Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yehezekele 38:1-23

MALU ADI MU MUKANDA EU

  • Mvita idi Goga wela Isalele (1-16)

  • Tshiji tshia Yehowa kudi Goga (17-23)

    • ‘Bisamba nebifike ku dimanya ne: meme ndi Yehowa’ (23)

38  Dîyi dia Yehowa diakalua kabidi kundi, diamba ne:  “Muana wa muntu, tangija mpala webe kudi Goga wa mu buloba bua Magoga,+ mfumu munene* wa Mesheka ne Tubala,+ ne amba mêyi a buprofete a bualu buamufikila.+  Amba ne: ‘Mona tshidi Mukalenge Mutambe Bunene Yehowa wamba: “Mona ndi nebe tshilumbu, wewe Goga, mfumu munene* wa Mesheka ne Tubala.  Nenkukudimune ne nengele ndobo mu mbanga yebe+ ne nenkupatule wewe ne tshiluilu tshiebe tshionso,+ tubalu ne bendeshi ba tubalu, buonso buabu bavuale bimpe, tshisumbu tshinene tshiambule ngabu minene ne ngabu mikese,* buonso buabu bajule miele ya mvita;  Pelasa, Etshiopi ne Puta+ badi nabu, buonso buabu bikale ne ngabu mukese ne tshifulu;  Gomê ne bisumbu biende bionso bia basalayi, nzubu wa Togâma+ wa ku miaba ya kule menemene ya ku nord, pamue ne bisumbu biende bionso bia basalayi, bisamba bia bungi bia bantu bidi nebe.+  “‘“Ikala pabuipi, dilongolola wewe ne biluilu biebe bidi bidisangishe nebe, ne wewe newikale mulombodi* wabi.  “‘“Nebatume ntema kuudi* panyima pa matuku a bungi. Mu tshikondo tshia ku ndekelu kua bidimu, wewe neulue bua kuluisha buloba buena bantu badibu bapingaje bafumina ku tshinyangu tshia muele wa mvita, badibu bapatule mu bisamba bia bungi bia bantu, ne basangishe pamue pa mikuna ya Isalele ivua mishale mibutula munkatshi mua matuku a bungi. Bavua bapingaje bantu ba mu buloba ebu bafumina mu bukua bantu, ne buonso buabu mbasombe mu bukubi.+  Neuye kudibu bu mvula mukole wa tshipepele, ne neubuikile buloba bu matutu, wewe ne bisumbu biebe bionso bia basalayi ne bisamba bia bungi bia bantu bidi nebe.”’ 10  “Mona tshidi Mukalenge Mutambe Bunene Yehowa wamba: ‘Dituku adi ngenyi neyikuluile mu muoyo webe, ne neuluke mayele mabi. 11  Newambe ne: “Nenduishe buloba budi ne misoko idi kayiyi mikuba.*+ Nendue bua kuluisha badi basombe mu bukubi, kabayi ne bualu budi bubatatshisha, buonso buabu basombele mu misoko idi kayiyi mikuba kudi bimanu, milonda, peshi biibi.” 12  Bualu ebu nebuenzeke bua kupawula ne kunyenga bintu bia bungi, bua kuluisha miaba ivuabu babutule idi bantu basombele mpindieu+ ne tshisamba tshisangisha tshiakabidi tshifumina mu bisamba,+ tshidi tshivudija biuma ne bintu,+ bantu badi basombele munkatshinkatshi mua buloba. 13  “‘Sheba+ ne Dedana,+ bangenda mushinga ba ku Tâshishi+ ne bilobo biende bionso bia mvita* nebakuambile ne: “Udi ubuela ne mvita bua kunyenga ne kupawula bintu bia bungi anyi? Udi musangishe biluilu biebe bua kuya ne arjan ne or, bua kuangata biuma ne bintu, bua kunyenga bintu bia bungi anyi?”’ 14  “Nunku amba mêyi a buprofete, wewe muana wa muntu, ne ambila Goga ne: ‘Mona tshidi Mukalenge Mutambe Bunene Yehowa wamba: “Mu dituku adi pikala bantu banyi bena Isalele basombe mu bukubi, wewe kuakumanya bualu ebu anyi?+ 15  Wewe neufumine muaba webe, neufumine ku bitupa bia kule menemene bia ku nord,+ wewe ne bisamba bia bungi bia bantu bidi nebe, buonso buabi bibande pa tubalu, tshisumbu tshinene tshia bantu, tshiluilu tshinene.+ 16  Wewe neulue kuluisha bantu banyi bena Isalele bu matutu adi mabuikile buloba. Ku ndekelu kua matuku, nenye nebe bua uluishe buloba buanyi+ bua bisamba bifike ku dimmanya meme pandi ndijidila ku mêsu kuabu kupitshila kuudi, wewe Goga.”’+ 17  “Mona tshidi Mukalenge Mutambe Bunene Yehowa wamba: ‘Wewe kuena muntu umvua muambe bualu buende mu matuku a kale ku butuangaji bua bena mudimu banyi baprofete ba Isalele bavua bambe mêyi a buprofete kukadi bidimu bia bungi, ne: bavua mua kulua nebe bua kubaluisha anyi?’ 18  “‘Dituku adi, dituku dikala Goga mua kulua bua kuluisha buloba bua Isalele,’ ke mudi Mukalenge Mutambe Bunene Yehowa wamba, ‘tshiji tshianyi tshikole netshiteme.+ 19  Mu tshisumi tshianyi, mu kapia ka tshiji tshianyi, meme nengakule; ne mu dituku adi nekuenzeke dizakala dikole dia buloba mu buloba bua Isalele. 20  Bua bualu buanyi meme, mishipa ya mu mbuu, nyunyi ya muulu, nyama ya tshisuku ya mu mpata, bintu bionso bitu bilamba bidi bidikoka panshi ne bantu bonso badi pa buloba nebikanke, mikuna neyedibue panshi,+ ne mbuebue neyikuluke, ne tshimanu tshionso netshiupuke panshi.’ 21  “‘Nemmubikidile muele wa mvita pa mikuna yanyi yonso,’ ke mudi Mukalenge Mutambe Bunene Yehowa wamba. ‘Muele wa mvita wa muntu yonso newuluishe muanabu ne muntu.+ 22  Nemmutumine dilumbuluisha dianyi* ne tshipupu+ ne diela mashi panshi; ne nemmulokeshile yeye ne bisumbu biende bia basalayi ne bisamba bia bungi bia bantu bidi nende+ mvula wa tshipupu, mabue a mvula+ ne kapia+ ne sufre.+ 23  Nunku, bulelela meme nenditumbishe, nendijidile ne nendimanyishe ku mêsu kua bisamba bia bungi; nunku bobu nebafike ku dimanya ne: meme ndi Yehowa.’

Note

Anyi “mukokeshi munene.”
Anyi “mukokeshi munene.”
Ngabu mukese uvuabu batamba kuambula kudi bedi ba mikete.
Ku mua.: “mulami.”
Anyi “Nebakubikidishe.”
Anyi “idi buashi, ya ku ntshiama.”
Anyi “bana bende ba ntambue ba musalala.”
Anyi “Nendumbulule nende.”