mu nseke; avua nkubita* isambombo mu butshiama luseke lumue ne nkubita isambombo mu butshiama luseke lukuabu.  Tshibuelelu tshivua ne butshiama bua nkubita dikumi, ne bimanu bia mu nseke* bia tshibuelelu, bivua nkubita itanu luseke lumue ne nkubita itanu luseke lukuabu. Wakapima bule buatshi, buvua bua nkubita 40, ne butshiama buatshi, nkubita 20.  Pashishe, wakabuela munda,* yeye kupima dikunji dia ku luseke lua tshibuelelu, divua ne mupimbu wa nkubita ibidi, ne tshibuelelu tshivua bunene bua nkubita isambombo. Bimanu bia mu nseke bia tshibuelelu bivua* nkubita muanda mutekete.  Pashishe, wakapima nzubu udi mutangilangane ne muaba munsantu wa pambelu, uvua bule bua nkubita 20 ne butshiama bua nkubita 20.+ Yeye kungambila ne: “Eu ke Muaba Mutambe Tshijila.”+  Pashishe, wakapima tshimanu tshia ntempelo, tshivua ne mupimbu wa nkubita isambombo. Nzubu ya mu nseke ivua minyunguluke ntempelo ivua ne bunene bua nkubita inayi.+  Nzubu ya mu nseke ivua ya bisasa bisatu biye muulu, tshimue pa mutu pa tshikuabu, tshisasa tshionso tshikale ne nzubu 30 munda. Kuvua tubumba tunyunguluke tshimanu tshia ntempelo tuvua tuambuluisha bu bishimikidi bia nzubu ya mu nseke, nunku bishimikidi ebi kabivua bibuele mu tshimanu tshia ntempelo muine+ to.  Mu nseke yonso ibidi ya ntempelo muvua kajila kavua kanyunguluke* kenda kadiunda pavuaku kabanda ku nzubu ya kuulu.+ Bunene buvua buenda budiunda kumbukila ku tshisasa tshimue too ne ku tshisasa tshikuabu pavua muntu ubanda ufumina ku tshisasa tshia muinshi mutangile ku tshisasa tshia kuulu upitshila mu tshisasa tshia pankatshi.  Ngakamona ne: kuvua tshibumba tshiasa tshinyunguluke nseke yonso ya ntempelo, ne bishimikidi bia nzubu ya mu nseke bivua bule bua muulu bua dilenge dijima dia nkubita isambombo too ne ku ditumba.  Bunene bua tshimanu tshia pambelu tshia nzubu ya mu nseke buvua bua nkubita itanu. Kuvua muaba wa tshibuashibuashi* pamue ne nzubu udi ne nzubu ya mu nseke uvua tshitupa tshia ku ntempelo. 10  Pankatshi pa ntempelo ne bibambalu bia kudiila*+ pavua muaba uvua bunene bua nkubita 20 luseke ne luseke luonso. 11  Kuvua tshibuelelu pankatshi pa nzubu ya mu nseke ne muaba wa tshibuashibuashi luseke lua ku nord, ne tshibuelelu tshikuabu tshivua luseke lua ku sud. Bunene bua muaba wa tshibuashibuashi buvua bua nkubita itanu mu nseke yonso. 12  Nzubu mukuabu uvua ku ouest mutangilangane ne muaba wa tshibuashibuashi, uvua nkubita 70 mu butshiama ne nkubita 90 mu bule; tshimanu tshia nzubu eu tshivua ne mupimbu wa nkubita itanu mu nseke yonso. 13  Wakapima ntempelo, uvua ne bule bua nkubita lukama. Muaba wa tshibuashibuashi, nzubu mukuabu au,* ne bimanu biende, bivua pabi ne bule bua nkubita lukama. 14  Butshiama bua luseke lua kumpala kua ntempelo ludi lutangile ku est ne muaba wa tshibuashibuashi, buvua bua nkubita lukama. 15  Wakapima bule bua nzubu uvua mutangilangane ne muaba wa tshibuashibuashi lua panyima pamue ne mbalanda yende ya mu nseke yonso ibidi, buvua bua nkubita lukama. Wakapima kabidi muaba munsantu wa pambelu, muaba munsantu wa munda,+ ne ntanda ya lubanza, 16  pamue ne mishiku ya mbelu, madidishi avua ne nyunguluilu ivua yenda ikepela bunene,+ ne mbalanda ivua miaba isatu ayi. Pabuipi ne mushiku wa mbelu, kuvua mabaya malamakaja+ kumbukila panshi too ne ku madidishi; ne madidishi avua mabuikila. 17  Bakapima pa mutu pa tshibuelelu, ntempelo wa munda, pambelu ne tshimanu tshijima mu nseke yonso. 18  Bavua bondole bimfuanyi bia bakeluba+ ne bia mabue a ngaji,+ dibue dia ngaji dionso dikale pankatshi pa bakeluba babidi, ne mukeluba yonso uvua ne mpala ibidi. 19  Mpala wa muntu uvua mutangile ku dibue dia ngaji luseke lumue, ne mpala wa ntambue* uvua mutangile ku dibue dia ngaji luseke lukuabu.+ Bivua biondola nunku mu ntempelo muonso. 20  Kumbukila panshi too ne muaba wa pa mutu pa tshibuelelu kuvua bimfuanyi bia bakeluba ne bia mabue a ngaji biondola ku tshimanu tshia muaba munsantu. 21  Mabaya a mu nseke a ku mushiku wa mbelu* wa muaba munsantu avua bule bua muomumue nseke yonso inayi.+ Kumpala kua muaba wa tshijila* kuvua tshintu tshienze bu 22  tshioshelu tshia mabaya+ tshivua ne butumbuke bua nkubita isatu ne bule bua nkubita ibidi. Tshivua ne bipanda mu matumba, ne tshitaku* tshiatshi ne nseke yatshi bivua bienza ne mabaya. Pashishe wakangambila ne: “Aa ke mêsa adi kumpala kua Yehowa.”+ 23  Muaba munsantu wa pambelu ne muaba wa tshijila, muaba wonso uvua ne biibi bibidi.+ 24  Biibi bivua ne bitupa bibidi bivua bibunyika, bitupa bibidi bua tshiibi tshionso. 25  Kuvua bimfuanyi bia bakeluba ne bia mabue a ngaji biondola ku biibi bia muaba munsantu, bienze bu bia ku bimanu.+ Kuvua kabidi mabaya masa* kumpala kua lutanda pambelu. 26  Kuvua kabidi madidishi avua ne nyunguluilu ivua yenda ikepela bunene+ ne bimfuanyi bia mabue a ngaji mu nseke yonso ibidi ya lutanda, kabidi ne mu nzubu ya mu nseke ya ntempelo ne ku tuntanda.

Note

Ku mua.: “ntempelo.” Mu nshapita wa 41 ne wa 42, tshiambilu etshi tshidi tshileja muaba munsantu wa pambelu (Muaba wa tshijila) anyi muaba munsantu wonso (ntempelo pamue ne Muaba wa tshijila ne Muaba mutambe tshijila).
Badi bakula bua nkubita ya mile. Tang. Tshis. B14.
Ku mua.: “nseke.”
Mmumue ne: muaba munsantu wa munda menemene, anyi Muaba Mutambe Tshijila.
Ku mua.: “Butshiama bua tshibuelelu buvua.”
Pamuapa mbakula bua bibandilu bidi binyunguluka.
Pamuapa nkajila kakese kavua kanyunguluke ntempelo.
Anyi “nzubu.”
Mmumue ne: nzubu wa ku ouest kua muaba wa tshijila.
Anyi “muana wa ntambue wa musalala.”
Ku mua.: “Dikunji.” Badi pamuapa bakula bua tshibuelelu tshia mu muaba wa tshijila.
Pamuapa mbakula bua Muaba mutambe tshijila.
Ku mua.: “bule.”
Anyi “kalutanda.”