Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yehezekele 36:1-38

MALU ADI MU MUKANDA EU

  • Mêyi a buprofete a bualu bua mikuna ya Isalele (1-15)

  • Dipingajibua kabidi dia Isalele (16-38)

    • “Nenjidile dîna dianyi dinene” (23)

    • “Bu budimi bua Edene” (35)

36  “Kadi wewe, muana wa muntu, amba mêyi a buprofete bua mikuna ya Isalele, amba ne: ‘Nuenu mikuna ya Isalele, umvuayi dîyi dia Yehowa.  Monayi tshidi Mukalenge Mutambe Bunene Yehowa wamba: “Muena lukuna mmunuambe ne: ‘Woloo! Too ne miaba mitumbuke ya kale mmilue yetu tuetu!’”’+  “Nunku akula mêyi a buprofete ne amba ne: ‘Monayi tshidi Mukalenge Mutambe Bunene Yehowa wamba: “Bu mudibu banushiye munda mutupu ne banuele mvita ku nseke yonso bua nulue tshintu tshia badi bapanduke* munkatshi mua bisamba, ne bantu batungunuka ne kuakula bua bualu buenu ne banushiminyina malu,+  nunku, nuenu mikuna ya Isalele, umvuayi dîyi dia Mukalenge Mutambe Bunene Yehowa! Monayi tshidi Mukalenge Mutambe Bunene Yehowa wambila mikuna minene ne mikuna mikese, tusulu tua mâyi ne bibandabanda, bikulu bivua bishiya munda mutupu,+ ne bimenga bilekela bivuabu bapawule ne baseke kudi badi bapanduke ba mu bisamba bidi bibinyunguluke;+  Mukalenge Mutambe Bunene Yehowa udi ubiambila ne: ‘Nengakule mu kapia ka tshisumi tshianyi+ bua bualu bua badi bapanduke ba mu bisamba ne bua Edome yonso, bantu badi bambe buloba buanyi ne disanka dia bungi ne dipetu* dikole+ ne: mbuabu bobu, bua kuangata mpata yabu ya kudishila nyama ne kubupawula.’”’+  “Nunku, amba mêyi a buprofete bua bualu bua buloba bua Isalele, ne ambila mikuna minene ne mikuna mikese, tusulu tua mâyi ne bibandabanda ne: ‘Monayi tshidi Mukalenge Mutambe Bunene Yehowa wamba: “Tangilayi! Nengakule mu tshisumi tshianyi ne mu tshiji tshianyi tshikole, bualu mbanupuekeshe milongo kudi bisamba.”’+  “Nunku, mona tshidi Mukalenge Mutambe Bunene Yehowa wamba: ‘Meme muine ndi ngela tshianza tshianyi muulu nditshipa ne: bisamba bidi binunyunguluke nebidiambuile bundu buabi.+  Kadi nuenu, mikuna ya Isalele, nenupatule matamba ne nenukuame mamuma bua bantu banyi bena Isalele,+ bualu nebapingane mu katupa kîpi emu.  Bualu ndi nenu, nentangile kunudi, ne nebanudime ne nebanukune mamiinu. 10  Nemvudije bantu benu, nzubu mujima wa Isalele, yeye yonso, bantu nebasombele+ mu bimenga ne nebibakulule bikulu.+ 11  Eyowa, nemvudije bantu benu ne bimuna bienu;+ nebivulangane ne nebilelangane. Nengenze bua bantu basombele munda muenu bu munuvua kale,+ ne nennutantshishe kupita kumpala;+ nunku nenufike ku dimanya ne: meme ndi Yehowa.+ 12  Nengenze bua bantu, bantu banyi bena Isalele, bendele pa mutu penu, ne nebanuangate bua nuikale bintu biabu.+ Nenulue bumpianyi buabu, ne kanuakubashiya kabidi kabayi ne bana to.’”+ 13  “Mona tshidi Mukalenge Mutambe Bunene Yehowa wamba: ‘Bu mudibu bakuambila ne: “Wewe udi buloba budi budia bantu ne bushipela bisamba biabu bana,”’ 14  ‘nunku, wewe kuakudia kabidi bantu anyi kushiya bisamba biebe kabiyi ne bana to,’ ke mudi Mukalenge Mutambe Bunene Yehowa wamba. 15  ‘Tshiakukufila kabidi ku bipendu bia bisamba anyi kuenza bua wambule mayobo a bantu,+ ne kuakulenduisha kabidi bisamba biebe nansha,’ ke mudi Mukalenge Mutambe Bunene Yehowa wamba.” 16  Dîyi dia Yehowa diakalua kabidi kundi diamba ne: 17  “Muana wa muntu, pavua ba mu nzubu wa Isalele basombele mu buloba buabu, bakabuvuija bukoya ne njila yabu ne bienzedi biabu.+ Njila yabu ivua kundi bu bukoya bua tshijila tshia mashi.+ 18  Nunku ngakabitshikijila tshiji tshianyi tshikole bua mashi avuabu bele panshi mu buloba ebu,+ ne bualu bavua bavuije buloba ebu bukoya ne mpingu yabu ya muendi.*+ 19  Nunku ngakabatangalaja munkatshi mua bisamba ne kubamuangalaja munkatshi mua maloba.+ Ngakabalumbuluisha bilondeshile njila wabu ne bilondeshile bienzedi biabu. 20  Kadi pakafikabu kudi bisamba abi, bantu bakanyanga dîna dianyi dia tshijila,+ bamba bua bualu buabu ne: ‘Aba mbantu ba Yehowa, kadi bavua ne bua kumbuka mu buloba buende.’ 21  Nunku, nentabalele dîna dianyi dia tshijila, divua ba mu nzubu wa Isalele banyange munkatshi mua bisamba mudibu baye.”+ 22  “Nunku ambila ba mu nzubu wa Isalele ne: ‘Monayi tshidi Mukalenge Mutambe Bunene Yehowa wamba: “Ki mbuenu nuenu bundi ngenzela bualu ebu to, nuenu nzubu wa Isalele, kadi mbua dîna dianyi dia tshijila dinuvua banyange munkatshi mua bisamba munudi baye.”’+ 23  ‘Bulelela, nenjidile dîna dianyi dinene,+ divua dinyanga munkatshi mua bisamba, dinuvua banyange munkatshi muabi; ne bisamba nebifike ku dimanya ne: meme ndi Yehowa,’+ ke mudi Mukalenge Mutambe Bunene Yehowa wamba, ‘pandi ndileja wa tshijila munkatshi muenu ku mêsu kuabi. 24  Nennumbushe mu bisamba ne nennupingaje numbukila mu maloba onso, ne nenye nenu mu buloba buenu.+ 25  Nennumiamine mâyi makezuke, nenulue bakezuke;+ nennukezule ku dipanga bukezuke dienu dionso+ ne ku mpingu yenu yonso ya muendi.+ 26  Nennupeshe muoyo mupiamupia,+ ne nengele nyuma mupiamupia munda muenu.+ Nengumbushe muoyo wa dibue+ mu mubidi wenu ne nennupeshe muoyo wa musunyi.* 27  Nengele nyuma wanyi munda muenu, ne nengenze bua nuendele mu mêyi ne mikandu yanyi,+ nenutumikile ne nenuenze mapangadika anyi. 28  Pashishe nenusombele mu buloba bumvua mupeshe bankambua benu, nunku nuenu nenuikale bantu banyi ne meme nengikale Nzambi wenu.’+ 29  “‘Nennupandishe ku bukoya buenu buonso, nembikile ntete ne nenyivudije, ne tshiakunutumina tshiyole tshia nzala+ to. 30  Nemvudije bimuma bia mitshi ne bintu bia pa madimi, bua kanumonyi mua kufua kabidi bundu bua tshiyole tshia nzala munkatshi mua bisamba nansha.+ 31  Pashishe nenuvuluke njila yenu mibi ne bienzedi bienu bivua kabiyi bimpe, ne nenudikine nuenu bine bua tshilema tshienu ne bua bienzedi bienu bibi.+ 32  Kadi numanye bualu ebu ne: Tshiena ngenza bualu ebu buenu nuenu+ to,’ ke mudi Mukalenge Mutambe Bunene Yehowa wamba. ‘Kadi, umvuayi bundu ne diumvuayi bapuekeshibue milongo bua njila yenu, wewe nzubu wa Isalele.’ 33  “Mona tshidi Mukalenge Mutambe Bunene Yehowa wamba: ‘Dituku dindi nnukezula ku tshilema tshienu tshionso, nengenze bua bantu basombele mu bimenga+ ne bua bibakulule miaba ivua mishale bikulu.+ 34  Buloba bua munda mutupu buvuabu bashiye munda mutupu bua muntu yonso udi upita amone, nebabudime. 35  Nunku bantu nebambe ne: “Buloba buvua munda mutupu mbulue bu budimi bua Edene,+ ne bimenga bivua bishale bikulu, munda mutupu ne biupula bidi mpindieu bimenga bikolesha ne bisombela kudi bantu.”+ 36  Nunku bisamba bidibu bashiye binunyunguluke nebifike ku dimanya ne: meme Yehowa ke udi muibake tshivua tshiupula, mukune tshivuabu bashiye munda mutupu. Meme, Yehowa, ngudi muakule, ne ndi muenze bualu ebu.’+ 37  “Mona tshidi Mukalenge Mutambe Bunene Yehowa wamba: ‘Nendekele kabidi ba mu nzubu wa Isalele bandomba bua kubenzela bualu ebu: Nemvudije bantu babu bu tshisumbu tshia mikoko. 38  Bu tshisumbu tshia mikoko tshia bantu ba tshijila, bu tshisumbu tshia mikoko tshia Yelushalema* mu tshikondo tshia bibilu biende,+ bimenga bivua bishale bikulu nebilue biuwule tente ne bisumbu bia bantu;+ nunku nebafike ku dimanya ne: meme ndi Yehowa.’”

Note

Ku mua.: “tshia bashadile; tshia badi bashale.”
Anyi “dipetu mu anyima.”
Tshiambilu tshia mu tshiena Ebelu etshi tshidi mua kuikala tshipetangana ne muaku “tumvi tua nyama” ne mbenze natshi mudimu bua kuleja kapeja.
Mmumue ne: udi witaba buludiki bua Nzambi.
Anyi pamuapa: “bu bisumbu bia mikoko bia kulambula mu Yelushalema.”