Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yehezekele 39:1-29

MALU ADI MU MUKANDA EU

  • Dibutudibua dia Goga ne basalayi bende (1-10)

  • Dijikibua mu Tshibandabanda tshia Hamona-Goga (11-20)

  • Dipingajibua kabidi dia Isalele (21-29)

    • Nyuma wa Nzambi muitshikijila Isalele (29)

39  “Nunku wewe, muana wa muntu, amba mêyi a buprofete afikila Goga,+ muambila ne: ‘Mona tshidi Mukalenge Mutambe Bunene Yehowa wamba: “Ndi nebe tshilumbu, wewe Goga, mfumu munene* wa Mesheka ne Tubala.+  Nenkukudimune, nenkulombole, nenkubandishe ufumina ku miaba ya kule menemene ya ku nord,+ ne nendue nebe pa mikuna ya Isalele.  Nensompole buta buebe bua mikete budi mu tshianza tshiebe tshia bakaji ne nenkulule mikete yebe idi mu tshianza tshiebe tshia balume.  Neukuluke pa mikuna ya Isalele,+ wewe ne bisumbu biebe bionso bia basalayi ne bukua bantu buikala nebe. Nenkufile bu tshiakudia kudi nyunyi ya mishindu yonso itu idia munyinyi ne kudi nyama ya tshisuku ya mu mpata.”’+  “‘Neukuluke mu mpata mualabale,+ bualu meme muine ke udi muakule,’ ke mudi Mukalenge Mutambe Bunene Yehowa wamba.  “‘Nentumine Magoga ne badi basombele mu bidiila* talalaa kapia,+ nunku nebafike ku dimanya ne: meme ndi Yehowa.  Nengenze bua dîna dianyi dia tshijila dimanyike munkatshi mua bantu banyi bena Isalele, ne tshiakuitaba bua dîna dianyi dia tshijila dinyangibue kabidi nansha; nunku bisamba nebifike ku dimanya ne: meme ndi Yehowa,+ Wa Tshijila mu Isalele.’+  “‘Eyowa, bualu ebu budi bulua, ne nebuenzeke,’ ke mudi Mukalenge Mutambe Bunene Yehowa wamba. ‘Edi ke dituku dindi muambe.  Bantu badi basombele mu bimenga bia Isalele nebapatuke ne nebatemeshe tupia ne bia mvita: ngabu mikese* ne ngabu minene, mata a mikete ne mikete, tubonga tua mvita* ne mafuma. Nebatemeshe nabi tupia+ bidimu muanda mutekete. 10  Kabakuikala dijinga ne kuangula nkunyi mu mpata anyi kusangisha nkunyi mu metu, bualu nebangate bia mvita bua kutemesha nabi tupia.’ “‘Nebanyenge bintu kudi bavua babanyenge bintu, ne nebapawule bavua babapawula,’ ke mudi Mukalenge Mutambe Bunene Yehowa wamba. 11  “‘Dituku adi nempeshe Goga+ muaba wa kumujiikilabu mu Isalele amu, mu tshibandabanda tshia badi benza ngendu ku est kua mbuu, muaba eu newukange njila wa badi bapita. Ke muaba wajiikilabu Goga ne bisumbu biende bionso, ne nebawubikile ne: Tshibandabanda tshia Hamona-Goga.*+ 12  Ba mu nzubu wa Isalele nebenze ngondo muanda mutekete babajiika bua kusukula buloba.+ 13  Bantu bonso ba mu buloba nebenze mudimu wa kubajiika, ne bualu ebu nebubapeteshe lumu mu dituku dindi nditumbisha,’+ ke mudi Mukalenge Mutambe Bunene Yehowa wamba. 14  “‘Nebateke bantu bua kupita mu buloba misangu yonso ne kujiika bitalu bidibu bashiye pa buloba bua kubusukula. Nebatungunuke ne dikeba mu ngondo muanda mutekete. 15  Padi bantu badi bapita mu buloba bamona mufuba wa muntu, nebateke tshimanyinu ku luseke luawu. Pashishe, badibu bapeshe mudimu wa dijiikangana nebawujiike mu Tshibandabanda tshia Hamona-Goga.+ 16  Muomu amu nemuikale kabidi tshimenga tshidi ne dîna ne: Hamona.* Nunku bobu nebasukule buloba.’+ 17  “Kadi wewe, muana wa muntu, mona tshidi Mukalenge Mutambe Bunene Yehowa wamba: ‘Ambila nyunyi ya mishindu yonso ne nyama yonso ya tshisuku ya mu mpata ne: “Disangishayi pamue, nulue. Disangishayi ku mulambu wanyi undi nnulongoluela, mulambu munene pa mikuna ya Isalele.+ Nenudie munyinyi ne nenunue mashi.+ 18  Nenudie munyinyi wa bantu ba bukole ne nenunue mashi a bamfumu ba pa buloba, bimpanga bia mikoko, bana ba mikoko, mbuji ne ngombe milume, nyama yonso ya manyi ya mu Bashana. 19  Nenupatshishe mafu enu ne mafuta, ne nenunue mashi too ne panudi nukuatshika ku mulambu undi nnulongoluela.”’ 20  “‘Nenukute tubalu ne bendeshi ba matempu a mvita, bantu ba bukole ne bilobo bia mvita bia mishindu yonso+ ku mêsa anyi,’ ke mudi Mukalenge Mutambe Bunene Yehowa wamba. 21  “‘Nendeje butumbi buanyi munkatshi mua bisamba, ne bisamba bionso nebimone dilumbuluisha dindi mukumbaje ne bukole bundi* muleje munkatshi muabi.+ 22  Kubangila ku dituku adi, ba mu nzubu wa Isalele nebafike ku dimanya ne: meme ndi Yehowa Nzambi wabu. 23  Nunku, bisamba nebimanye ne: ba mu nzubu wa Isalele bavua bakuatshibue, baye nabu ku babende bua tshilema tshiabu, bualu kabavua ne lulamatu kundi+ to. Nunku ngakabasokoka mpala wanyi,+ meme kubafila mu tshianza tshia bena lukuna babu,+ ne bakakuluka bonso ku muele wa mvita. 24  Ngakabenzela malu bilondeshile bukoya buabu ne dishipa diabu dia mikenji, ke bualu kayi ngakabasokoka mpala wanyi.’ 25  “Nunku, mona tshidi Mukalenge Mutambe Bunene Yehowa wamba: ‘Nempingaje tshiakabidi bakuatshibue ba Yakoba+ ne nengumvuile nzubu mujima wa Isalele luse;+ ne nengimanyine* dîna dianyi dia tshijila ne tshisumi tshionso.+ 26  Bobu bamane kupuekeshibua milongo bua dipanga diabu dionso dia lulamatu kundi,+ nebasombe mu buloba buabu talalaa, kakuyi muntu wa kubatshinyisha.+ 27  Pandi mbapingaja mbumbusha mu bukua bantu ne mbasangisha pamue mbumbusha mu maloba a bena lukuna babu,+ nendijidile kabidi munkatshi muabu ku mêsu kua bisamba bia bungi.’+ 28  “‘Nebafike ku dimanya ne: meme ndi Yehowa Nzambi wabu pandi mbatuma ku babende bakuatshibue munkatshi mua bisamba ne pashishe mbapingaja mu buloba buabu, tshiyi nshiya nansha umue wa kudibu.+ 29  Tshiakubasokoka mpala wanyi kabidi nansha,+ bualu nengitshikijile nzubu wa Isalele nyuma wanyi,’+ ke mudi Mukalenge Mutambe Bunene Yehowa wamba.”

Note

Anyi “mukokeshi munene.”
Anyi “bisanga.”
Ngabu mukese uvuabu batamba kuambula kudi bedi ba mikete.
Anyi pamuapa: “misongolo,” tshia mvita tshikale ne mutu musongoloke.
Anyi “Tshibandabanda tshia misumba ya Goga.”
Diumvuija: “Misumba.”
Ku mua.: “tshianza tshindi.”
Ku mua.: “nendeje lulamatu lukole bua.”