Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yehezekele 37:1-28

MALU ADI MU MUKANDA EU

  • Tshikena kumona tshia tshibandabanda tshia mifuba miume (1-14)

  • Mitshi ibidi ya kusangisha kaba kamue (15-28)

    • Tshisamba tshimue ku bukokeshi bua mukalenge umue (22)

    • Tshipungidi tshia tshiendelele tshia ditalala (26)

37  Tshianza tshia Yehowa tshivua pambidi panyi, ne Yehowa wakangambula ku nyuma wende, kuntekaye munkatshi mua tshibandabanda,+ ne tshiotshi tshivua tshiuwule tente ne mifuba.  Yeye wakampitshisha munkatshi muayi, meme kumona ne: mu tshibandabanda atshi muvua mifuba mipite bungi panshi, ne ivua miume bikole.+  Wakangebeja ne: “Muana wa muntu, mifuba eyi idi mua kupeta muoyo anyi?” Meme kuandamuna ne: “Mukalenge Mutambe Bunene Yehowa, wewe ke udi mumanye.”+  Nunku, wakangambila ne: “Amba mêyi a buprofete bua mifuba eyi, yambila ne: ‘Nuenu mifuba miume, umvuayi dîyi dia Yehowa:  “‘Mona tshidi Mukalenge Mutambe Bunene Yehowa wambila mifuba eyi: “Nembueje mueyelu munda muenu, ne nenulue ne muoyo.+  Nenteke bijilujilu* ne misunyi pambidi penu, ne nennubuikile dikoba, nengele mueyelu munda muenu, ne nenulue ne muoyo; nunku nenufike ku dimanya ne: meme ndi Yehowa.”’”  Pashishe ngakamba mêyi a buprofete anu bu muvuabu bantumine dîyi. Diakamue pangakamba mêyi a buprofete, kuakenzeka mutoyi, tshiona tshikole, ne mifuba yakabanga kulamakanangana, mufuba umue ku mufuba mukuabu.  Pashishe ngakamona bijilujilu ne misunyi bipatuka pambidi payi, ne dikoba diakayibuikila. Kadi mueyelu kawuvua anu muanji kuikala munda muayi to.  Pashishe wakangambila ne: “Ambila lupepele mêyi a buprofete. Muana wa muntu, amba mêyi a buprofete, ne ambila lupepele ne: ‘Mona tshidi Mukalenge Mutambe Bunene Yehowa wamba: “Wewe lupepele,* buela ufumina ku mpepele inayi, ne tuta pa bantu bavuabu bashipe aba, bua bamone mua kulua ne muoyo.”’” 10  Nunku, ngakamba mêyi a buprofete anu muvuaye muntumine dîyi, ne mueyelu* wakabuela munda muabu, bakalua ne muoyo ne bakimana ne makasa abu,+ tshiluilu tshinene menemene tshia basalayi. 11  Pashishe, yeye wakangambila ne: “Muana wa muntu, mifuba eyi ke nzubu mujima wa Isalele.+ Mona badi bamba ne: ‘Mifuba yetu mmiume, ne ditekemena dietu ndijimine.+ Mbatukose batukoselamu.’ 12  Nunku, amba mêyi a buprofete, ne bambila ne: ‘Monayi tshidi Mukalenge Mutambe Bunene Yehowa wamba: “Nenkangule nkita yenu ne nennujule nnupatula mu nkita yenu,+ nuenu bantu banyi, ne nenye nenu mu buloba bua Isalele.+ 13  Nunku nenufike ku dimanya ne: meme ndi Yehowa pandi nkangula nkita yenu ne pandi nnujula nnupatula mu nkita yenu, nuenu bantu banyi.”’+ 14  ‘Nengele nyuma wanyi munda muenu ne nenulue ne muoyo,+ ne nennusombeshe mu buloba buenu; nunku nenufike ku dimanya ne: meme Yehowa ke udi muakule ne ndi muenze bualu ebu,’ ke mudi Yehowa wamba.” 15  Dîyi dia Yehowa diakalua kabidi kundi diamba ne: 16  “Kadi wewe, muana wa muntu, angata mutshi, ufundapu ne: ‘Bua Yuda ne bua bantu ba Isalele badi nende.’*+ Pashishe, angata mutshi mukuabu, ufundapu ne: ‘Bua Jozefe, mutshi wa Efelayima, ne ba mu nzubu wa Isalele bonso badi nende.’*+ 17  Pashishe, uyisemeje umue pabuipi ne mukuabu bua ilue anu mutshi umue mu tshianza tshiebe.+ 18  Padi bena mu tshisamba tshienu* bakuebeja ne: ‘Kuakutuambila tshidi malu aa umvuija anyi?’ 19  bambila ne: ‘Monayi tshidi Mukalenge Mutambe Bunene Yehowa wamba: “Nengangate mutshi wa Jozefe, udi mu tshianza tshia Efelayima, ne bisa bia Isalele bidi nende, ne nembisangishe ku mutshi wa Yuda; ne nenyivuije mutshi umue,+ ne neyilue umue mu tshianza tshianyi.”’ 20  Mitshi iudi ufundilapu idi ne bua kuikala mu tshianza tshiebe bua bobu kumona. 21  “Pashishe, bambila ne: ‘Monayi tshidi Mukalenge Mutambe Bunene Yehowa wamba: “Nempatule bena Isalele munkatshi mua bisamba mudibu baye, nembasangishe pamue bafumina ku nseke yonso ne nenye nabu mu buloba buabu.+ 22  Nembavuije tshisamba tshimue mu buloba ebu,+ pa mikuna ya Isalele, ne mukalenge umue neabakokeshe buonso buabu,+ kabakuikala kabidi bisamba bibidi to; anyi kabakuikala kabidi batapuluke mu makalenge abidi nansha.+ 23  Kabakudinyanga kabidi ne mpingu yabu ya muendi* ne bienzedi biabu bibi, ne dishipa diabu dionso dia mikenji+ to. Nembapandishe ku dipanga lulamatu diabu dionso didi dibenzeje mpekatu, ne nembakezule. Nebikale bantu banyi, ne meme muine nengikale Nzambi wabu.+ 24  “‘“Muena mudimu wanyi Davidi neikale mukalenge wabu,+ ne bonso nebikale ne mulami umue.+ Nebendele mu mapangadika anyi ne nebatumikile mêyi anyi mafunda ne muoyo mujima.+ 25  Nebasombele mu buloba bumvua mupeshe muena mudimu wanyi, bumvua mupeshe Yakoba, muvua bankambua benu basombele,+ ne nebasombelamu kashidi,+ bobu ne bana babu* ne bana ba bana babu;+ ne muena mudimu wanyi Davidi neikale mfumu* wabu bua kashidi.+ 26  “‘“Nendie nabu tshipungidi tshia ditalala;+ netshikale tshipungidi tshia tshiendelele tshindi ndia nabu. Nembajadike, nembavudije+ ne nenteke muaba wanyi munsantu munkatshi muabu bua kashidi. 27  Ntenta wanyi* neikale nabu,* ne meme nengikale Nzambi wabu, ne bobu nebikale bantu banyi.+ 28  Nunku bisamba nebifike ku dimanya ne: meme, Yehowa, ndi njidila Isalele padi muaba wanyi munsantu muikale munkatshi muabu bua kashidi.”’”+

Note

Anyi “mifungu.”
Anyi “mueyelu; nyuma.”
Anyi “nyuma.”
Anyi “badi bena diende.”
Anyi “badi bena diende.”
Ku mua.: “bana ba mu tshisamba tshienu.”
Tshiambilu tshia mu tshiena Ebelu etshi tshidi mua kuikala tshipetangana ne muaku “tumvi tua nyama” ne mbenze natshi mudimu bua kuleja kapeja.
Ku mua.: “bana babu ba balume.”
Anyi “mukokeshi.”
Anyi “Muaba wanyi wa kusombela; Nzubu.”
Anyi “pa mutu pabu.”