Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yehezekele 40:1-49

MALU ADI MU MUKANDA EU

  • Badi baya ne Yehezekele mu Isalele mu tshikena kumona (1, 2)

  • Yehezekele udi umona ntempelo wa mu tshikena kumona (3, 4)

  • Mbanza ne biibi (5-47)

    • Tshiibi tshia pambelu tshia ku est (6-16)

    • Lubanza lua pambelu; biibi bikuabu (17-26)

    • Lubanza lua munda ne biibi (27-37)

    • Bibambalu bua mudimu wa ku ntempelo (38-46)

    • Tshioshelu (47)

  • Lutanda lua ntempelo (48, 49)

40  Mu tshidimu tshia 25 tshia dikuatshibua dietu ku babende,+ ku ntuadijilu kua tshidimu, mu dituku dia dikumi dia ngondo, mu tshidimu tshia 14 panyima pa dikuluka dia tshimenga,+ mu dituku adi mene tshianza tshia Yehowa tshivua pambidi panyi, ne yeye wakaya nanyi mu tshimenga.+  Wakaya nanyi mu buloba bua Isalele ku diambuluisha dia bikena kumona bia kudi Nzambi, kuntekaye pa mukuna mutumbuke bikole+ pavuabu bibake tshintu bu tshimenga ku sud.  Pakayaye nanyi kuntu aku, ngakamona muntu uvua ne tshimuenekelu bu tshia tshiamu tshia mitaku.+ Uvua ne muonji wa line ne dilenge* dia kupima nadi mu tshianza tshiende,+ uvua muimane mu tshibuelelu.  Muntu au wakangambila ne: “Muana wa muntu, tangila bimpe, teleja bimpe, ne teya ntema* ku tshintu tshionso tshindi nkuleja, bualu ke tshivuabu baluile nebe muaba eu. Ambila nzubu wa Isalele bualu buonso buudi umona.”+  Ngakamona tshimanu tshinyunguluke tshitupa tshia pambelu tshia ntempelo.* Mu tshianza tshia muntu au muvua dilenge dia kupima nadi dia bule bua nkubita isambombo (ku nkubita yonso bavua basakidile ntanta wa bunene bua tshianza).* Wakabanga kupima tshimanu, ne mupimbu watshi uvua wa dilenge dimue ne butumbuke buatshi buvua bua dilenge dimue.  Pashishe, wakalua ku tshiibi tshivua tshitangile ku est,+ yeye kubanda pa bibandilu biatshi. Pakapimaye mushiku wa mbelu wa tshiibi, butshiama buawu buvua bua dilenge dimue, ne butshiama bua mushiku wa mbelu mukuabu buvua kabidi dilenge dimue.  Nzubu wa mulami yonso uvua dilenge dimue mu bule ne dilenge dimue mu butshiama, ne kuvua ntanta wa nkubita itanu pankatshi pa nzubu ya balami.+ Mushiku wa mbelu wa tshiibi wa kumpenga kua lutanda lua tshiibi tshidi tshitangile munda, uvua bule bua dilenge dimue.  Wakapima lutanda lua tshiibi lua munda, ne luvua dilenge dimue.  Pashishe, wakapima lutanda lua tshiibi, luvua nkubita muanda mukulu; ne wakapima makunji alu a mu nseke, avua nkubita ibidi; ne lutanda lua tshiibi luvua luseke ludi lutangile munda. 10  Kuvua nzubu isatu ya balami luseke luonso lua tshiibi tshia ku est. Busatu buayi ivua bunene bumue, ne makunji a mu nseke a luseke luonso avua bunene bumue. 11  Pashishe, wakapima butshiama bua tshibuelelu tshia tshiibi, buvua nkubita dikumi; ne bule bua tshiibi buvua nkubita 13. 12  Muaba mukosolola udi kumpala kua nzubu ya balami, uvua nkubita umue luseke luonso. Nzubu ya balami ya nseke yonso ibidi ivua nkubita isambombo nzubu ne nzubu yonso. 13  Pashishe, wakapima tshiibi kumbukila ku musaka wa nzubu umue wa mulami* too ne ku musaka wa nzubu mukuabu, ntanta uvua wa nkubita 25 mu butshiama; tshibuelelu tshimue tshivua tshitangilangane ne tshibuelelu tshikuabu.+ 14  Pashishe, wakapima makunji a mu nseke, avua bule bua nkubita 60, kabidi ne makunji a mu nseke adi mu biibi mu nseke yonso ya lubanza. 15  Kumbukila kumpala kua tshibuelelu tshia tshiibi too ne kumpala kua lutanda luseke lua munda lua tshiibi, ntanta uvua nkubita 50. 16  Kuvua madidishi avua ne nyunguluilu ivua yenda ikepela bunene*+ a nzubu ya balami ne a makunji ayi a mu nseke munda mua tshiibi luseke luonso. Munda mua ntanda muvua kabidi madidishi luseke ne luseke luonso, ne kuvua bimfuanyi bia mabue a ngaji+ ku makunji a mu nseke. 17  Pashishe, wakambueja mu lubanza lua pambelu, meme kumona bibambalu bia kudiila*+ ne njila mulamika mabue panshi munyunguluke lubanza. Kuvua bibambalu bia kudiila 30 mu njila au. 18  Njila mulamika mabue wa kumpenga kua biibi, uvua bunene bumue ne bule bua biibi, eu uvua njila mulamika mabue wa muinshi. 19  Pashishe, wakapima ntanta* wa kumbukila kumpala kua tshiibi tshia kuinshi too ne kumpenga kua lubanza lua munda. Ntanta uvua wa nkubita lukama ku est ne ku nord. 20  Lubanza lua pambelu luvua ne tshiibi tshitangile ku nord, ne yeye wakapima bule buatshi ne butshiama buatshi. 21  Kuvua nzubu ya balami isatu ku luseke luonso. Makunji atshi a mu nseke ne lutanda bivua bunene bumue ne bia tshiibi tshia kumpala. Tshivua nkubita 50 mu bule ne nkubita 25 mu butshiama. 22  Madidishi atshi, lutanda luatshi, ne bimfuanyi biatshi bia mabue a ngaji+ bivua bunene bumue ne bia ku tshiibi tshia ku est. Bua kufikaku, bantu bavua babanda bibandilu muanda mutekete, ne lutanda luatshi luvua lutangilangane nabi. 23  Kuvua tshiibi mu lubanza lua munda tshivua tshitangilangane ne tshiibi tshia ku nord ne tshikuabu tshitangilangane ne tshia ku est. Yeye wakapima ntanta wa ku tshiibi ne ku tshiibi, uvua wa nkubita lukama. 24  Pashishe wakaya nanyi luseke lua ku sud, ne meme kumona tshiibi ku luseke lua ku sud.+ Yeye wakapima makunji atshi a mu nseke ne lutanda luatshi, bivua bunene bumue ne bikuabu. 25  Kuvua madidishi ku luseke ne ku luseke luatshi ne lua lutanda luatshi, bu madidishi makuabu au. Tshivua ne nkubita 50 mu bule ne nkubita 25 mu butshiama. 26  Kuvua bibandilu muanda mutekete bivua bifikisha kuditshi,+ ne lutanda luatshi luvua lutangilangane nabi. Tshivua ne bimfuanyi bia mabue a ngaji ku makunji atshi a mu nseke, tshimue mu luseke ne luseke luonso. 27  Lubanza lua munda luvua ne tshiibi tshitangile ku sud; yeye wakapima lua ku sud ntanta wa ku tshiibi ne ku tshiibi, ne ntanta au uvua wa nkubita lukama. 28  Pashishe, wakambueja mu lubanza lua munda kupitshila mu tshiibi tshia ku sud; pakapimaye tshiibi tshia ku sud, tshivua bunene bumue ne bikuabu. 29  Nzubu yatshi ya balami, makunji atshi a mu nseke, ne lutanda luatshi bivua bunene bumue ne bikuabu. Kuvua madidishi ku luseke ne luseke luatshi luonso ne lua lutanda luatshi. Tshivua nkubita 50 mu bule ne 25 mu butshiama.+ 30  Kuvua ntanda mu nseke yonso; ivua nkubita 25 mu bule ne nkubita itanu mu butshiama. 31  Lutanda luatshi luvua lutangilangane ne lubanza lua pambelu, ne kuvua bimfuanyi bia mabue a ngaji ku makunji atshi a mu nseke,+ ne bibandilu muanda mukulu bivua bifikisha kuditshi.+ 32  Pakambuejaye mu lubanza lua munda lua ku est, yeye wakapima tshiibi, ne tshivua bunene bumue ne bikuabu. 33  Nzubu yatshi ya balami, makunji atshi a mu nseke, ne lutanda luatshi bivua bunene bumue ne bikuabu, ne kuvua madidishi ku luseke ne luseke luatshi ne lua lutanda luatshi. Tshivua nkubita 50 mu bule ne nkubita 25 mu butshiama. 34  Lutanda luatshi luvua lutangilangane ne lubanza lua pambelu, ne kuvua bimfuanyi bia mabue a ngaji ku makunji atshi onso abidi a mu nseke, ne bibandilu muanda mukulu bivua bifikisha kuditshi. 35  Pashishe, wakambueja mu tshiibi tshia ku nord,+ yeye kutshipima; tshivua bunene bumue ne bikuabu. 36  Nzubu yatshi ya balami, makunji atshi a mu nseke, ne lutanda luatshi bivua bunene bumue ne bikuabu. Tshivua ne madidishi ku luseke ne luseke luonso. Tshivua nkubita 50 mu bule ne nkubita 25 mu butshiama. 37  Makunji atshi a mu nseke avua matangilangane ne lubanza lua pambelu, ne kuvua bimfuanyi bia mabue a ngaji ku makunji atshi onso abidi a mu nseke, ne bibandilu muanda mukulu bivua bifikisha kuditshi. 38  Tshibambalu tshia kudiila ne tshibuelelu tshiatshi tshivua pabuipi ne makunji a mu nseke abidi a biibi, muaba uvuabu basukuila milambu ya kuosha mijima.+ 39  Kuvua mêsa abidi ku luseke ne luseke luonso lua lutanda lua tshiibi pavuabu bashipela milambu ya kuosha mijima,+ milambu ya mpekatu,+ ne milambu ya dipila.+ 40  Mu njila udi mubande ku tshiibi tshia ku nord, muvua mêsa abidi pambelu pa tshibuelelu. Kuvua kabidi mêsa abidi ku luseke lukuabu lua lutanda lua tshiibi. 41  Kuvua mêsa anayi luseke ne luseke luonso lua tshiibi, onso masanga, mêsa muanda mukulu, pavuabu bashipela milambu. 42  Mêsa anayi a mulambu wa kuosha mujima avua a dibue disonga. Avua nkubita umue ne tshitupa mu bule, nkubita umue ne tshitupa mu butshiama, ne nkubita umue mu butumbuke. Bavua balaminapu bintu bivuabu bashipa nabi milambu ya kuosha ne milambu mikuabu. 43  Tutekelu tua bintu, tua bunene bua tshianza, tuvua tuasa mu nseke yonso ya bimanu bia munda; ne bavua bateka munyinyi wa milambu ya kupa pa mêsa. 44  Pambelu pa tshiibi tshia munda pavua bibambalu bia kudiila bia bimbi ba misambu;+ bivua mu lubanza lua munda pabuipi ne tshiibi tshia ku nord, bitangile ku sud. Tshibambalu tshikuabu tshia kudiila tshivua pabuipi ne tshiibi tshia ku est, tshitangile ku nord. 45  Yeye wakangambila ne: “Tshibambalu tshia kudiila tshidi tshitangile ku sud etshi ntshia bakuidi badi batangila midimu ya mu ntempelo.+ 46  Tshibambalu tshia kudiila tshidi tshitangile ku nord ntshia bakuidi badi batangila mudimu wa ku tshioshelu.+ Bobu mbana balume ba Sadoka,+ ba mu bena Lewi badibu basungule bua kusemena pabuipi ne Yehowa bua kumuenzela mudimu.”+ 47  Pashishe, yeye wakapima lubanza lua munda. Luvua nkubita lukama mu bule ne nkubita lukama mu butshiama, nseke inayi ya bule bua muomumue. Tshioshelu tshivua tshitangilangane ne ntempelo. 48  Pashishe, yeye wakambueja mu lutanda lua ntempelo,+ yeye kupima dikunji dia mu luseke dia lutanda, ne divua nkubita itanu luseke lumue ne nkubita itanu luseke lukuabu. Butshiama bua tshiibi buvua nkubita isatu luseke lumue ne nkubita isatu luseke lukuabu. 49  Lutanda luvua nkubita 20 mu bule ne nkubita 11* mu butshiama. Bua kufikaku, bantu bavua babanda bibandilu. Kuvua bipanda bia nshindamenu kumpenga kua makunji a mu nseke, tshimue ku luseke luonso.+

Note

Ku mua.: “teka muoyo webe.”
Ku mua.: “nzubu.” Mbakudimune muaku eu mushindu eu mu nshapita wa 40-48 padi “nzubu” uleja nzubu ya ku ntempelo anyi ntempelo muine.
Ku mua.: “dilenge dia kupima nadi dia nkubita 6, nkubita umue ne ntanta wa bunene bua tshianza.” Badi bakula bua nkubita ya mile. Tang. Tshis. B14.
Pamuapa mbakula bua pa mutu pa tshimanu tshia nzubu wa mulami.
Anyi “madidishi enda adibonda.”
Anyi “meme kumona nzubu.”
Ku mua.: “butshiama.”
Anyi pamuapa: “12.”