Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yehezekele 4:1-17

MALU ADI MU MUKANDA EU

  • Badi bumvuija ditshintshimika dia Yelushalema (1-17)

    • Dipila diambula bua matuku 390 ne matuku 40 (4-7)

4  “Wewe, muana wa muntu, angata didioto, uditeke kumpala kuebe. Zolapu tshimenga, mmumue ne: Yelushalema.  Tshitshintshimika,+ asa tshimanu bua kutshitshintshimika,+ imanyika tshibumba tshikole bua kutshitshintshimika,+ asa bitudilu bua kutshiluisha, ne tshinyungulula ne mitshi minene ya kupula nayi bimanu.+  Angata mpanu wa tshiamu, umuteke bu tshimanu tshia tshiamu pankatshi pebe ne tshimenga. Pashishe tangija mpala webe kuditshi, ne netshishale tshitshintshimika; udi ne bua kutshitshintshimika. Etshi ntshimanyinu bua nzubu wa Isalele.+  “Pashishe udi ne bua kuladila ku luseke lua dia bakaji ne kuteka tshilema tshia nzubu wa Isalele pambidi pebe.*+ Newambule tshilema tshiabu mu bungi bua matuku audi uladila ku luseke luebe alu.  Nenkukosele matuku 390 bilondeshile bungi bua bidimu bia tshilema tshiabu,+ ne newambule tshilema tshia nzubu wa Isalele.  Udi ne bua kuajikija. “Pashishe musangu muibidi, neulale panshi ku luseke luebe lua dia balume ne newambule tshilema tshia nzubu wa Yuda+ bua matuku 40. Dituku dimue bu tshidimu tshimue, dituku dimue bu tshidimu tshimue, ke tshindi mukupeshe.  Neutangije mpala webe ku ditshintshimika dia Yelushalema+ ne diboko diebe kadiyi tshintu, ne udi ne bua kuamba mêyi a buprofete a bualu buamufikila.  “Mona! nenkusuike mionji bua kumonyi mua kukudimuka luseke luebe lumue bua kuladila luseke luebe lukuabu too ne paudi ukumbaja matuku a ditshintshimika diebe.  “Udi ne bua kuangata ntete ya blé, orje, nkunde ya minene, tukunde tua tukese, mponda, ne ntete ya epotre,* kubiela mu tshintu tshimue ne kudienzela nabi diampa. Bualu bungi bua matuku audi uladila mu luseke, matuku 390, neudie diampa adi.+ 10  Neupime ne neudie biakudia bia bujitu bua nshekele 20* ku dituku. Neubidie mu bikondo bikosa. 11  “Neunue mâyi mapima, tshia bisambombo tshimue tshia hine.* Neuanue mu bikondo bikosa. 12  “Neudie diampa adi anu bu muudi mua kudia diampa dia orje dia tshijengu; neudioshe mu mêsu abu, wangata tumvi tua muntu tume bu bia kuosha nabi.” 13  Yehowa wakatungunuka ne kuamba ne: “Ke muadia bena Isalele mampa abu, kaayi makezuke, munkatshi mua bisamba mungabatangalaja.”+ 14  Pashishe ngakamba ne: “Nanku to, Mukalenge Mutambe Bunene Yehowa! Katshia ku buana buanyi too ne lelu, tshitu* muanji kudinyanga ne kudia kua munyinyi wa nyama musangana mufue anyi nyama musunsula,+ ne munyinyi udi kawuyi mukezuke* kawutu muanji kubuela mukana muanyi to.”+ 15  Nunku wakangambila ne: “Mbimpe, nenkuanyishile bua kuangata tumvi tua ngombe pamutu pa tumvi tua muntu, ne newoshilapu diampa diebe.” 16  Pashishe wakangambila ne: “Muana wa muntu, mona ndi mbutula tshilaminu tshiebe tshia biakudia* mu Yelushalema,+ ne tshitupa tshiabu tshia biakudia bipima nebatshidie ne kanyinganyinga kakole,+ ne mâyi abu mapima nebaanue ne buôwa bua bungi.+ 17  Bualu ebu nebuenzeke bua padi biakudia ne mâyi bipangika, batangilangane umue ne mukuabu bakatshila ne banyane bua tshilema tshiabu.

Note

Ku mua.: “palu,” mmumue ne: luseke lua Yehezekele lua dia bakaji.
Ntete ya blé ya mushindu mukuabu.
Grame mitue ku 230. Tang. Tshis. B14.
Bu litre 0,6. Tang. Tshis. B14.
Anyi “anyima wanyi katu.”
Anyi “munyanguke.”
Ku mua.: “ndi ntshibula mbale ya mampa.” Pamuapa bakula bua mbale ivuabu balamina mampa.